ដោយៈ គង់ សូរិយា
ភ្នំពេញៈ ប្រទេសម្ចាស់ជំនួយ និងធនាគារអភិវឌ្ឍន៍អាស៊ី (ADB) បានអនុម័ត ផ្តល់ថវិកាចំនួន៥ពាន់លានដុល្លារ សម្រាប់មូលនិធិអភិវឌ្ឍន៍អាស៊ី (ADF) និងមូលនិធិជំនួយបច្ចេកទេសពិសេសរបស់ខ្លួន។
ធនាគារADBបានឱ្យដឹងថា មូលនិធិអភិវឌ្ឍន៍ចំនួន៤,១ពាន់លានដុល្លារ សម្រាប់ឆ្នាំ២០២៥-២០២៨ ដែលបំពេញបន្ថែមរៀងរាល់បួនឆ្នាំម្តង នឹងផ្តល់ឱ្យសមាជិកដែលមានសិទ្ធិ រួមទាំងប្រទេសកម្ពុជាជាមួយនឹង “បរិមាណដ៏ធំបំផុតមិនធ្លាប់មាន នៃជំនួយឥតសំណងរបស់ ADF” ។
នៅក្នុងសេចក្តីប្រកាសមួយ ដែលបានចេញផ្សាយនៅថ្ងៃទី៣ ខែឧសភា ADB បាននិយាយថាកិច្ចព្រមព្រៀងនេះ ត្រូវបានសម្រេចក្នុងអំឡុងពេលកិច្ចប្រជុំប្រចាំឆ្នាំ របស់ធនាគារ នៅក្នុងរដ្ឋធានី Tbilisi នៃប្រទេសហ្សកហ្ស៊ី ដែលប្រព្រឹត្តទៅចាប់ពីថ្ងៃទី២ ដល់ថ្ងៃទី៥ ខែឧសភា។
ADF គឺជាប្រភពជំនួយដ៏ធំបំផុត របស់ធនាគារសម្រាប់ប្រទេសសមាជិកក្រីក្រ និងងាយរងគ្រោះបំផុតរបស់ខ្លួន។ធនាគារបាននិយាយថា នៅក្នុងតំបន់អាស៊ីអាគ្នេយ៍ ជំនួយរបស់ ADF ក្នុងរយៈពេល៤ឆ្នាំខាងមុខ នឹងមានសម្រាប់ “គម្រោងផ្លាស់ប្តូរ”( transformative projects) នៅក្នុងប្រទេសកម្ពុជា ឡាវ និងទីម័រឡេស្តេ ព្រមទាំងមានសម្រាប់ ”ជួយដល់ប្រជាជន” នៅក្នុងប្រទេសមីយ៉ាន់ម៉ាផងដែរ។
ប្រធាន ADB លោក Masatsugu Asakawa បានមានប្រសាសន៍ថា ជំនួយបន្ថែមដ៏គួរឱ្យកត់សម្គាល់នេះ បង្ហាញពីភាពជាដៃគូបន្តរបស់ម្ចាស់ជំនួយADF ជាមួយADB ដើម្បីដោះស្រាយបញ្ហាប្រឈមនៃការអភិវឌ្ឍន៍របស់ប្រទេស ដែលជួបការលំបាកបំផុត”។
លោកបន្តបញ្ជាក់ថា “ជំនួយនេះមានសារៈសំខាន់ជាងពេលណាៗទាំងអស់ ដោយសារប្រទេសសមាជិកក្រីក្របំផុត និងងាយរងគ្រោះបំផុតរបស់យើង កំពុងព្យាយាមដោះស្រាយផលប៉ះពាល់ថ្មីៗ ចំពោះការអភិវឌ្ឍន៍ និងចាត់វិធានការជាបន្ទាន់ ដើម្បីប្រយុទ្ធប្រឆាំងនឹងវិបត្តិអាកាសធាតុ”។
សេចក្តីប្រកាសបានឱ្យដឹងថា ជំនួយបន្ថែមរបស់ADF ចុងក្រោយបង្អស់នឹង “បន្តដើរតួនាទីយ៉ាងសំខាន់ ក្នុងការគាំទ្រការបន្សាំនឹងបម្រែបម្រួលអាកាសធាតុ និងការកាត់បន្ថយហានិភ័យគ្រោះមហន្តរាយ។
ជំនួយបំពេញបន្ថែម នឹងអាចពង្រីកជំនួយ សម្រាប់កិច្ចសហប្រតិបត្តិការក្នុងតំបន់ និងទំនិញសាធារណៈក្នុងតំបន់ និងសម្រាប់សកម្មភាពផ្លាស់ប្តូរយេនឌ័រ។ វាក៏នឹងផ្តល់ជំនួយរហ័ស (agile assistance) ក្នុងគ្រាមានអាសន្ន តាមរយៈច្រកឆ្លើយតបវិបត្តិរបស់ខ្លួន។
ស្របទៅនឹងដំណាក់កាល ADF រយៈពេល៤ឆ្នាំខាងមុខនេះ ធនាគារបាននិយាយថា ខ្លួនគ្រោងនឹងផ្តល់ប្រាក់កម្ចីសម្បទានចំនួន ១៦,៧ ពាន់លានដុល្លារ ជាមួយនឹងអត្រាការប្រាក់ទាបបំផុត និងរយៈពេលសងត្រលប់រយៈពេលវែង។
នៅក្នុងសេចក្តីថ្លែងការណ៍ ដាច់ដោយឡែកមួយដែលបានចេញផ្សាយកាលពីថ្ងៃសៅរ៍ ធនាគារបាននិយាយថា លោកប្រធាន Masatsugu Asakawa និងឧបនាយករដ្ឋមន្ត្រីកូរ៉េខាងត្បូង លោក Choi Sang Mok បានចុះហត្ថលេខាលើអនុស្សរណៈ នៃការយោគយល់គ្នាសម្រាប់ទឹកប្រាក់ចំនួន២ពាន់លានដុល្លារ ក្នុងសហហិរញ្ញប្បទានក្នុងរយៈពេលបីឆ្នាំខាងមុខ។
ធនាគារបាននិយាយថា “ការផ្តល់ហិរញ្ញប្បទានរួមគ្នានេះ នឹងគាំទ្រដល់គម្រោង ដែលទាក់ទងនឹងការប្រែប្រួលអាកាសធាតុ ក៏ដូចជាការដឹកជញ្ជូន ថាមពល កសិកម្ម ការអប់រំ កំណែទម្រង់អភិបាលកិច្ច សុខាភិបាល និងគម្រោងបច្ចេកវិទ្យាព័ត៌មាន និងទំនាក់ទំនង (ICT)៕
