ដោយៈ គង់ សូរិយា
ព្រះសីហនុៈ រយៈពេលជាង៤ខែ បានកន្លងផុត បន្ទាប់ពីចាប់តាំងពីកម្មវិធីជំរុញការវិនិយោគពិសេស សម្រាប់ខេត្តព្រះសីហនុ ត្រូវបានប្រកាស ដើម្បីដោះស្រាយបញ្ហាសំណង់ជាប់គាំង នៅក្នុងខេត្ត និងដើម្បីជួយតំបន់នេះ បន្តដំណើរឆ្ពោះទៅរកការអភិវឌ្ឍន៍ជាបន្តរបស់ខ្លួន។
ដូច្នេះតើមានការអភិវឌ្ឍន៍ថ្មីអ្វីខ្លះ ហើយតើខេត្តព្រះសីហនុ អាចនៅតែបំពេញសក្តានុពលរបស់ខ្លួន និងធ្វើជាបង្គោលនៃការវិនិយោគ និងការអភិវឌ្ឍន៍សម្រាប់កម្ពុជាបានដែរ ឬយ៉ាងណា?។
-->
កម្មវិធីជំរុញការវិនិយោគពិសេស សម្រាប់ខេត្តព្រះសីហនុ ការធ្វើបច្ចុប្បន្នភាពពាក់កណ្តាល ឆ្នាំ២០២៤ គិតត្រឹមខែមិថុនា ឆ្នាំ២០២៤ មានគម្រោងចំនួន៤១ នៅខេត្តព្រះសីហនុ មានលក្ខណៈសម្បត្តិគ្រប់គ្រាន់ សម្រាប់ទទួលបានការលើកទឹកចិត្ត ក្រោមកម្មវិធីវិនិយោគ ដែលផ្តួចផ្តើមដោយសម្តេចធិបតីនាយករដ្ឋមន្ត្រី ហ៊ុន ម៉ាណែត នៅដើមឆ្នាំនេះ។
កម្មវិធីនេះត្រូវបានបង្កើតឡើង ដើម្បីដោះស្រាយបញ្ហាសំណង់សំណង់ជាប់គាំង និងត្រូវបានបោះបង់នៅក្នុងទីក្រុងឆ្នេរនេះ ហើយក្រុមការងារជំរុញការវិនិយោគ ខេត្តព្រះសីហនុ បានបញ្ជាក់ថា គម្រោងថ្មីចំនួន១៤ ដែលត្រូវបានអនុម័តពីវិនិយោគិនបរទេស និងក្នុងស្រុក មានតម្លៃប្រមាណ៧៣៧លានដុល្លារអាមេរិក នឹងទទួលបានអត្ថប្រយោជន៍ ពីការលើកទឹកចិត្តពិសេស ( បន្ថែមលើគម្រោងចំនួន២៧ ដែលមានលក្ខណៈសម្បត្តិគ្រប់គ្រាន់សម្រាប់កញ្ចប់លើកទឹកចិត្ត) ។
គម្រោងទាំងនេះរួមមាន ការបង្កើតឧទ្យានកសិឧស្សាហកម្មជាតិ គម្រោងសណ្ឋាគារផ្កាយប្រាំ កាស៊ីណូ គម្រោងរមណីយដ្ឋាន ខុនដូ និងការិយាល័យពហុមុខងារ ខណៈដែលគម្រោងទាំងប្រាំពីរនេះ មានគោលបំណងស្តារឡើងវិញ នូវសំណង់ដែលបានជាប់គាំង។
នាពេលខាងមុខ ស្ថានភាពនៃគម្រោងបន្ថែមចំនួន២៣ទៀត នឹងត្រូវបានពិនិត្យដោយក្រុមការងារ។ នេះជាវឌ្ឍនភាព ប៉ុន្តែរដ្ឋាភិបាលបានកំណត់អគារសង់ មិនទាន់រួចរាល់រហូតដល់ចំនួន ៣៦២ នៅក្រុងព្រះសីហនុ នៅដើមឆ្នាំនេះ ដែលនេះបង្ហាញពីវឌ្ឍនភាពយឺត។
តើការលើកទឹកចិត្តពន្ធនឹងគ្រប់គ្រាន់ដែរឬទេ?
