ដោយ: គង់ លាងហួរ
ភ្នំពេញ: បើទោះបីជាកំណើនសេដ្ឋកិច្ច និងវិស័យទេសចរណ៍របស់កម្ពុជាបានស្ទុះងើបឡើងវិញនាពេលថ្មីៗនេះយ៉ាងណាក្តី ក៏ទីផ្សារអចលនទ្រព្យលក់រាយនៅក្នុងរាជធានីភ្នំពេញនៅតែបន្តជួបប្រទះបញ្ហាប្រឈម។
តួយ៉ាង តម្លៃជួលទីតាំងលក់រាយជាមធ្យមនៅតាមផ្សារទំនើបប្រណីតធំៗនៅតំបន់កណ្តាលរាជធានីភ្នំពេញបានធ្លាក់ចុះ៥ភាគរយនៅក្នុងឆមាសទី២ ឆ្នាំ២០២៤ ធៀបនឹងឆ្នាំ២០២៣ មកនៅត្រឹមតម្លៃជាមធ្យមចាប់ពី១៨ដុល្លារដល់២៨ដុល្លារក្នុងមួយម៉ែត្រការ៉េក្នុងមួយខែ ដោយសារការធ្លាក់ចុះនៃចំណាយរបស់អ្នកប្រើប្រាស់។
គិតត្រឹមចុងឆមាសទី២ ឆ្នាំ២០២៤ ការផ្គត់ផ្គង់ទីតាំងលក់រាយនៅរាជធានីភ្នំពេញ មានទំហំផ្ទៃក្រឡាសរុបចំនួន៨៧០.៥២០ម៉ែត្រការ៉េ កើនឡើង៣ភាគរយបើធៀបនឹងឆមាសទី២ ឆ្នាំ២០២៣។
-->
អត្រាគ្របដណ្តប់ការប្រើប្រាស់ទីតាំងលក់រាយនៅរាជធានីភ្នំពេញបានធ្លាក់ចុះ៣,៥ភាគរយមកនៅសល់ត្រឹម៦៤,៥ភាគរយនៅក្នុងឆមាសទី២ ឆ្នាំ២០២៤ បើប្រៀបធៀបនឹងរយៈពេលដូចគ្នាកាលពីឆ្នាំ២០២៣។
ក្រុមហ៊ុនប្រឹក្សាអចលនទ្រព្យ Knight Frank បានព្យាករណ៍ថា ក្នុងរយៈពេល៣ឆ្នាំខាងមុខ ការផ្គត់ផ្គង់ទីតាំងលក់រាយសរុបនៅរាជធានីភ្នំពេញនឹងកើនឡើង៣២ភាគរយដល់ទំហំ១.១៥១.១៥៩ម៉ែត្រការ៉េបើធៀបនឹងការផ្គត់ផ្គង់ដែលមានស្រាប់នាពេលបច្ចុប្បន្ន។
ក្នុងរយៈពេលខ្លី ទីផ្សារអចលនទ្រព្យលក់រាយត្រូវបានព្យាករណ៍ថា នឹងប្រឈមមុខនឹងបញ្ហា ដោយសារតែការផ្គត់ផ្គង់ទីតាំងលក់រាយលើសតម្រូវការ និងបញ្ហាប្រឈមផ្នែកម៉ាក្រូសេដ្ឋកិច្ចសកល ដែលបានជះផលប៉ះពាល់ទៅលើការចំណាយរបស់អ្នកប្រើប្រាស់។
ក្រុមហ៊ុន Knight Frank រំពឹងថា បញ្ហាប្រឈមទាំងនេះនឹងធ្វើឱ្យចំនួនទីតាំងលក់រាយ ដែលគេទុកឱ្យនៅទំនេរចោលកើនឡើង និងធ្វើឱ្យការដើរទិញឥវ៉ាន់នៅតាមផ្សារទំនើបធ្លាក់ចុះ ខណៈម្ចាស់អាជីវកម្មនានាបានងាកទៅប្រកបមុខរបរតាមអនឡាញ ដោយសារការផ្លាស់ប្ដូរទម្លាប់នៃអ្នកប្រើប្រាស់។
ចំពោះទីផ្សារបដិសណ្ឋារកិច្ច ក្រុមហ៊ុន Knight Frank បានអះអាងថា ការផ្គត់ផ្គង់សណ្ឋាគារដែលមានស្រាប់នៅរាជធានីភ្នំពេញបានកើនឡើងដល់ប្រមាណ១៦.០០០បន្ទប់នៅដំណាច់ឆមាសទី២ ឆ្នាំមុន កើនឡើង៧%បើធៀបនឹងឆ្នាំ២០២៣។
ការស្នាក់នៅបន្ទប់សណ្ឋាគារប្រណីត និងលំដាប់ខ្ពស់(Luxury and Upper
Upscale)នៅរាជធានីភ្នំពេញមានតម្លៃជាមធ្យមចាប់ពី១២៥ដុល្លារអាមេរិកក្នុងមួយយប់ ខណៈការស្នាក់នៅសណ្ឋាគារលំដាប់មធ្យម(Midscale)មានតម្លៃចាប់ពី២០ដុល្លារក្នុងមួយយប់។
លើសពីនេះ ក្រុមហ៊ុនបដិសណ្ឋារកិច្ចដ៏ល្បីល្បាញ Wyndham Hotels & Resorts របស់សហរដ្ឋអាមេរិក គ្រោងនឹងបើកដំណើរការសណ្ឋាគារចំនួន៣១២បន្ទប់នៅរាជធានីភ្នំពេញក្នុងឆ្នាំ២០២៥នេះ។ ការផ្គត់ផ្គង់បន្ថែមថ្មីនេះត្រូវបានគេរំពឹងថា នឹងជួយលើកកម្ពស់ទិដ្ឋភាពនៃទីផ្សារបដិសណ្ឋារកិច្ច និងបំពេញតម្រូវការស្នាក់នៅប្រកបដោយភាពប្រណីតនៅរាជធានីភ្នំពេញ៕ប្រភព: Knight Frank៕
