ដោយ: គង់ លាងហួរ
អន្តរជាតិ: ទីផ្សារអចលនទ្រព្យនៅក្នុងទីក្រុងហ្សាការតា ដែលជាមជ្ឈមណ្ឌលសេដ្ឋកិច្ចរបស់ប្រទេសឥណ្ឌូនេសុីកំពុងប្រែក្លាយជាគោលដៅវិនិយោគដ៏សំខាន់សម្រាប់ជនបរទេស ដោយសារហេដ្ឋារចនាសម្ព័ន្ធមានភាពប្រសើរឡើង។
នៅឆ្នាំ២០២៥នេះ រដ្ឋាភិបាលឥណ្ឌូនេស៊ីគ្រោងបោះទុនវិនិយោគប្រហែល២៥,៥ពាន់លានដុល្លារលើគម្រោងហេដ្ឋារចនាសម្ព័ន្ធសំខាន់ៗដូចជាផ្លូវថ្នល់ និងមធ្យោបាយដឹកជញ្ជូនសាធារណៈជាដើម។
ការបោះទុនវិនិយោគដ៏ច្រើននេះនឹងមិនត្រឹមតែជួយធ្វើឱ្យប្រសើរឡើងនូវហេដ្ឋារចនាសម្ព័ន្ធប៉ុណ្ណោះទេ ប៉ុន្តែថែមទាំងជួយធ្វើឱ្យទីក្រុងហ្សាការតាកាន់តែមានភាពទាក់ទាញចំពោះអ្នកវិនិយោគ ដែលកំពុងស្វែងរកទីផ្សារដ៏មានស្ថិរភាព។
-->
ការដាក់ឱ្យប្រើប្រាស់មធ្យោបាយដឹកជញ្ជូនសាធារណៈនៅក្នុងទីក្រុងហ្សាការតា រួមមានរថភ្លើងលើអាកាសប្រភេទ LRT និង MRT បានធ្វើឱ្យប្រសើរឡើងនូវការធ្វើដំណើរជុំវិញទីក្រុង និងបង្កើតខ្យល់អាកាសល្អប្រសើរសម្រាប់អ្នករស់នៅ និងអ្នកវិនិយោគ។
តម្លៃអចលនទ្រព្យនៅក្នុងទីក្រុងហ្សាការតាកំពុងហក់ឡើងថ្លៃ ដោយសារកំណើនសេដ្ឋកិច្ច និងការអភិវឌ្ឍន៍ទីក្រុង។ តម្លៃអចលនទ្រព្យនៅក្នុងតំបន់ ដែលមានប្រព័ន្ធដឹកជញ្ជូនល្អប្រសើរកំពុងកើនឡើង និងទាក់ទាញក្រសែភ្នែកអ្នកវិនិយោគបរទេស ដែលស្វែងរកប្រាក់ចំណេញខ្ពស់។
ស្របពេលដែលទីក្រុងហ្សាការតាមានហេដ្ឋារចនាសម្ព័ន្ធសាធារណៈកាន់តែច្រើន ទីផ្សារអចលនទ្រព្យរបស់ទីក្រុងនេះត្រូវបានគេរំពឹងថា នឹងមានការរីកដុះដាលយ៉ាងខ្លាំង ដោយទាក់ទាញចំណាប់អារម្មណ៍ពីបណ្តាវិនិយោគិនបរទេស។
ជាមួយគ្នានោះ ជនបរទេសក៏បានចាប់អារម្មណ៍កាន់តែខ្លាំងលើទីផ្សារអចលនទ្រព្យលំនៅដ្ឋាននៅលើកោះបាលីដ៏ល្បីល្បាញរបស់ប្រទេសឥណ្ឌូនេសុី ដោយសាររដ្ឋាភិបាលបានបន្ធូរបន្ថយបទប្បញ្ញត្តិនានាស្តីពីកម្មសិទ្ធិអចលនទ្រព្យរបស់ជនបរទេស។
ក្នុងរយៈពេលប៉ុន្មានឆ្នាំចុងក្រោយនេះ ជាពិសេសនៅឆ្នាំ២០២៣ និងឆ្នាំ២០២៤ ការកាន់កាប់អចលនទ្រព្យដោយជនបរទេសនៅក្នុងតំបន់នានាលើកោះបាលីដូចជាតំបន់ Badung Regency និងតំបន់ Denpasar បានហក់ឡើង៩២,១ភាគរយ និង៨១,៣ភាគរយរៀងគ្នា។
រដ្ឋាភិបាលឥណ្ឌូនេស៊ីបានដាក់ចេញគោលនយោបាយទិដ្ឋាការថ្មី រួមមានទិដ្ឋាការមាស (Golden Visa) និងទិដ្ឋាការផ្ទះទី២ (Second Home Visa)។ ទិដ្ឋាការទាំងនេះបានបង្កភាពងាយស្រួលសម្រាប់ជនបរទេសក្នុងការទិញអចលនទ្រព្យ និងទទួលបានសិទ្ធិនៃការស្នាក់នៅរយៈពេលវែង ប្រសិនបើពួកគេបំពេញតាមលក្ខណៈវិនិច្ឆ័យហិរញ្ញវត្ថុ ដែលបានកំណត់។
រដ្ឋាភិបាលឥណ្ឌូនេសុីក៏បានបន្ទាបថ្លៃសេវាលើការផ្ទេរកម្មសិទ្ធិអចលនទ្រព្យទៅកាន់ជនបរទេសផងដែរ និងផ្តល់សិទ្ធិឱ្យជនបរទេសអាចទិញ ឬកាន់កាប់យូនីតអាផាតមុិនកាន់តែច្រើនជាងមុននៅក្នុងគម្រោងណាមួយ។
ឥណ្ឌូនេស៊ីកំពុងព្យាយាមទាក់ទាញលំហូរវិនិយោគផ្ទាល់ពីបរទេស(FDI) ចូលមកក្នុងវិស័យអចលនទ្រព្យ និងបង្កើតបរិយាកាសអំណោយផលសម្រាប់ជនបរទេស។
បណ្តាវិនិយោគិនអន្តរជាតិជាច្រើនកំពុងទាញយកអត្ថប្រយោជន៍ពីលក្ខខណ្ឌអំណោយផលទាំងនេះ ដែលនាំឱ្យមានការកើនឡើងនៃការលក់អចលនទ្រព្យទៅកាន់ជនបរទេស។
ការបន្ធូរបន្ថយបទប្បញ្ញត្តិស្តីពីកម្មសិទ្ធិអចលនទ្រព្យរបស់ជនបរទេស និងការគាំទ្រពីរដ្ឋាភិបាលឥណ្ឌូនេស៊ីបានធ្វើឱ្យរមណីយដ្ឋានកោះបាលីក្លាយជាគោលដៅដ៏ទាក់ទាញសម្រាប់ការវិនិយោគអចលនទ្រព្យ៕ប្រភព: Bamboo Routes៕
