ដោយ: គង់ លាងហួរ
អន្តរជាតិ: មហាភេរវកម្មរបស់ក្រុមអាល់កៃដានៅថ្ងៃទី១១ ខែកញ្ញា ឆ្នាំ២០០១ បានបុកកម្ទេចគម្រោង World Trade Center និងអគារភ្លោះនៅទីក្រុងញូវយ៉កឱ្យក្លាយជាគំនរផេះផង់។ ក្រោយមក សហរដ្ឋអាមេរិកបានចាប់ផ្តើមធ្វើការជួសជុល ហេដ្ឋារចនាសម្ព័ន្ធឡើងវិញ រួចជាមួយនឹងការសាងសង់អគារពាណិជ្ជកម្ម ពិភពលោកថ្មីផងដែរ។
អគារថ្មីនេះមានឈ្មោះហៅថា One World Trade Center ដែលបានចាប់ផ្តើមសាងសង់នៅក្នុងឆ្នាំ២០០៦ និងបើកសម្ពោធនៅឆ្នាំ២០១៤ ដែលមានកម្ពស់សរុប៥១៤ម៉ែត្រ និងមានចំនួន១០៤ជាន់ និងចំណាយទុនវិនិយោគ សាងសង់អស់ជិត៤ពាន់លានដុល្លារ។
គម្រោងសាងសង់អគារខ្ពស់កប់ពពកមួយនេះបានប្រើប្រាស់ដែកថែបរចនាសម្ព័ន្ធជាង៤០.០០០តោន។ អ្វីកាន់តែពិសេសនោះគឺនៅត្រង់ថា ជណ្តើរយន្តនៅក្នុងអគារ One World Trade Center អាចធ្វើដំណើរបានក្នុងល្បឿន១០,១៦ម៉ែត្រក្នុងមួយវិនាទី។
ក្រោយពីទទួលបានមេរៀនដ៏ជូរចត់ពីការដួលរលំនៃអគារភ្លោះកាលពីឆ្នាំ២០០១ អ្នកអភិវឌ្ឍន៍បានរចនាអគារ One World Trade Center ដោយប្រុងប្រយ័ត្នបំផុត ដើម្បីធ្វើយ៉ាងណាឱ្យអគារនេះក្លាយទៅជាអគារការិយាល័យដែលមានសុវត្ថិភាពបំផុតនៅក្នុងពិភពលោក។ អ្នកអភិវឌ្ឍន៍បានប្រើប្រាស់បេតុងដែលមានភាពធន់ខ្ពស់ ដែលអាចទប់ទល់នឹងសម្ពាធច្រើនជាងបេតុងស្តង់ដារចំនួន៧ដង និងដែកសរសៃដ៏រឹងមាំបំផុត។
