ដោយ: គង់ លាងហួរ
អន្តរជាតិ: ក្រុមអ្នកស្រាវជ្រាវអាមេរិកអះអាងថា ប្រទេសវៀតណាមបាន និងកំពុងបង្កើនការបូមខ្សាច់ និងពន្លឿនការចាក់ដីបំពេញនៅក្នុងសមុទ្រចិនខាងត្បូង ដោយបង្កើតបានជាកោះថ្មីមួយ ដែលមានទំហំស្ទើរតែដូចកាលពី២ឆ្នាំមុន។
គិតចាប់តាំងពីខែវិច្ឆិកា ឆ្នាំ២០២៣រហូតមកទល់ពេលនេះ វៀតណាមបានបង្កើតដែនដីថ្មី ឬកោះដែលមានទំហំចំនួន២៨០ហិកតា បើប្រៀបធៀបនឹងកោះ ទំហំ១៦៣,៥ហិកតា ដែលត្រូវបានបង្កើតឡើង ក្នុងរយៈពេល១១ខែដំបូងនៃឆ្នាំ២០២៣ និងកោះទំហំ១៤០,៤២ហិកតាក្នុងឆ្នាំ២០២២។ នេះបើយោងតាមរបាយការណ៍ថ្មីមួយពីមជ្ឈមណ្ឌលសម្រាប់ការសិក្សាយុទ្ធសាស្ត្រ និងអន្តរជាតិនៃគំនិតផ្តួចផ្តើមតម្លាភាពដែនសមុទ្រអាស៊ី។
សមុទ្រចិនខាងត្បូង គឺជាផ្លូវទឹកមួយក្នុងចំណោមផ្លូវទឹក ដែលមានការប្រកួតប្រជែងខ្លាំងបំផុត នៅលើពិភពលោក ខណៈកប៉ាល់ពាណិជ្ជកម្ម ដែលមានទំហំទឹកប្រាក់ជាង៣ទ្រីលានដុល្លារ ត្រូវធ្វើចរាចរណ៍ឆ្លងកាត់ផ្លូវទឹកនេះក្នុងមួយឆ្នាំៗ។ សកម្មភាពទាំងនេះ បានបង្កើនការភ័យខ្លាចថា តំបន់សមុទ្រចិនខាងត្បូងនេះ កំពុងក្លាយជាចំណុចក្តៅ ដែលអាចផ្តល់ផលវិបាកយ៉ាងធ្ងន់ធ្ងរ នៅក្នុងកិច្ចការពិភពលោក។
លោក Jay Batongbacal អ្នកជំនាញខាងដែនសមុទ្រហ្វីលីពីន បានលើកឡើងថា “ការកសាងកោះរបស់វៀតណាម សំដៅពង្រឹងការការពាររបស់ខ្លួន បន្ទាប់ពីទីតាំងឈរជើងរបស់ខ្លួន នៅសមុទ្រចិនខាងត្បូង ត្រូវបានគំរាមកំហែងដោយចិន ខណៈទីក្រុងហាណូយបានខិតខំប្រឹងប្រែងរុករក និងអភិវឌ្ឍន៍ប្រេងនៅទីនោះ”។