CamEd Business Review ចេញផ្សាយនៅខែមិថុនា ឆ្នាំ២០២៤ បានលើកឡើងថា ការលើកទឹកចិត្តពន្ធនៅក្រុងព្រះសីហនុ ដែលជាផ្នែកនៃកម្មវិធីវិនិយោគ របស់រដ្ឋាភិបាលដើម្បីជំរុញកំណើនសេដ្ឋកិច្ចសម្រាប់ប្រទេស ផ្តល់ដំណោះស្រាយសម្រាប់រយៈពេលខ្លីប៉ុណ្ណោះ ប៉ុន្តែមិនបានកំណត់ម្រូវការដោះស្រាយជាមូលដ្ឋានរបស់អ្នកវិនិយោគទេ។
អត្ថបទនេះបានបង្ហាញទៀតថា អ្នកវិនិយោគកំពុងស្វែងរកការកំណត់ពន្ធរយៈពេលវែង ប៉ុន្តែខេត្តព្រះសីហនុដើរលើផ្លូវត្រូវ។
វិនិយោគិននឹងស្វែងរកអត្ថប្រយោជន៍ រយៈពេលវែង ហើយការលើកទឹកចិត្តបច្ចុប្បន្ន ប្រហែលជាមិនផ្តល់នូវការធានាចាំបាច់ សម្រាប់ការប្តេជ្ញាចិត្តរយៈពេលវែងនោះទេ ដូច្នេះទំហំនៃការលើកទឹកចិត្តពន្ធ នាពេលបច្ចុប្បន្ន សម្រាប់ការបន្តវិនិយោគនៅតែមិនទាន់ប្រាកដប្រជា។
ផែនការមេតំបន់សេដ្ឋកិច្ចពហុបំណងខេត្តព្រះសីហនុ
ទន្ទឹមនឹងនេះ ផែនការមេក្នុងការអភិវឌ្ឍន៍ ខេត្តព្រះសីហនុឱ្យទៅជាតំបន់សេដ្ឋកិច្ចពិសេសគំរូ ពហុបំណងក៏ជិតបញ្ចប់ផងដែរ ដែលយោងតាមសារព័ត៌មានមួយចំនួន។
ការរៀបចំផែនការមេ នៃតំបន់សេដ្ឋកិច្ចពិសេសខេត្តព្រះសីហនុ បានដំណើរការជាយូរណាស់មកហើយ ហើយផែនការអភិវឌ្ឍន៍ប្រកបដោយមហិច្ឆតានេះ មានគោលបំណងចង់ឃើញចំនួនប្រជាជន រស់នៅក្នុងទីក្រុងកើនឡើងពីប្រមាណ៣០០,០០០ ដល់មួយលាននាក់ ប្រសិនបើផែនការនេះ ត្រូវបានអនុម័ត និងអនុវត្តន៍បានជោគជ័យ។
ផែនការមេនេះ កំពុងត្រូវបានបង្កើតឡើងដោយមានការគាំទ្រពីវិទ្យាស្ថានរៀបចំផែនការទីក្រុង និងរចនាទីក្រុង Shenzhen (UPDIS) របស់ប្រទេសចិន ហើយតំបន់សេដ្ឋកិច្ចពិសេសពហុបំណង មានមហិច្ឆតាក្លាយជាតំបន់សេដ្ឋកិច្ច ដ៏សំខាន់មួយ នៅក្នុងតំបន់អាស៊ីអាគ្នេយ៍ ដែលដោយប្រើប្រាស់បច្ចេកវិទ្យាឆ្លាតវៃ និងបម្រើជាតំបន់ឧស្សាហកម្មទំនើប បម្រើខ្សែសង្វាក់ផលិតកម្មក្នុងតំបន់ និងពិភពលោក។
ផែនការនេះ ត្រូវបានផ្សារភ្ជាប់យ៉ាងជិតស្និទ្ធ ទៅនឹងសេចក្តីប្រាថ្នារបស់កម្ពុជា ក្នុងការក្លាយជាមជ្ឈមណ្ឌលទំនើប ជាមួយការពង្រីកកំពង់ផែ សមុទ្រទឹកជ្រៅ នៅខេត្តព្រះសីហនុ ការអភិវឌ្ឍន៍គម្រោងព្រែកជីកហ្វូណនតេជោ និងផ្លូវសមុទ្រផ្សេងទៀតដែលកំពុងត្រូវបានពង្រីក និងអភិវឌ្ឍន៍។
