ដោយៈ គង់ សូរិយា
ភ្នំពេញៈ មន្រ្តីជាន់ខ្ពស់រដ្ឋាភិបាល បានសម្រេចបង្កកការទិញលក់ដី នៅតាមគន្លងព្រែកជីកនេះ ចៀសវាងកុំឲ្យតម្លៃដីឡើងថ្លៃ។ នេះបើតាមការលើកឡើង របស់លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឍន៍កម្ពុជា។
លោក ស៊ុន ចាន់ថុល ក្នុងជំនួបជាមួយអ្នកសារព័ត៌មានកាលពីថ្ងៃទី៣ ខែឧសភាកន្លងទៅបានអំពាវនាវ ដល់ពលរដ្ឋទាំងអស់ ដែលរស់នៅតាមបណ្ដោយគន្លង ព្រែកជីកនេះឲ្យសហការ ដើម្បីឲ្យគម្រោងជាប្រវត្តិសាស្ត្រនេះ សម្រេចបានដោយជោគជ័យ។
លោកបញ្ជាក់ថា “យើងត្រូវធ្វើគម្រោងព្រែកជីកហ្វូណន តេជោឲ្យបាន! ចូលរួម កុំទៅទិញដីទុក”។ លោកបន្ថែមថា “បើដីមួយការ៉េមួយដុល្លារ លក់មួយដុល្លារទៅ កុំទៅលក់ឲ្យគម្រោង១០ដុល្លារ។ ដូច្នេះបងប្អូនខ្មែរយើង អាណិតរាជរដ្ឋាភិបាលផង ត្រូវចូលរួមជាមួយគ្នា កុំទៅយកចំណេញអីចឹង។ យើងត្រូវមានមោទនាភាពជាតិយើង”។
លោក ស៊ុន ចាន់ថុលបានឲ្យដឹងតា គន្លងព្រែកជីកហ្វូណនតេជោ មិនសូវប៉ះពាល់ច្រើន ដល់លំនៅឋានប្រជាពលរដ្ឋទេ ដោយសារតែគម្រោងនេះ ដើរតាមគន្លងព្រែកជីកចាស់ ដែលបោះបង់ចោលតាំងពីសម័យហ្វូណន ហើយភាគច្រើនឆ្លងកាត់តាមវាលស្រែ។
ចំពោះផលប៉ះពាល់ទៅប្រជាពលរដ្ឋ នៅតាមគន្លងព្រែកជីកនេះ លោកថា ក្រុមហ៊ុនវិនិយោគជាអ្នកចេញថ្លៃ ឬអាចរដ្ឋាភិបាលចេញមួយភាគ ដូចករណីផ្លូវល្បឿនលឿនភ្នំពេញ-បាវិត ដែលក្រុមហ៊ុនវិនិយោគចេញ៨០ភាគរយ ហើយរដ្ឋាភិបាលរ៉ាបរង២០ភាគរយ។
នៅពេលគម្រោងព្រែកជីកនេះចេញជារូបរាង ប្រជានេសាទក៏អាចចូលទៅនេសាទ នៅក្នុងព្រែកជីកនេះបានដែរ។ នេះបើតាមការបញ្ជាក់របស់លោក ស៊ុន ចាន់ថុល។
លោកថ្លែងថា “ក្រុមហ៊ុននេះគ្មានសិទ្ធហាមឃាត់ ប្រជាពលរដ្ឋខ្មែរ មិនឲ្យនេសាទនៅលើព្រែកជីក១៨០គីឡូម៉ែត្រនេះទេ”។ តាមការប៉ាន់ស្មានរបស់ក្រសួងកសិកម្ម រុក្ខាប្រមាញ់ និងនេសាទបញ្ជាក់ថា ក្នុងមួយឆ្នាំយ៉ាងតិចបានត្រី១៤០តោន។
ប៉ុន្តែសម្ដេចអគ្គមហាសេនាបតីតេជោ ហ៊ុន សែនធ្លាប់បានមានប្រសាសន៍ថា អាចបានច្រើនជាងនេះ ព្រោះយើងដាក់កូនត្រីគ្រប់មុខ នៅក្នុងហ្នឹង ទៅក្នុងទឹក១៨០គីឡូម៉ែត្រ ជម្រៅ៥,៤ម៉ែត្រ ទទឹង១០០ម៉ែត្រ គិតមើលទៅ មួយការ៉េបានត្រីប៉ុនណា។
លោកស៊ុន ចាន់ថុលបានបន្តថា ក្នុងពេលចរចាជាមួយក្រុមហ៊ុនចិន កម្ពុជាបានបញ្ជាក់ច្បាស់ណាស់ថា ក្រុមហ៊ុនមិនអាចយកកម្រៃពីពលរដ្ឋខ្មែរ ដែលចូលទៅនេសាទក្នុងព្រែកជីកនេះ។ គម្រោងព្រែកជីកនេះ នឹងត្រូវចំណាយប្រាក់សាងសង់១,៧ពាន់លានដុល្លារ ចំណាយពេលសាងសង់៤ឆ្នាំ។ គម្រោងនេះ ជាការវិនិយោគ ក្នុងភាពជាដៃគូរវាងរដ្ឋាភិបាល និងវិស័យឯកជន និងធ្វើឡើងដោយក្រុមហ៊ុនចិនមួយ៕