ដោយ: គង់ លាងហួរ
អន្តរជាតិ: រដ្ឋាភិបាលឥណ្ឌូនេសុីគ្រោងវិភាជន៍ថវិកាចំនួន៤០,៦ពាន់ពាន់លានរូពៀ (២,៦ពាន់លានដុល្លារ) ចេញពីកញ្ចប់ថវិកាជាតិ ដែលបានស្នើសម្រាប់ឆ្នាំ២០២៤ ដើម្បីសាងសង់គម្រោងរដ្ឋធានីថ្មី Nusantara។
ថវិកាយ៉ាងហោចណាស់៣៥ពាន់ពាន់លានរូពៀ ឬស្មើនឹង៨៦,២% នៃថវិកាសរុប ត្រូវបានផ្តល់ជូនក្រសួងសាធារណការ និងលំនៅដ្ឋាន ដើម្បីអភិវឌ្ឍហេដ្ឋារចនាសម្ព័ន្ធសំខាន់ៗ រួមទាំងអាកាសយានដ្ឋាន VVIP ផងដែរ។
ចំណែក ថវិកាដែលនៅសេសសល់ត្រូវបានចាត់ចែងសម្រាប់ក្រសួងពាក់ព័ន្ធផ្សេងទៀត ដើម្បីអភិវឌ្ឍសម្ភារៈបរិក្ខារចាំបាច់នៅក្នុងរដ្ឋធានីថ្មី រួមទាំងមន្ទីរពេទ្យផងដែរ។
លោកស្រី Sri Mulyani Indrawati រដ្ឋមន្ត្រីក្រសួងហិរញ្ញវត្ថុឥណ្ឌូនេសុី បានប្រាប់អ្នកសារព័ត៌មានកាលពីថ្ងៃពុធថា មូលនិធិនេះមានគោលបំណងអភិវឌ្ឍហេដ្ឋារចនាសម្ព័ន្ធសំខាន់ៗសម្រាប់អគាររដ្ឋបាលរបស់ប្រទេស ក៏ដូចជាលំនៅដ្ឋានសម្រាប់មន្ត្រីរាជការដែលតម្រូវឱ្យផ្លាស់ប្តូរទីលំនៅពីទីក្រុងហ្សាកាតាទៅកាន់រដ្ឋធានីថ្មី។
ទន្ទឹមគ្នានេះ អាណត្តិទីពីរ និងជាអាណត្តិចុងក្រោយរបស់លោកប្រធានាធិបតី Joko Widodo នឹងត្រូវបញ្ចប់នៅខែតុលា ឆ្នាំ២០២៤ខាងមុខ ដែលមានន័យថា នេះគឺជាឆ្នាំចុងក្រោយហើយ ដែលលោកអាចចាត់ចែងធនធានដើម្បីតម្រង់ឆ្ពោះទៅការកសាងរដ្ឋធានីថ្មី៕
