ដោយ: គង់ លាងហួរ
សេអ៊ូល: ទិន្នន័យបានបង្ហាញថា ការនាំចេញទំនិញរបស់កូរ៉េខាងត្បូងទៅកាន់សហរដ្ឋអាមេរិក មានទំហំលើសពីការនាំចេញទៅកាន់ប្រទេសចិន នារយៈពេលប៉ុន្មានខែដំបូងដើម ឆ្នាំ២០២៤នេះ ដោយសហរដ្ឋអាមេរិក នឹងអាចក្លាយជាគោលដៅនាំចេញកំពូលទី១របស់កូរ៉េជាលើកដំបូងក្នុងរយៈពេល២២ឆ្នាំ។
ការនាំចេញរបស់កូរ៉េ ទៅកាន់សហរដ្ឋអាមេរិក មានទំហំទឹកប្រាក់ចំនួន៥៣,៣ពាន់លានដុល្លារ ចាប់ពីខែមករា ដល់ខែឧសភា ឆ្នាំ២០២៤ បើធៀបនឹងការនាំចេញរបស់កូរ៉េ ទៅកាន់ប្រទេសចិនដែលមានទំហំទឹកប្រាក់ចំនួន៥២,៦៩ពាន់លានដុល្លារ។ នេះបើយោងតាមទិន្នន័យពីស្ថិតិកូរ៉េ និងក្រសួងពាណិជ្ជកម្ម ឧស្សាហកម្ម និងថាមពល។
កាលពីឆ្នាំ២០២៣កន្លងទៅ ប្រទេសចិនគឺជាគោលដៅនាំចេញដ៏ធំបំផុតទី១ សម្រាប់ប្រទេសកូរ៉េ ដែលមានទំហំទឹកប្រាក់ចំនួន១២៤,៨១ពាន់លានដុល្លារ តាមពីក្រោយដោយសហរដ្ឋអាមេរិក ដែលមានទំហំទឹកប្រាក់ ចំនួន១១៥,៧១ពាន់លានដុល្លារ ដែលនេះគឺជាគម្លាតតូចបំផុត ក្នុងរយៈពេល១៩ឆ្នាំកន្លងមក។
នៅក្នុងរបាយការណ៍ថ្មីៗនេះ ធនាគារកណ្តាលកូរ៉េបានព្យាក រណ៍ថា ការនាំចេញរបស់កូរ៉េ ទៅកាន់សហរដ្ឋអាមេរិក នឹងបន្តកើនឡើង ដែលជំរុញដោយការប្រើប្រាស់ដ៏រឹងមាំ ក្នុងចំណោមពលរដ្ឋអាមេរិក និងការពង្រីកការវិនិយោគ របស់ក្រុមហ៊ុនកូរ៉េនៅក្នុងសហរដ្ឋអាមេរិក។