ការប្រែក្លាយខេត្តព្រះសីហនុ ទៅជាតំបន់សេដ្ឋកិច្ចពិសេសពហុបំណង ក៏ពឹងផ្អែកលើការថែទាំជាបន្តបន្ទាប់ និងការពង្រឹងផ្លូវល្បឿនលឿនភ្នំពេញ -ព្រះសីហនុ ការបង្កើនជើងហោះហើរក្នុងតំបន់ និងអន្តរជាតិ រួមទាំងការអភិវឌ្ឍន៍ឆ្នេរសមុទ្រប្រកបដោយចីរភាព ដើម្បីក្លាយជាបង្គោលនៃការវិនិយោគ និងទេសចរណ៍។
គណៈកម្មាធិការ ដែលនៅពីក្រោយផែនការមេនេះ បាននិយាយថា “ផែនការមេដ៏ទូលំទូលាយរបស់យើង មានគោលបំណងទាញ យកអត្ថប្រយោជន៍ពិសេសទាំងនេះ ដើម្បីបង្កើតតំបន់សេដ្ឋកិច្ចរីកចម្រើន ដែលគាំទ្រដល់កំណើនប្រកបដោយចីរភាព លើកកំពស់ជីវភាពរស់នៅ និងទាក់ទាញការវិនិយោគជាអន្តរជាតិ”។
នេះមិនត្រឹមតែជាដំណើរផ្លាស់ប្តូរ ប្រកបដោយមហិច្ឆិតាសម្រាប់ខេត្តព្រះសីហនុប៉ុណ្ណោះទេ ប៉ុន្តែវាត្រូវការគាំទ្រ ជំនឿ និងការវិនិយោគហិរញ្ញវត្ថុដ៏ធំ សម្រាប់តំបន់នេះ ដែលអាចជំរុញកំណើនសេដ្ឋកិច្ច ក៏ដូចជាការអភិវឌ្ឍន៍សង្គម។
ចក្ខុវិស័យរយៈពេលវែង របស់តំបន់សេដ្ឋកិច្ចពិសេសពហុបំណងខេត្តព្រះស៊ីហនុ មានដូចជា
• ច្រកទ្វារអន្តរជាតិ (ផ្លូវគោក ផ្លូវសមុទ្រ និងផ្លូវអាកាស)
• បម្រើជាបង្គោលអភិវឌ្ឍន៍ជាតិ
• ប្រែក្លាយទៅជាទីក្រុង ក្នុងតំបន់អាស៊ានដ៏ទាក់ទាញ។
កាលពីថ្ងៃទី១៧ ខែមិថុនា ឆ្នាំ២០២៤ លោក តឹករ៉េត សំរេច រដ្ឋលេខាធិការប្រចាំការ ក្រសួងរៀបចំដែនដី នគរូបនីយកម្ម និងសំណង់ និងដោយមានការចូលរួម ពីក្រសួងទេសចរណ៍ ក្រសួងបរិស្ថាន និងកម្មវិធីជំរុញការវិនិយោគ ពិសេសខេត្តព្រះសីហនុ ឆ្នាំ២០២៤ បានធ្វើបច្ចុប្បន្នភាព និងពិភាក្សាអំពីការអភិវឌ្ឍន៍តំបន់ និងផែនការសកម្មភាពបន្ថែមទៀត សម្រាប់គម្រោងអភិវឌ្ឍន៍នៅតាមតំបន់អូរត្រេះ និងតំបន់អូរត្រជាក់ចិត្ត ដើម្បីលើកកម្ពស់វិស័យទេសចរណ៍ ស្របតាមចក្ខុវិស័យរយៈពេលវែង ដោយប្រែក្លាយទីតាំងទាំងនេះ ទៅជាមជ្ឈមណ្ឌលសមាហរណកម្មក្នុងតំបន់។
នៅថ្ងៃដដែលនោះ លោក ជា កុកហុង ប្រធានលេខាធិការដ្ឋានក្រុមការងារបច្ចេកទេសអន្តរក្រសួង សម្របសម្រួលការអភិវឌ្ឍន៍ និងអនុវត្តផែនការមេ ដើម្បីអភិវឌ្ឍខេត្តព្រះសីហនុ ទៅជាតំបន់សេដ្ឋកិច្ចពិសេសពហុបំណង បានចូលរួមកិច្ចប្រជុំក្រុមការងារបច្ចេកទេសហិរញ្ញវត្ថុ (TWG) លើកទី៥ ដឹកនាំដោយ លោករស់ សីលវ៉ា រដ្ឋលេខាធិការ និងជាប្រធានមជ្ឈមណ្ឌលហិរញ្ញវត្ថុ ក្រុមការងារដើម្បីពិភាក្សា អំពីសំណើអាជីវកម្មនៃការបង្កើត មជ្ឈមណ្ឌលហិរញ្ញវត្ថុអន្តរជាតិ (IFC) នៅខេត្តព្រះសីហនុ។
