ដោយ: គង់ លាងហួរ
អន្តរជាតិ: ថ្វីត្បឹតតែភាពតានតឹងផ្នែកភូមិសាស្ត្រនយោបាយរវាងប្រទេសហ្វីលីពីននិងប្រទេសចិនកំពុងបន្តកើនឡើងកំដៅយ៉ាងណាក្តីក៏ប៉ុន្តែក្រុមសេដ្ឋវិទូជឿជាក់ថាទីក្រុងប៉េកាំងនឹងមិនចាត់វិធានការទប់ស្កាត់សកម្មភាពដោះដូរពាណិជ្ជកម្មជាមួយទីក្រុងម៉ានីលនោះទេដោយសារចិននៅតែជាដៃគូពាណិជ្ជកម្មកំពូលរបស់ហ្វីលីពីន។
លោក Miguel Chanco សេដ្ឋវិទូនៅស្ថាប័នជំនាញសេដ្ឋកិច្ច Pantheon Macroeconomics បានអះអាងថា “ខ្ញុំមិនទាន់មើលឃើញសញ្ញាណាមួយ ដែលបង្ហាញថា ប្រទេសចិនមានចេតនាកាត់បន្ថយ ការដោះដូរពាណិជ្ជកម្ម ជាមួយហ្វីលីពីននោះទេ”។ លោកបន្ថែមថា “ខ្ញុំមិនគិតថា ភាគីទាំង២នឹងធ្វើអ្វីហួសដែនកំណត់នោះដែរ ព្រោះការធ្វើបែបនេះ នឹងនាំឱ្យមានការចាញ់រៀងខ្លួន ខណៈសេដ្ឋកិច្ចចិនក៏កំពុងបន្តស្ថិត ក្នុងស្ថានភាពមិនសូវល្អប៉ុន្មានឡើយ”។
ប្រទេសចិននៅតែជាដៃគូពាណិជ្ជកម្ម កំពូលរបស់ហ្វីលីពីន។ យោងតាមទិន្នន័យពីអាជ្ញាធរស្ថិតិហ្វីលីពីន បានបង្ហាញថា ទំហំពាណិជ្ជកម្មទ្វេរភាគី រវាងប្រទេសទាំង២ សម្រេចបានទំហំទឹកប្រាក់ចំនួន៣,៥៨ពាន់លានដុល្លារ នៅក្នុងខែឧសភា ឆ្នាំ២០២៤ ខណៈហ្វីលីពីន កំពុងនាំចូលទំនិញពីចិន ក្នុងទំហំទឹកប្រាក់ច្រើនជាង ការនាំចេញទៅកាន់ប្រទេសចិនវិញ។
ក្នុងរយៈពេល៥ខែដំបូងដើមឆ្នាំនេះ ហ្វីលីពីនបាននាំចូលទំនិញពីប្រទេសចិន មានតម្លៃ១២,៩៩ពាន់លានដុល្លារ កើនឡើង១០,៩ភាគរយ ធៀបនឹងរយៈពេលដូចគ្នា កាលពីឆ្នាំមុន ដែលការណ៍នេះ ធ្វើឲ្យចិនក្លាយជាប្រភពនាំចូល ទំនិញលំដាប់កំពូលមកកាន់ហ្វីលីពីន។
ចំណែក ការនាំចេញទំនិញពីហ្វីលីពីន ទៅកាន់ប្រទេសចិនបានធ្លាក់ចុះ២១,៣ភាគរយ មកនៅត្រឹមទំហំទឹកប្រាក់ចំនួន៣,៧៣ពាន់លានដុល្លារ ក្នុងរយៈពេល៥ខែដំបូងដូចគ្នា។
ក្នុងរយៈពេលប៉ុន្មានឆ្នាំកន្លងមកនេះ បញ្ហាប្រឈមខាងផ្នែកការទូតរវាងប្រទេសទាំង២ ត្រូវបានគេលើកមកពិភាក្សា ខណៈប្រធានាធិបតីហ្វីលីពីន លោកFerdinand Marcos Jr. បានប្រកាន់ជំហររឹងមាំ ដើម្បីប្រឆាំងនឹងការទាមទាររបស់ចិន ជុំវិញដែនទឹកនៅតំបន់សមុទ្រចិនខាងត្បូង។
លោក Ruben Carlo Asuncion ប្រធានសេដ្ឋវិទូនៅធនាគារ Union Bank of the Philippines បានកត់សម្គាល់ថា ប្រទេសចិន នឹងការពារផលប្រយោជន៍សេដ្ឋកិច្ច និងជំរុញកំណើនសេដ្ឋកិច្ចរបស់ខ្លួន។
លោក Asuncion បានបន្ថែមថា “ប្រទេសចិនដឹងយ៉ាងច្បាស់ថា ថ្លៃចំណាយនានានឹងកើនឡើងកាន់តែខ្ពស់ ប្រសិនបើប្រទេសទាំង២ ប្រើប្រាស់ទម្រង់នៃការសងសឹក ខាងផ្នែកសេដ្ឋកិច្ចដាក់លើគ្នាទៅវិញទៅមក”៕ប្រភព:Inquirer.Net៕
