ដោយ: គង់ លាងហួរ
អន្តរជាតិ: ប្រទេសថៃ និង ឡាវ បានត្រៀមខ្លួនរួចជាស្រេចក្នុងការសម្ពោធបណ្តាញផ្លូវដែកថ្មីមួយ ដែលតភ្ជាប់ទីក្រុងបាងកក និងទីក្រុងវៀងចន្ទន៍ ខណៈដំណើរការតេស្តសាកល្បង គ្រោងធ្វើឡើងនៅថ្ងៃទី១៣ និងថ្ងៃទី១៤ ខែមិថុនានេះ។ នេះបើយោងតាមក្រុមហ៊ុនផ្លូវដែករដ្ឋថៃ (SRT)។
គំនិតផ្តួចផ្តើមនេះត្រូវបានរៀបចំឡើង ដើម្បីកែលម្អការតភ្ជាប់សម្រាប់អ្នកធ្វើដំណើរ និងសម្រួលដល់ការដឹកជញ្ជូនទំនិញរវាងប្រទេសទាំងពីរ ព្រមទាំងធ្វើឱ្យប្រទេសថៃ ក្លាយជាមជ្ឈមណ្ឌលដឹកជញ្ជូនដ៏សំខាន់នៅក្នុងតំបន់។
លោក Awirut Thongnet អគ្គនាយករងនៃក្រុមហ៊ុនផ្លូវដែករដ្ឋថៃ និងលោក Daochinda Siharath នាយកគ្រប់គ្រងផ្លូវដែកជាតិឡាវ បានកោះប្រជុំចាប់ពីថ្ងៃទី៥ ខែមិថុនាដល់ថ្ងៃទី៨ ខែមិថុនា ដើម្បីសម្រេចបានព័ត៌មានលម្អិត និងឈានទៅដល់ការបើកដំណើរការរថភ្លើងរវាងស្ថានីយ៍ Krung Thep Aphiwat នៅទីក្រុងបាងកក និងស្ថានីយ៍ Khamsavath នៅទីក្រុងវៀងចន្ទន៍។
ជាមួយគ្នានេះ អនុរដ្ឋមន្ត្រីក្រសួងដឹកជញ្ជូនថៃ លោក Surapong Piyachote បានណែនាំដល់ក្រុមហ៊ុនផ្លូវដែករដ្ឋថៃ(SRT) ត្រូវរៀបចំឱ្យបានហ្មត់ចត់ សម្រាប់ការបើកដំណើរការជាផ្លូវការនៃគម្រោងនេះ នៅខែកក្កដាខាងមុខ។
ខ្លឹមសារនៃកិច្ចប្រជុំនោះ ក៏បានគ្របដណ្តប់លើការអភិវឌ្ឍន៍ទីផ្សារទេសចរណ៍ ការផ្សាយពាណិជ្ជកម្ម ទំនាក់ទំនងសាធារណៈ និងយុទ្ធសាស្រ្តលើកកម្ពស់ ការដឹកជញ្ជូនទំនិញរវាងប្រទេសថៃ ប្រទេសឡាវ និងប្រទេសចិន ខណៈក្រុមការងារមួយ ត្រូវបានបង្កើតឡើងដើម្បីគ្រប់គ្រងការដឹកជញ្ជូនឆ្លងកាត់ព្រំដែន។
បន្ថែមពីនេះ ក្រុមហ៊ុនផ្លូវដែករដ្ឋថៃ (SRT) បានបន្តជួយបណ្តុះបណ្តាលដល់បុគ្គលិកផ្លូវដែកឡាវ នៅក្នុងប្រតិបត្តិការរថភ្លើង ការគ្រប់គ្រងស្ថានីយ៍ និងការលក់សំបុត្រ ដើម្បីធានាបាននូវការដាក់ឱ្យប្រើប្រាស់សេវាកម្មថ្មី ប្រកបដោយភាពរលូនល្អ៕ប្រភព: Thaiger៕