ធ្វើឱ្យមានភាពងាយកាន់តែងាយស្រួល ក្នុងការធ្វើដំណើរទៅកាន់ខេត្តព្រះសីហនុក្នុងខែមិថុនា សម្តេចធិបតីហ៊ុន ម៉ាណែត នាយករដ្ឋមន្រ្តីកម្ពុជា បានបញ្ចប់ដំណើរទស្សនកិច្ចផ្លូវការលើកដំបូង ទៅកាន់ប្រទេសសិង្ហបុរី និងបានស្នើសមភាគីសិង្ហបុរី ពង្រីកជើងហោះហើរមកកាន់ប្រទេសកម្ពុជា ដោយបើកការហោះហើរត្រង់ពីទីក្រុងសិង្ហបុរី ទៅខេត្តព្រះសីហនុ។
លោកបានថ្លែងក្នុងវេទិកាធុរកិច្ចកម្ពុជា -សិង្ហបុរីថា កម្មវិធីពិសេស ដើម្បីជំរុញការវិនិយោគ នៅខេត្តព្រះសីហនុ ឆ្នាំ២០២៤ បានផ្តល់អត្ថប្រយោជន៍ពិសេស ដល់អ្នកវិនិយោគលើសពីច្បាប់ស្តីពីការវិនិយោគ។
លោកបានសង្កត់ធ្ងន់ថា “ច្បាប់ថ្មីស្តីពីការវិនិយោគ ផ្តល់នូវការលើកទឹកចិត្ត រួមទាំងការអនុគ្រោះពន្ធរហូត ដល់១៥ឆ្នាំសម្រាប់វិស័យអាទិភាពជាច្រើន រួមជាមួយនឹងការធានាការវិនិយោគ និងការការពារដោយមិនមានការរើសអើង រវាងអ្នកវិនិយោគក្នុងស្រុក និងបរទេស និងគ្មានការរឹតបន្តឹងលើការផ្ទេរប្រាក់ចំនេញ និងដើមទុន”។
ក្រុមហ៊ុន Air Asia Cambodia ក៏បានប្រកាសថា ចាប់ពីថ្ងៃទី៣ ខែកក្កដា ឆ្នាំ២០២៣ ក្រុមហ៊ុននឹងដំណើរការជើងហោះហើររវាងក្រុងព្រះសីហនុ និងទីក្រុងគូឡាឡាំពួ ប្រទេសម៉ាឡេស៊ី បីដងក្នុងមួយសប្តាហ៍ ។
ការអភិវឌ្ឍការតភ្ជាប់តាមសមុទ្រ “ទីផ្សារមួយ ទិសដៅបី”
នៅក្នុងកម្មវិធី CVTEC-Trat Business Roadshow 2024 ដែលបានប្រារព្វឡើង នៅក្នុងខែមិថុនា ថៃ កម្ពុជា និងវៀតណាមបានពិភាក្សា អំពីកិច្ចសហប្រតិបត្តិការ លើការបង្កើតផ្លូវតភ្ជាប់សមុទ្ររវាង ខេត្តត្រាត ប្រទេសថៃជាមួយខេត្តព្រះសីហនុ និងខេត្ត Kiên Giang ប្រទេសវៀតណាម។
ផ្លូវសមុទ្រនឹងតភ្ជាប់កោះនានា ដើម្បីជំរុញការវិនិយោគ ពាណិជ្ជកម្ម ទេសចរណ៍ និងការប្រជុំ ការលើកទឹកចិត្ត សន្និសីទ និងការតាំងពិព័រណ៍ផ្សេងក្រោមពាក្យស្លោក “ទីផ្សារមួយ ទិសដៅបី”។ គំនិតផ្តួចផ្តើមថ្មីនេះ មិនត្រឹមតែបម្រើជាផ្លូវសេដ្ឋកិច្ចទំនើបប៉ុណ្ណោះទេ ប៉ុន្តែជាផ្លូវទេសចរណ៍ដ៏ទាក់ទាញ ដើម្បីផ្សព្វផ្សាយពីធម្មជាតិ និងវប្បធម៌ដ៏ស្រស់ស្អាត។
តំណាងទាំងវិស័យឯកជន និងរដ្ឋនៃប្រទេសទាំងបីបានចុះហត្ថលេខា លើអនុស្សារណៈនៃការយោគយល់គ្នា ដើម្បីរិះរកមធ្យោបាយបន្ថែម ដើម្បីបើកផ្លូវសមុទ្រនេះ ក្នុងរដូវកាលទេសចរណ៍ចាប់ពីខែវិច្ឆិកា ឆ្នាំ២០២៤៕
