ដោយ៖ វុត្ថា
ភ្នំពេញ៖ ថ្នាក់ដឹកនាំជាន់ខ្ពស់សភានៃប្រជាជនខេត្តលីវនីញ ប្រទេសចិនបានសន្យាជំរុញអ្នកវិនិយោគ និងភ្ញៀវទេសចរណ៍ចិនមកវិនិយោគ និងទស្សនានៅកម្ពុជាឲ្យកាន់តែច្រើន ពិសេសពង្រីកទំហំពាណិជ្ជកម្ម និងបង្កើតសួនឧស្សាហកម្មនៅកម្ពុជា។
លោក ពីង ហ្សីកាង (Bing Zhigang) អនុប្រធានគណៈកម្មាធិការអចិន្ត្រៃយ៍សភាប្រជាជនចិនខេត្តលាវនីញនៃប្រទេសចិន បានលើកឡើងក្នុងជំនួបជាមួយសម្តេចអគ្គមហាពញាចក្រី ហេង សំរិន ប្រធានរដ្ឋសភានាព្រឹកថ្ងៃទី៦ ធ្នូនេះថា ការមកបំពេញទស្សនកិច្ចនៅក្នុងប្រទេសកម្ពុជានាពេលនេះ គឺគឺដើម្បីរឹតចំណងមិត្តភាព និងកិច្ចសហប្រតិបត្តិការជាមួយខេត្តសំខាន់ៗចំនួនពីរ ជាមួយប្រទេសកម្ពុជា មានដូចជា ខេត្តសៀមរាប និងខេត្តព្រះសីហនុ ជាមួយនឹងខេត្តលាវនីញ របស់ចិន និងកាស្វែងរកឪកាសពង្រឹងពង្រីកគម្រោងវិនិយោគនៅកម្ពុជា។
លោកបន្តថា គណៈប្រតិភូនឹងធ្វើដំណើរទៅកាន់ខេត្តទាំងពីរនេះ គឺខេត្តសៀមរាប និងខេត្តព្រះសីហនុ ដើម្បីពិភាក្សានិងចុះហត្ថលេខាលើកិច្ចសហប្រតិបត្តិការជាមួយថ្នាក់ដឹកនាំខេត្តទាំងនោះ និងដើម្បីសិក្សាពីសក្តានុពលនៃការវិនិយោគនៅកម្ពុជាជាមុនផងដែរ ជាពិសេសមានគម្រោងចង់បង្កើតសួនឧស្សាហកម្មខេត្តលីវនីញ និងបង្កើនទីផ្សារពាណិជ្ជកម្ម ក្នុងប្រទេសកម្ពុជាផងដែរ ដើម្បីជំរុញអោយប្រទេសកម្ពុជាមានការរីកចម្រើនបន្ថែមទៀត។
លោក Bing Zhigang បានសន្យាថា នៅពេលត្រឡប់ទៅវិញ គណៈប្រតិភូនឹងកៀងគរផ្សព្វផ្សាយ ទាក់ទាញអ្នកវិនិយោគនិងអ្នកទេសចរចិន ឲ្យមកបណ្តាក់ទុន និងធ្វើទេសចរនៅកម្ពុជាឲ្យបានច្រើនឡើង ព្រោះខេត្តលីវនីញ ជាខេត្តមានសក្តានុពលមួយរបស់ប្រទេសចិនដែលមាន ឧស្សាហកម្មដែកថែប ឧស្សាហកម្មគ្រឿងចក្រកសិកម្ម និងអេឡិចត្រូនិចព័ត៌មានវិទ្យា ជាដើម។
លោក ពីង ហ្សីកាង បានបន្តថា ដើម្បីងាយស្រួលដល់អ្នកវិនិយោគ អគារពាណិជ្ជកម្ម ខេត្តលាវនីញនៅកម្ពុជា នឹងបើកការដ្ឋានសាងសង់ ហើយប្រារព្ធពិធីសម្ពោធ នៅក្នុងដំណើរទស្សនកិច្ចរបស់គណៈប្រតិភូនាពេលនេះដែរ។
លោកបន្តថា “ខ្ញុំនឹងខិតខំជំរុញ អ្នកវិនិយោគទុនចិន នៅខេត្តលាវនីញ មករកស៊ីនៅកម្ពុជាឲ្យច្រើន ដើម្បីជាចំណងដៃនៃចំណងមិត្តភាពការទូតកម្ពុជា ដែលឈានដល់ខួបទី៦០ឆ្នាំ នៅឆ្នាំ២០១៨ខាងមុខនេះ។
សម្តេចអគ្គមហាពញាចក្រី ហេង សំរិន បានគូសបញ្ជាក់ថា ដំណើរទស្សនកិច្ចនេះ បានចូលរួមចំណែកបន្តពូនជ្រុំលើកកម្ពស់ ទំនាក់ទំនងចំណងមិត្តភាព និងកិច្ចសហប្រតិបត្តិការ រវាងប្រទេសយើងទាំងពីរកម្ពុជា-ចិន ជាពិសេសក្នុងក្របខ័ណ្ឌស្ថាប័ននីតិប្បញ្ញត្តិ ឲ្យកាន់តែជិតស្និទ្ធថែមទៀត។ “បច្ចុប្បន្នទំនាក់ទំនង នៃប្រទេសយើងទាំងពីរ មានភាពល្អប្រសើរជាងពេលណាៗទាំងអស់ ហើយឆន្ទៈរបស់ថ្នាក់ដឹកនាំប្រទេសទាំងពីរ គឺបន្តពង្រឹងទំនាក់ទំនង កិច្ចសហប្រតិបត្តិការរវាងប្រទេសទាំងពីរ ឲ្យកាន់តែរឹងមាំថែមទៀត ទោះស្ថិតក្នុងកាលៈទេសៈបែបណាក៏ដោយ”៕
