ដោយ: គង់ លាងហួរ
ប៉េកាំង: រដ្ឋមន្ត្រីការបរទេសចិន លោកWang Yi កាលពីថ្ងៃសៅរ៍សប្តាហ៍មុន បានជួបជាមួយឧបនាយករដ្ឋមន្ត្រី និងជារដ្ឋមន្ត្រីការបរទេសថៃ លោក Don Pramudwinai ដែលមកបំពេញទស្សនកិច្ចនៅទីក្រុងប៉េកាំង។
ដោយកត់សម្គាល់ឃើញថា ការអភិវឌ្ឍទំនាក់ទំនងទ្វេរភាគី នឹងមិនរងផលប៉ះពាល់ដោយសារ ការប្រែប្រួលស្ថានភាពអន្តរជាតិ ឬស្ថានការណ៍ ក្នុងស្រុកនៅប្រទេសថៃ លោក Wang Yi ដែលជាសមាជិកការិយាល័យនយោបាយ នៃគណៈកម្មាធិការមជ្ឈិមបក្សកុម្មុយនិស្តចិនបានមានប្រសាសន៍ថា ប្រទេសថៃនឹងរក្សាបានស្ថិរភាព និងការអភិវឌ្ឍប្រកបដោយនិរន្តរភាព។
លោក Wang បានបន្តថា ប្រទេសចិនបានត្រៀមខ្លួនរួចជាស្រេច ក្នុងការពង្រឹងកិច្ចសហប្រតិបត្តិការ លើវិស័យផ្សេងៗជាមួយប្រទេសថៃ ដោយជំរុញឱ្យមានការពន្លឿន ការសាងសង់ផ្លូវដែកចិន-ថៃ និងបណ្តាញផ្លូវដែកចិន-ឡាវ-ថៃ និងកិច្ចខិតខំប្រឹងប្រែងរួមគ្នាដើម្បីបង្ក្រាបសកម្មភាពឧក្រិដ្ឋកម្មឆ្លងដែន រួមទាំងការក្លែងបន្លំតាមទូរគមនាគមន៍ផងដែរ។
លោក Wang Yi ក៏បានបង្ហាញពីការត្រៀមខ្លួន របស់ប្រទេសចិន ក្នុងការបន្តគាំទ្រដល់ការកសាងសហគមន៍អាស៊ាន គាំទ្រមជ្ឈភាពអាស៊ាន និងគាំទ្រកិច្ចខិតខំប្រឹងប្រែងរួមគ្នា ក្នុងការកសាងមជ្ឈមណ្ឌលកំណើនសេដ្ឋកិច្ចមួយ។
លោកបញ្ជាក់ទៀតថា ប្រទេសចិនបានត្រៀមខ្លួនរួចជាស្រេច ក្នុងការធ្វើការជាមួយបណ្តាប្រទេសអាស៊ាន ដើម្បីពន្លឿនការពិគ្រោះយោបល់ លើក្រមប្រតិបត្តិនៅសមុទ្រចិនខាងត្បូង ខិតខំបង្កើតច្បាប់នានា ក្នុងតំបន់ប្រកបដោយប្រសិទ្ធភាព និងកសាងសមុទ្រចិនខាងត្បូងទៅជាសមុទ្រសន្តិភាព មិត្តភាព និងកិច្ចសហប្រតិបត្តិការ។
លោកក៏បានចង្អុលបង្ហាញថា បណ្តាប្រទេសក្នុងតំបន់គួរតែការពារប្រឆាំង នឹងកងកម្លាំងនៅខាងក្រៅតំបន់ ដែលបង្កឱ្យមានការប្រឈមមុខដាក់គ្នា និងលើកទឹកចិត្តដល់ស្មារតី នៃសង្គ្រាមត្រជាក់ដែលនឹងធ្វើឱ្យខូចដល់សន្តិភាព និងស្ថិរភាពដែលពិបាកសម្រេចបាន។
ចំណែក លោក Don បានមានប្រសាសន៍ថា ក្រោមស្ថានភាពនៃការកើនឡើង នៃភាពមិនប្រាកដប្រជាអន្តរជាតិ និងក្នុងតំបន់ ប្រទេសថៃ មានឆន្ទៈក្នុងការពង្រឹងកិច្ចសន្ទនា និងការផ្លាស់ប្តូរជាមួយប្រទេសចិន ពង្រឹងកិច្ចសហប្រតិបត្តិការ ផ្តល់ផលប្រយោជន៍ទៅវិញទៅមកក្នុងវិស័យផ្សេងៗ លើកកម្ពស់ការតភ្ជាប់ផ្លូវដែកចិន-ឡាវ-ថៃ និងធ្វើការដើម្បីការអភិវឌ្ឍរួមគ្នា៕
