ដោយ: គង់ លាងហួរ
អន្តរជាតិ: វិបត្តិបំណុលនៅក្រុមហ៊ុន Country Garden ដែលជាអ្នកអភិវឌ្ឍអចលនទ្រព្យដ៏ធំបំផុតរបស់ប្រទេសចិន បានបង្កឱ្យមានការភ័យខ្លាចចំពោះការឆ្លងរាលដាលជាថ្មី បន្ទាប់ពីក្រុមហ៊ុន China Evergrande Group បានខកខានសងបំណុលកាលពី២ឆ្នាំមុន។
តើអាចមានអ្វីអាចកើតឡើងបន្ទាប់?
ចាប់តាំងពីវិបត្តិបំណុលក្នុងវិស័យអចលនទ្រព្យបានផ្ទុះឡើងនៅពាក់កណ្តាលឆ្នាំ២០២១ ក្រុមហ៊ុននានា ដែលគ្របដណ្តប់៤០%នៃការលក់ផ្ទះរបស់ប្រទេសចិនបានខកខានសងបំណុល ដែលភាគច្រើនជាអ្នកអភិវឌ្ឍន៍អចលនទ្រព្យឯកជន។
ដោយសារតែការលក់ផ្ទះដាំក្បាលចុះយ៉ាងខ្លាំង វិបត្តិបំណុលអាចពន្យារការរំពឹងទុកនៃការងើបឡើងវិញក្នុងទីផ្សារអចលនទ្រព្យ ខណៈវិស័យអចលនទ្រព្យគឺជាសសរស្តម្ភស្នូលនៃសេដ្ឋកិច្ចចិន។
ក្រុមហ៊ុន S&P Global Rating បានបញ្ជាក់កាលពីថ្ងៃពុធ ទី១៧ សីហា ថា ក្រុមហ៊ុនអាចកែសម្រួលការព្យាកររបស់ខ្លួនសម្រាប់ការលក់អចលនទ្រព្យទៅជាតួលេខ “ជណ្តើរចុះក្រោម” ពីការងើបឡើងវិញរាងជាអក្សរ “L” ប្រសិនបើក្រុមហ៊ុន Country Garden ខកខានសងបំណុលជាផ្លូវការ។
លើសពីនេះ អ្នកទិញផ្ទះនឹងកាន់តែមានការប្រុងប្រយ័ត្នចំពោះយីហោរបស់អ្នកអភិវឌ្ឍន៍ឯកជន ហើយតម្លៃផ្ទះនៅក្នុងតំបន់ជាច្រើនអាចស្ថិតនៅក្រោមសម្ពាធកាន់តែខ្លាំង ប្រសិនបើ Country Garden ងាកទៅរកការលក់ផ្ទះថោកៗដើម្បីប្រមូលប្រាក់សងបំណុល។
តើបញ្ហាហិរញ្ញវត្ថុរបស់ក្រុមហ៊ុន Country Garden នៅពេលនេះខុសគ្នាយ៉ាងណាជាមួយក្រុមហ៊ុន Evergrande កាលពីលើកមុន?
ការធ្លាក់ចូលក្នុងបញ្ហាហិរញ្ញវត្ថុភ្លាមៗរបស់ក្រុមហ៊ុន Country Garden មិនបានធ្វើឱ្យទីផ្សារភ្ញាក់ផ្អើលខ្លាំងដូចក្រុមហ៊ុន Evergrande ទេ ពីព្រោះអ្នកអភិវឌ្ឍឯកជនភាគច្រើនបានខកខានសងបំណុលគេរួចមកហើយ។ ទោះជាយ៉ាងនេះក្តី បញ្ហានេះបានលេចឡើងស្របពេលដែលទីផ្សារអចលនទ្រព្យ និងសេដ្ឋកិច្ចស្ថិតក្នុងស្ថានភាពកាន់តែអាក្រក់ទៅៗ។
តើរដ្ឋាភិបាលកណ្តាលនឹងធ្វើអន្តរាគមន៍ដែរទេ?
តាមរយៈការិយាល័យនយោបាយរបស់ប្រទេសចិន ដែលជាស្ថាប័នធ្វើសេចក្តីសម្រេចចិត្តកំពូលនៃបក្សកុម្មុយនិស្តចិន ដែលកំពុងកាន់អំណាច បានជំរុញឱ្យមានការរំពឹងទុកថា វិធានការជំរុញបន្ថែមទៀតគឺជិតមកដល់ហើយ។
ទន្ទឹមគ្នានេះ អ្នកវិភាគជាច្រើនសង្ឃឹមថា ទីក្រុងប៉េកាំងនឹងដាក់ចេញនូវវិធានការណ៍យ៉ាងខ្លាំងក្លានៅក្នុងរយៈពេលប៉ុន្មានសប្តាហ៍ខាងមុខនេះ ដើម្បីទប់ស្កាត់ស្ថានភាពមួយ ដែលអាចវិវឌ្ឍកាន់តែអាក្រក់ទៅៗយ៉ាងឆាប់រហ័ស និងពិបាកក្នុងការគ្រប់គ្រងបាន។
ទោះជាយ៉ាងណាក្តី អ្នកវិភាគមួយចំនួនបានចោទសួរអំពីឧបករណ៍ដែលទីក្រុងប៉េកាំងអាចប្រើប្រាស់បាន ក្នុងការរក្សាឱ្យបាននូវតុល្យភាពរវាងការផ្តល់ជំនួយដល់ទីផ្សារលំនៅដ្ឋាន និងការរក្សាបំណុលឱ្យស្ថិតក្រោមការគ្រប់គ្រង៕
