នាយករដ្ឋមន្ត្រីថ្មីនៃកម្ពុជា និងថៃប្តេជ្ញាពង្រឹងទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំង២

ដោយ: គង់ លាងហួរ
អន្តរជាតិ: កាលពីថ្ងៃទី២២ ខែសីហាកន្លងទៅ ប្រទេសកម្ពុជា និងប្រទេសថៃ បានជ្រើសរើសនាយករដ្ឋមន្ត្រីថ្មីក្នុងពេលដំណាលគ្នា ដែលនេះជាភាពចៃដន្យដ៏ពិសេសមួយ។ នេះបើយោងតាមការចុះផ្សាយដោយសារពត៌មាន The Nation នៅថ្ងៃព្រហស្បតិ៍ ទី២៤ ខែសីហានេះ។

សម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា បានទទួលស្គាល់បែបនេះតាមរយៈការបង្ហោះសារនៅលើបណ្តាញសង្គម Telegram ផ្លូវការរបស់សម្តេច ដោយលើកឡើងពីភាពស៊ីសង្វាក់គ្នានៃប្រទេសប្រកាន់យករបបរាជាធិបតេយ្យអាស្រ័យធម្មនុញ្ញទាំងពីរ។

បន្ទាប់ពីឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រីនៃកម្ពុជា បានស្បថចូលកាន់តំណែងសភា ចំណែកថៃឯណេះវិញបានជ្រើសរើសលោក ស្រេតថា ថាវីស៊ីន (Srettha Thavisin) ជានាយករដ្ឋមន្ត្រីថ្មីរបស់ប្រទេសថៃ ដែលព្រឹត្តិការណ៍ថ្ងៃនោះបានឆ្លុះបញ្ចាំងឱ្យឃើញពីភាពស៊ីសង្វាក់គ្នាមួយ។សម្តេចតេជោបានសម្តែងនូវការអបអរសាទរចំពោះលោកស្រេតថា និងសម្តែងសុទិដ្ឋិនិយមចំពោះការបន្តកិច្ចសហការ និងការយោគយល់គ្នារវាងប្រជាជាតិទាំងពីរ ។ក្នុងកាយវិការ នៃសុច្ឆន្ទៈ និងភាពស្និទ្ធស្នាលនាយករដ្ឋមន្ត្រីថ្មីនៃប្រទេសទាំង២បានចែករំលែក និងសន្ទនាគ្នាតាមរយៈការហៅទូរស័ព្ទដោយផ្តល់ការអបអរសាទរយ៉ាងកក់ក្តៅចំពោះគ្នាទៅវិញទៅមក ។