ដោយ: គង់ លាងហួរ
អន្តរជាតិ: សហរដ្ឋអាមេរិក និងថ្នាក់ដឹកនាំក្រុមប្រទេស G7 បានអះអាងពីការប្តេជ្ញាចិត្ត ក្នុងការពន្លឿនការវិនិយោគលើហេដ្ឋារចនាសម្ព័ន្ធប្រកបដោយនិរន្តរភាព តាមរយៈក្របខណ្ឌភាពជាដៃគូសម្រាប់ហេដ្ឋារចនាសម្ព័ន្ធ និងការវិនិយោគសកល ដែលហៅកាត់ថា(PGI)។
ការប្តេជ្ញាចិត្តនេះបានប្រកាសឡើងក្នុងអំឡុងកិច្ចប្រជុំកំពូលប្រចាំឆ្នាំរវាងថ្នាក់ដឹកនាំប្រទេសសេដ្ឋកិច្ចជឿនលឿនទាំង៧ ដែលរៀបចំឡើងនៅទីក្រុង Fasano ប្រទេសអុីតាលី ចាប់ពីថ្ងៃទី១៣ ដល់ថ្ងៃទី១៤ ខែមិថុនា។
គិតរហូតមកដល់បច្ចុប្បន្ន សហរដ្ឋអាមេរិកបានកៀរគរទុនវិនិយោគជាង៦០ពាន់លានដុល្លារក្រោមភាពជាដៃគូ PGI តាមរយៈការផ្តល់ហិរញ្ញប្បទានសហព័ន្ធ ជំនួយ និងការវិនិយោគរបស់វិស័យឯកជនក្នុងរយៈពេល៣ឆ្នាំចុងក្រោយនេះ។
ក្នុងកិច្ចប្រជុំនោះ ទីក្រុងវ៉ាសុីនតោន បានប្តេជ្ញាបន្តខិតខំកៀរគរទុនវិនិយោគរបស់ខ្លួនឱ្យកើនដល់ប្រមាណ២០០ពាន់លានដុល្លារនៅត្រឹមឆ្នាំ២០២៧ ខណៈក្រុមប្រទេស G7 ទាំងមូលបានដាក់គោលដៅសរុបរួមគ្នាក្នុងទំហំទឹកប្រាក់ជាង៦០០ពាន់លានដុល្លារ។
ដើម្បីគាំទ្រដល់ផែនការនេះ ប្រទេសអុីតាលី ដែលជាម្ចាស់ផ្ទះនៃកិច្ចប្រជុំនៅឆ្នាំ២០២៤នេះ បានប្រកាសចូលរួមជាផ្លូវការជាមួយសហរដ្ឋអាមេរិក និងសម្ព័ន្ធច្រករបៀង Lobito ដែលដឹកនាំដោយសហភាពអឺរ៉ុប ខណៈអុីតាលីបានប្តេជ្ញាកៀរគរទុនវិនិយោគឱ្យបានយ៉ាងតិចចំនួន៣២០លានដុល្លារ ដើម្បីផ្តល់ហិរញ្ញប្បទានដល់គម្រោងសាងសង់ផ្លូវដែកថ្មីឆ្លងទ្វីបអាហ្វ្រិក ដែលមានប្រវែង៨០០គីឡូម៉ែត្រ។
ជាមួយគ្នានេះ ប្រទេសអង់គ្លេសក៏បានប្រកាសពីការប្តេជ្ញាចិត្តថ្មីក្នុងការបោះទុនចំនួនជាង៥០លានដុល្លារដើម្បីរួមចំណែកដល់គម្រោងហេដ្ឋារចនាសម្ព័ន្ធថាមពលស្អាតនៅអាហ្វ្រិក និងគម្រោងបញ្ជូនថាមពល ក៏ដូចជាការស្ទង់ភូមិសាស្ត្រតាមបណ្តោយច្រករបៀង Lobito។
ច្រករបៀង Lobito គឺជាច្រកផ្លូវដ៏សំខាន់មួយសម្រាប់បម្រើឱ្យការដឹកជញ្ជូនទំនិញឧស្សាហកម្ម និងទំនិញកសិកម្ម ដែលផលិតនៅក្នុងតំបន់អាហ្វ្រិកកណ្តាល និងអាហ្វ្រិកខាងត្បូង។ ច្រករបៀងនេះបានផ្តល់នូវចម្ងាយធ្វើដំណើរខ្លីជាងមុន ដែលជួយពន្លឿនការនាំចេញ និងការនាំចូលជាមួយទ្វីបអឺរ៉ុប៕ប្រភព:White House ៕
