ដោយ៖ គង់ សូរិយា
ភ្នំពេញ៖ ក្រុមហ៊ុនចម្រុះជាតិសាសន៍ចំនួនបី បានសម្រេចចិត្តវិនិយោគរួមគ្នាលើទឹកប្រាក់១០០លានដុល្លារ ដើម្បីធ្វើផលិតកម្មនិងនាំចេញគ្រាប់ស្វាយចន្ទីរទៅកាន់ប្រទេសកូរ៉េខាងត្បូង ដែលនឹងចាប់ផ្តើមនៅឆ្នាំ២០១៨ខាងមុខនេះ។
លោក SYAIFUL HASREEN ប្រធានក្រុមហ៊ុនខេមឃេស៊ូ បានមានប្រសាសន៍បន្ទាប់ពីពិធីចុះកិច្ចព្រមព្រៀងជាមួយ ក្រុមហ៊ុនវិនិយោគទុនកម្ពុជា-ម៉ាឡេស៊ី ខេមឃេស៊ូ និងក្រុមហ៊ុនរបស់កូរ៉េ ណារូម៉ារីន នាព្រឹកថ្ងៃទី៦ ធ្នូនេះថា ការចុះអនុស្សរណៈនេះ ដើម្បីវិនិយោគទុនប្រមាណ១០០លានដុល្លារអាមេរិក ទៅលើផ្នែកគ្រាប់ស្វាយចន្ទីរ និងដើម្បីឆ្លើយតបទៅតាមតម្រូវការរបស់ការកម្ម៉ង់ទិញពីទីផ្សារកូរ៉េ។ លោកបន្តថា កិច្ចព្រមព្រៀងពេលនេះគឺមានរយៈពេល១ឆ្នាំ ហើយក្រុមហ៊ុននឹងសម្លឹងមើលទៅលើផលិតផល កសិកម្មផ្សេងៗទៀតផងដែរបន្ទាប់ពីគ្រាប់ស្វាយចន្ទីរ។
លោកបញ្ជាក់ថា “មកទល់បច្ចុប្បន្នក្រុមហ៊ុនរបស់យើង បានចុះកិច្ចព្រមព្រៀងជាមួយ សមាគមកសិករដាំស្វាយចន្ទីរ ដែលមានទំហំផ្ទៃដីដាំដុះប្រមាណជាង៣ម៉ឺនហិចតារូចហើយ។ លោកបន្តថា “កិច្ចព្រមព្រៀងរវាងក្រុមហ៊ុន និងក្រុមហ៊ុនដែលមានទំហំទឹកប្រាក់១០០លានដុល្លារនេះ នឹងត្រូវដកយកទៅទិញចំការដាំដំណាំស្វាយចន្ទីរបន្ថែម ប្រហែល៤ពាន់ហិចតា សម្រាប់ផ្គត់ផ្គង់ការនាំចេញទៅគោលដៅខាងលើ។
ប្រធានក្រុមហ៊ុនកូរ៉េណារូម៉ារីន លោក គីម គី ជូ (KIM KI Chul) បានឲ្យដឹងថា នៅឆ្នាំ២០១៨ខាងមុខ លោកត្រូវការគ្រាប់ស្វាយចន្ទីរប្រមាណ១ពាន់តោនជាមុនសិន ដោយសារលោកមានការព្រួយបារម្ភផងដែរ អំពីកម្លាំងរបស់កសិករកម្ពុជាមិនអាចផលិតបាន ប៉ុន្តែតាមតម្រូវការគឺមានច្រើនជាងនេះ។
លោកបន្តថា “តាមរយៈបទពិសោធន៍កន្លងមកទីផ្សាររបស់គ្រាប់ស្វាយចន្ទីរ គឺមានទីផ្សារច្រើនកន្លែងណាស់ ដូចជានៅមជ្ឈឹមបូព៌ា និងនៅប្រទេសចិនជាដើម ប៉ុន្តែសំខាន់បំផុតកសិកររបស់កម្ពុជាមិនទាន់អាចឆ្លើយតបបាន”៕
