ដោយ៖ គង់ សូរិយា
ភ្នំពេញ៖ ក្នុងការបង្កើនទំនាក់ទំនងលើវិស័យពាណិជ្ជកម្ម ទំនាក់ទំនងនយោបាយល្អមានសារៈសំខាន់ណាស់ ដើម្បីបើកផ្លូវឲ្យមានការបង្កើនទំហំពាណិជ្ជកម្មនិងវិនិយោគកើនគឡើង។
លោកឧកញ៉ាលឹម ហេងអនុប្រធានសភាពាណិជ្ជកម្មកម្ពុជាបានថ្លែងឲ្យដឹងនាថ្ងៃទី៥ ធ្នូនេះថា ដើម្បីឲ្យទំនាក់ទំនងពាណិជ្ជកម្ម និងបង្កើនការវិនិយោគ រវាងប្រទេសនិងប្រទេសល្អប្រសើរ ទាល់តែទំនាក់ទំនងក្នុងកម្រិតនយោបាយមានភាពល្អប្រសើរ។ ជាក់ស្តែងដូចជា ប្រទេសកម្ពុជា និងបង់ក្លាដេសបានបង្ហាញពីការពង្រឹង និងពង្រីកទំហំពាណិជ្ជកម្ម និងវិនិយោគទៅវិញទៅមកល្អប្រសើរ ទាំងសងខាង ទាល់តែប្រមុខរដ្ឋាភិបាលប្រទេសទាំងពីរមានការសហការគ្នា ក្នុងកម្រិតនយោបាយល្អប្រសើរ។
លោកឧកញ៉ាបានបន្តថា ដូចជាសហរដ្ឋអាមេរិកជាដើម ពួកគេមានទំនាក់ទំនងជាមួយបណ្តាប្រទេសក្នុងអាស៊ានល្អ ទើបកម្រិតនៃការធ្វើពាណិជ្ជកម្មនិងវិនិយោគទៅវិញទៅមកកើនឡើង ហើយការដែលសហរដ្ឋអាមេរិកមកចាប់ដៃ និងបង្កើនកិច្ចសហប្រតិបត្តិការជិតស្និទ្ឋជាមួយអាស៊ាន ដោយសារផលប្រយោជន៍ពាណិជ្ជកម្មរបស់ពួកគេ។
លោកឧកញ៉ាលឹម ហេងបានបន្តថា “កម្ពុជាបង់ក្លាដេសបានសន្យាពង្រីកទំហំពាណិជ្ជកម្ម និងវិនិយោគទៅវិញទៅមក បន្ទាប់ពីកម្រិតទំនាក់ទំនងនយោបាយរវាងប្រមុខ ប្រទេសទាំងពីរកាន់តែមានភាពប្រសើរឡើង។ លោកឧកញ៉ាបានបន្ថែមថា “នយោបាយត្រូវដើរមុន ទើបសេដ្ឋកិច្ចដើរតាមក្រោយ ព្រោះបើទំនាក់ទំនងនយោបាយមិនល្អទេ ទំនាក់ទំនងពាណិជ្ជកម្ម និងវិនិយោគក៏មិនដើរល្អដែរ”៕
