ដោយ៖ ដួង ចន្ទ្រា
ភ្នំពេញ៖ ជាមួយនឹងការប្រមូលផលស្រូវរដូវវស្សាបាន និងកំពុងចាប់ផ្តើម មន្ត្រីជាន់ខ្ពស់ក្រសួងកសិកម្មបានរំពឹងថា ទិន្នផលស្រូវឆ្នាំនេះ នឹងកើនដល់ជាង១០លានតោន ខណៈតម្លៃក៏មានភាពល្អប្រសើរនៅក្នុងទីផ្សារ។
រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទលោកវេង សាខុនបានថ្លែងឲ្យដឹងតាមទូរស័ព្ទកាលពីម្សិលម៉ិញនេះថា ទិន្នផលស្រូវឆ្នាំនេះនឹងកើនដល់ជាង១០លានតោន ខណៈឆ្នាំមុនការប្រមូលផលស្រូវ បានជាង៩,៩៥០,០០០តោន ព្រោះការដាំដុះដំណាំស្រូវឆ្នាំនេះ សម្រេចលើសផែនការចំនួន៦,៤៥ហិកតា។លោកបន្តថា ផ្ទៃដីដាំដុះស្រូវឆ្នាំនេះមានទំហំ២,៦៥៧,៧៦៨ហិកតា និងប្រមូលផលបានចំនួន១,០២២,៤៧៨ហិកតារហូតមកទល់ពេលនេះលោកបន្តថា “ទិន្នផលស្រូវប្រមូលបានរហូតមកទល់ពេលនេះ បានចំនួន៣,៣៦១,១៦៤តោន ហើយទិន្នផលជាមធ្យមប្រមូលបានចំនួន៣២៦៣គីឡូក្រាមក្នុងមួយហិកតា។លោកបន្តថា “ផលស្រូវប្រមូលបាននាឆ្នាំនេះ ភាគច្រើនជាប្រភេទស្រូវក្រអូប ជាការផលិតសម្រាប់តំរង់ទិសសម្រាប់ការនាំចេញ។
តម្លៃស្រូវក្រអូបឆ្នាំនេះមានតម្លៃចន្លោះពី១០០០ ទៅ១៣០០០រៀល និងស្រូវធម្មតាមានតម្លៃចន្លោះពី៨០០ទៅ៩០០រៀលក្នុងមួយគីឡូក្រាម។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុនEmerging Market Consulting បានថ្លែងថា ស្ថានភាពទីផ្សារកសិកម្មកម្ពុជានៅតែមិនទាន់មានភាពច្បាស់លាស់នៅឡើយ ហើយផលិតកម្មរបស់យើងទទួលបានទិន្នផលទាប ពិសេសវិស័យកសិកម្មចូលរួមចំណែក ក្នុងផលិតផលជាតិសរុបមានចំនួនទាបផងដែរ ហើយការរើបឡើងតម្លៃកសិផលឆ្នាំនេះ ជាសញ្ញាល្អសម្រាប់ប្រជាកសិករ ប៉ុន្តែរដ្ឋាភិបាលត្រូវធ្វើការឲ្យបានកាន់តែប្រសើរជាងនេះ ដើម្បីធ្វើឲ្យតម្លៃកសិផលប្រជាពលរដ្ឋកាន់តែប្រសើរ។
លោកបន្តថា “ការថមថយកំលាំងពលកម្មក្នុងវិស័យនេះ មិនជាបញ្ហាអ្វីនោះទេ ព្រោះការប្រើប្រាស់គ្រឿងយន្តក្នុងវិស័យកសិកម្មកើនឡើង ប៉ុន្តែកសិកររបស់យើងភាគច្រើនធ្វើកសិកម្មខ្នាតតូច ហេតុនេះដំណោះស្រាយគឺសហគមន៍គួរចងក្រងគ្នា ដើម្បីទិញគ្រឿងចក្រប្រើប្រាស់រួម”៕