ការដាំក្បាលចុះដល់បាតនៃទីផ្សារការិយាល័យអាមេរិកក្លាយជាឱកាសសម្រាប់អ្នកវិនិយោគឥណទាន

0

ដោយ: គង់ លាងហួរ
អន្តរជាតិ: ក្រុមអ្នកជំនាញលើកឡើងថា ទីផ្សារអចលនទ្រព្យពាណិជ្ជកម្មអាមេរិកបានបង្ហាញសញ្ញានៃការដាំក្បាលចុះដល់បាត និងបានឈានដល់ពេលវេលាមួយដែលក្រុមវិនិយោគិនគួរតែបណ្តាក់ទុនវិនិយោគ។នេះបើយោងតាមសារពត៌មានធុរកិច្ច Business Insider។

យោងតាមការវិភាគរបស់ទីភ្នាក់ងារវាយតម្លៃឥណទាន Moody បានរកឃើញថា ប្រតិបត្តិការទីផ្សារបានធ្លាក់ចុះដល់បាតទៅហើយ ព្រោះទំហំនៃការលក់ប្រចាំឆ្នាំបានចាប់ផ្តើមបង្ហាញភាពវិជ្ជមានឡើងវិញជាលើកដំបូងមិនធ្លាប់មានក្នុងរយៈពេល២ឆ្នាំកន្លងមក។

នៅក្នុងត្រីមាសទី២ ឆ្នាំនេះ ប្រតិបត្តិការទិញ-លក់របស់វិស័យអចលនទ្រព្យស្នូលចំនួន៤ សម្រេចបានទំហំទឹកប្រាក់ប្រមាណ៦៤ពាន់លានដុល្លារអាមេរិក។តួលេខនេះមានការកើនឡើងចំនួន៩ភាគរយ។ យ៉ាងណាមិញ ការណ៍នេះពុំមែនមានន័យថា គ្រប់ផ្នែកទាំងអស់នៃវិស័យអចលនទ្រព្យទាំងមូលសុទ្ធតែកម្រើកឡើងវិញនោះទេ។

ទីភ្នាក់ងារវាយតម្លៃឥណទាន Moody បានកត់សម្គាល់ថា ផ្នែកការិយាល័យនៅតែបន្តធ្លាក់ចុះ ខណៈអត្រាការិយាល័យទំនេរនៅត្រីមាសទី២បានកើនឡើងដល់កម្រិតខ្ពស់បំផុតក្នុងរង្វង់២០,១%។ទោះជាយ៉ាងណាក្តីការប្រើប្រាស់ទំហំ Space នៃការិយាល័យ បានកើនឡើងក្នុងកម្រិតមួយដែលអាចជួយរក្សាបាននូវស្ថិរភាពទីផ្សារ។

ស្ថាប័ន Moody រំពឹងថា ទំហំនៃការផ្តល់ប្រាក់កម្ចីរបស់ធនាគារនឹងបង្ហាញសញ្ញាវិជ្ជមាននៅដំណាច់ចុងឆ្នាំ២០២៤។ ការណ៍នេះអាចក្លាយជាដំណឹងដ៏ល្អមួយសម្រាប់បណ្តាអ្នកវិនិយោគនៅក្នុងផ្សារហ៊ុនអាមេរិក Wall Street។

ក្រុមអ្នកវិភាគនៅក្រុមហ៊ុនវិនិយោគសកល Kohlberg Kravis Roberts & Co លើកឡើងថា នេះជាពេលវេលាដ៏ល្អសម្រាប់ការវិនិយោគលើឥណទានអចលនទ្រព្យ ខណៈប្រតិបត្តិការនៅក្នុងទីផ្សារអចលនទ្រព្យពាណិជ្ជកម្មងើបឡើងវិញ។ ការណ៍នេះនឹងបង្កើនតម្រូវការក្នុងការផ្តល់ឥណទាន។

ជាមួយគ្នានេះ និន្នាការនៃការបំពេញការងារពីផ្ទះនឹងជំរុញឱ្យអត្រាការិយាល័យទំនេរនៅសហរដ្ឋអាមេរិក កើនឡើងដល់កម្រិតមធ្យមភាគខ្ពស់បំផុតក្នុងរង្វង់២៤ភាគរយនៅឆ្នាំ២០២៦ និងធ្វើឱ្យតម្លៃទីផ្សារអចលនទ្រព្យពាណិជ្ជកម្មដាំក្បាលចុះចំនួន២៥០ពាន់លានដុល្លារ៕ប្រភព: Business Insider៕

LEAVE A REPLY

Please enter your comment!
Please enter your name here