មូលនិធិ IMF ព្រមានពីហានិភ័យដល់សេដ្ឋកិច្ចរបស់តំបន់អាស៊ី ដោយសារភាពតានតឹងផ្នែកពាណិជ្ជកម្ម

ដោយ: គង់ លាងហួរ

អន្តរជាតិ: មូលនិធិរូបិយវត្ថុអន្តរជាតិ (IMF) បានអះអាងថា ហានិភ័យ ចំពោះសេដ្ឋកិច្ចរបស់តំបន់អាស៊ី បានកើនឡើង ដោយសារការកើនឡើង នៃភាពតានតឹងផ្នែកពាណិជ្ជកម្ម ការដាំក្បាលចុះ នៃវិស័យអចលនទ្រព្យរបស់ប្រទេសចិន និងលទ្ធភាពដែលអាចផ្ទុះឡើង នូវភាពចលាចលនៅក្នុងទីផ្សារ។

មូលនិធិ IMF អះអាងថា “ការធ្លាក់ចុះជាបន្តបន្ទាប់នៃតម្លៃទំនិញ នៅក្នុងប្រទេសចិន អាចបង្កភាពតានតឹងពាណិជ្ជកម្ម និងធ្វើឱ្យប៉ះពាល់ ដល់ប្រទេសជិតខាងផ្សេងទៀត ដែលមានរចនាសម្ព័ន្ធ នៃការនាំចេញស្រដៀងគ្នានឹងចិន”។

ការណ៍នេះជំរុញឱ្យទីក្រុងប៉េកាំង ចាត់វិធានការដើម្បីស្តារសេដ្ឋកិច្ចឱ្យងើបឡើងវិញ តាមរយៈការជំរុញតម្រូវការក្នុងស្រុក។

IMF បាន​បញ្ជាក់​នៅក្នុង​របាយការណ៍ ​ទស្សនវិស័យ​សេដ្ឋកិច្ច​ប្រចាំ​តំបន់​​អាស៊ី​ថា ​“ការ​ធ្លាក់​ចុះ​ក្នុងរយៈពេលវែងជាង​ និង​ធំ​ជាង​ការ​រំពឹង​ទុក ​នៅ​ក្នុង​ប្រទេស​ចិន​ នឹង​មាន​គ្រោះថ្នាក់​សម្រាប់​ទាំង​តំបន់ និង​សេដ្ឋកិច្ច​ពិភពលោក​”។

IMF លើកឡើងថា “ការឆ្លើយតបរបស់ប្រទេសចិនតាមរយៈការដាក់ចេញ គោលនយោបាយនានា មានសារៈសំខាន់នៅក្នុងបរិបទនេះ ដោយIMF អំពាវនាវឱ្យមានការបោះជំហានដើម្បីជួយដល់វិស័យអចលនទ្រព្យ និងពង្រឹងការប្រើប្រាស់ក្នុងវិស័យឯកជន”។

នៅក្នុងរបាយការណ៍ព្យាករណ៍ ចុងក្រោយបំផុតរបស់ខ្លួន មូលនិធិ IMF រំពឹងថា សេដ្ឋកិច្ចរបស់តំបន់អាស៊ី នឹងកើនឡើងក្នុងរង្វង់៤,៦ភាគរយនៅឆ្នាំនេះ និង៤,៤ភាគរយនៅឆ្នាំ២០២៥។ចំណែក ការបន្ធូរបន្ថយគោលនយោបាយរូបិយវត្ថុ នៅទូទាំងពិភពលោក នឹងជួយជំរុញតម្រូវការប្រើប្រាស់ឯកជន នៅឆ្នាំក្រោយ។

ម្យ៉ាងទៀត  ភាពចលាចលនៃទីផ្សារនាពេលថ្មីៗនេះ ក៏អាចបង្ហាញពីភាពប្រែប្រួល នាពេលអនាគតផងដែរ ដោយ​សា​រតែការទម្លាក់អត្រាការប្រាក់ ក្នុងទ្រង់ទ្រាយដ៏ធំរបស់ធនាគារកណ្តាលអាមេរិក និងការដំឡើងអត្រាការប្រាក់បន្តិចម្តងៗដោយធនាគារកណ្តាលជប៉ុន៕ប្រភព:Reuters៕