ដោយៈ គង់ សូរិយា
ភ្នំពេញៈ អនុប្រធានសភាពាណិជ្ជកម្ម អ្នកឧកញ៉ាលឹម ហេង បានមានប្រសាសន៍ឲ្យដឹងថា វិស័យដែលទ្រទ្រង់សេដ្ឋកិច្ចកម្ពុជាឲ្យមានភាពល្អប្រសើរ បាននិងកំពុងទាក់ទាញការវិនិយោគនៅកម្ពុជា។
លោកឧកញ៉ាបានមានប្រសាសន៍ឲ្យដឹង តាមបណ្តាញតេឡេក្រាមកាលពីល្ងាចថ្ងៃទី១ សីហាកន្លងមកថា ការនាំចេញរបស់កម្ពុជា កំពុងមានកំណើនល្អប្រសើរ ទៅអឺរ៉ុប សហរដ្ឋអាមេរិក និងតាមរយៈកិច្ចព្រមព្រៀងRCEP ដែលកម្ពុជាបាននាំចេញទៅកាន់ប្រទេសចិន និងបណ្តាប្រទេសជាសមាជិកRCEPផងដែរ។
អ្នកឧកញ៉ាបានបន្តថា “អ្នកវិនិយោគក្នុងស្រុកបានរក្សាចំណាត់ថ្នាក់ទី១ និងអ្នកវិនិយោគចិនឈរ នៅចំណាត់ថ្នាក់ទី២ និងប្រទេសផ្សេងៗមួយចំនួនទៀត ដូចជា កូរ៉េ ជប៉ុនជាដើម”។លោកបន្តថា “អ្វីដែលគួរឲ្យកត់សំគាល់ យើងសង្កេតឃើញមានការវិនយោគ លើវិស័យកម្មន្តសាលមានការកើនឡើង ដែលវាជាវិស័យជួយទ្រទ្រង់សេដ្ឋកិច្ចកម្ពុជា ល្អប្រសើរជាងវិស័យកាត់ដេរ”។
អ្នកឧកញ៉ាលឹម ហេងបានបន្តទៀតថា ជាមួយគ្នានេះ វិស័យកសិកម្មមានកំណើនល្អប្រសើរផងដែរ ស្របពេលការចុះឈ្មោះបើកក្រុមហ៊ុនថ្មីៗ ក៏មានការកើនឡើង ប៉ុន្តែវិស័យអចលនទ្រព្យនៅតែមិនទាន់ងើបល្អនៅឡើយ តែបើវិស័យផ្សេងៗងើប ទាំងការនាំចេញ ទាំងនាំចូល នឹងអាចអាចធ្វើឲ្យវិស័យអចលនទ្រព្យល្អបណ្តើរៗ ព្រោះតែវិស័យផ្សេងដើរ គឺត្រូវការរោងចក្រ សហគ្រាស កន្លែងធ្វើការ ដែលវានឹងធ្វើឲ្យវិស័យអចលនទ្រព្យងើបឡើងមកវិញហើយ៕
