ដោយ: គង់ លាងហួរ
អន្តរជាតិ: គម្រោងសាងសង់ស្ពានថ្មីមួយតភ្ជាប់រវាងសហរដ្ឋអាមេរិក និងកាណាដានៅលើទន្លេ Detroit ជិតបញ្ចប់រួចរាល់ហើយ បន្ទាប់ពីកម្មករបានដំឡើងធ្នឹមបណ្តោះអាសន្ន ដែលនឹងតភ្ជាប់កំណាត់ស្ពានទាំងសងខាង ។
ស្ពាននេះមានឈ្មោះថា “ស្ពានអន្តរជាតិ Gordie Howe”។ កំណាត់ទាំងសងខាងនៃស្ពាននេះរំពឹងថា នឹងត្រូវបានតភ្ជាប់គ្នារួចរាល់ជាស្ថាពរនៅដំណាច់ខែមិថុនានេះ បន្ទាប់ពីចំណាយរយៈពេលសាងសង់អស់ជិត៦ឆ្នាំកន្លងមក។
នៅពេលការបញ្ចប់រួចរាល់នាពេលដ៏ខ្លីខាងមុខ ស្ពាននេះនឹងក្លាយជាស្ពានដែលមានខ្សែកាបយោងវែងបំផុតនៅតំបន់អាមេរិកខាងជើង។ ស្ពាននេះនឹងតភ្ជាប់ក្រុង Detroit ក្នុងរដ្ឋ Michigan សហរដ្ឋអាមេរិក ជាមួយនឹងទីក្រុង Windsor ក្នុងខេត្ត Ontario ប្រទេសកាណាដា។
-->
លោក Charl van Niekerk នាយកប្រតិបត្តិនៃអាជ្ញាធរស្ពាន Windsor-Detroit (WDBA) ដែលដឹកនាំការសាងសង់បានថ្លែងថា “ការសម្រេចឱ្យបានជោគជ័យនូវការតភ្ជាប់កំណាត់ស្ពានទាំងសងខាងគឺជារឿងសំខាន់នៅក្នុងដំណើរការនៃគម្រោងស្ពានអន្តរជាតិ Gordie Howe”។
នៅពេលត្រូវបានតភ្ជាប់រួចរាល់ បង្គោលស្ពានទាំង២ដើម នឹងមានគម្លាតពីគ្នាប្រមាណ៨៥៣ម៉ែត្រ ដែលធ្វើឱ្យស្ពាននេះក្លាយជាស្ពានខ្សែកាបវែងជាងគេបំផុតនៅតំបន់អាមេរិកខាងជើង និងជាស្ពានខ្សែកាបវែងជាងគេទី១០នៅលើពិភពលោក។
ស្ពានយោងដោយខ្សែកាបមួយនេះប្រើប្រាស់ខ្សែកាបត្រង់ ដែលតភ្ជាប់ដោយផ្ទាល់ពីប៉មបង្គោលស្ពានទៅកាន់ជាយបណ្តោយស្ពាន។ បច្ចុប្បន្ន ស្ពានយោងដោយខ្សែកាបបានក្លាយជាជម្រើសសំណង់ដ៏ពេញនិយម ព្រោះការសាងសង់មានល្បឿនលឿន និងចំណាយតិចជាងស្ពានដទៃទៀត។
ស្ពាននេះត្រូវបានរចនាឡើងដោយក្រុមហ៊ុនស្ថាបត្យកម្ម AECOM Gordie Howe ដែលរួមបញ្ចូលគន្លងផ្លូវចំនួន៦ខ្សែ សម្រាប់បម្រើឱ្យចរាចរណ៍រថយន្ត ក៏ដូចជាផ្លូវជិះកង់ និងផ្លូវដើរផងដែរ។ ស្ពានអន្តរជាតិ Gordie Howe មានប្រវែងជាង២,៤គីឡូម៉ែត្រ និងមានកំពស់៤៦ម៉ែត្រពីលើទឹកទន្លេDetroit៕ប្រភព: Newsweek៕
