ដោយ: គង់ លាងហួរ
អន្តរជាតិ: ធនាគារខ្នាតយក្ស Siam Commercial Bank (SCB)របស់ប្រទេសថៃបានអះអាងថា ការបន្តរីកចម្រើនជាលំដាប់នៃកំណើនសេដ្ឋកិច្ច បានធ្វើឱ្យប្រទេសកម្ពុជា ក្លាយជាគោលដៅមួយ ដែលបណ្តាសហគ្រិន ឬអ្នកវិនិយោគបរទេសចាប់អារម្មណ៍ ក្នុងការពង្រីកអាជីវកម្មក្នុងប្រទេសមួយនេះ។
ជាមួយគ្នានេះ កម្លាំងពលកម្មនៅកម្ពុជាមានតម្លៃសមរម្យ បូករួមទាំងវប្បធម៌ បរិស្ថាន និងធនធានធម្មជាតិដ៏សម្បូរបែប។ ជាងនេះទៅទៀត គោលនយោបាយ និងវិធានការសេដ្ឋកិច្ចរបស់រដ្ឋាភិបាលកម្ពុជា ក៏មានភាពអនុគ្រោះ ដល់បណ្តាអ្នកវិនិយោគបរទេសផងដែរ។
កត្តាទាំងនេះបានធ្វើឱ្យបណ្តាសហគ្រិន និងអ្នកវិនិយោគអន្តរជាតិសម្លឹងឃើញឱកាសពាណិជ្ជកម្ម និងការវិនិយោគនៅកម្ពុជា។
ធនាគារ Siam Commercial Bank បានលើកឡើងនូវទីក្រុងប៉ូលសេដ្ឋកិច្ចសំខាន់ៗចំនួន៣របស់កម្ពុជា ដែលនឹងក្លាយជាឱកាសសម្រាប់បណ្តាសហគ្រិនថៃ ដែលគ្រោងពង្រីកអាជីវកម្ម និងស្វែងរកឱកាសវិនិយោគថ្មីនាពេលអនាគត។
រាជធានីភ្នំពេញជាមជ្ឈមណ្ឌលធុរកិច្ច ឧស្សាហកម្ម នយោបាយ ការអប់រំ សេដ្ឋកិច្ច បេតិកភណ្ឌវប្បធម៌ និងការទូតរបស់កម្ពុជា។ រាជធានីភ្នំពេញ មានទីតាំងស្ថិតនៅចំណុចប្រសព្វ នៃទន្លេបាសាក់ ទន្លេសាប និងទន្លេមេគង្គ។
ទន្លេទាំង៣នេះ ជាប្រភពទឹកសាប និងជាប្រព័ន្ធអេកូឡូស៊ីដ៏សំខាន់សម្រាប់ទីក្រុងភ្នំពេញ។
រាជធានីភ្នំពេញ ក៏មានតំបន់សេដ្ឋកិច្ចពិសេសមួយផងដែរ ដែលមានឈ្មោះថា តំបន់សេដ្ឋកិច្ចពិសេសភ្នំពេញ (PPSEZ)។ តំបន់នេះត្រូវបានអភិវឌ្ឍន៍ឡើង ក្នុងគោលបំណងទាក់ទាញអ្នកវិនិយោគបរទេស មកបង្កើតមូលដ្ឋានផលិតកម្មនៅក្នុងប្រទេសកម្ពុជា។
លើសពីនេះ រាជធានីភ្នំពេញ ក៏ជាមជ្ឈមណ្ឌលទេសចរណ៍ដ៏សំខាន់មួយផងដែរ ដែលរួមមានតំបន់ទេសចរណ៍ជាច្រើន ដូចជា ព្រះបរមរាជវាំង វត្តភ្នំ និងវត្តឧណ្ណាលោមជាដើម។
ទីក្រុងព្រះសីហនុ ជាមជ្ឈមណ្ឌលដឹកជញ្ជូនដ៏សំខាន់មួយ ស្ថិតនៅភាគខាងត្បូងនៃប្រទេសកម្ពុជា។ ទីក្រុងនេះមានកំពង់ផែសមុទ្រទឹកជ្រៅ ដែលអាចអនុញ្ញាតឱ្យនាវាពាណិជ្ជកម្មធំៗ តាមផ្លូវសមុទ្រចូលចតបាន។
លើសពីនេះ ទីក្រុងព្រះសីហនុ មានខ្សែរថភ្លើងដែលតភ្ជាប់មកកាន់រាជធានីភ្នំពេញ និងអាកាសយានដ្ឋានអន្តរជាតិ ដែលមានសមត្ថភាព ទទួលអ្នកដំណើរជាង៦០ម៉ឺននាក់ក្នុងមួយថ្ងៃ។ ការណ៍នេះបានចូលរួមចំណែកយ៉ាងសំខាន់ ដល់ការទាក់ទាញភ្ញៀវទេសចរណ៍មកលេងកំសាន្តឆ្នេរសមុទ្រ ដ៏ស្រស់ស្អាតរបស់ខេត្តព្រះសីហនុ។
ជាពិសេសទៀតនោះ ទីក្រុងកំពង់ផែមួយនេះ ក៏មានសក្តានុពលធនធានប្រេង និងឧស្ម័នធម្មជាតិផងដែរ។ ទន្ទឹមគ្នានោះ ទីក្រុងព្រះសីហនុ ជាមូលដ្ឋានផលិតកម្មធំជាងគេទី២របស់កម្ពុជា បន្ទាប់ពីទីក្រុងភ្នំពេញ។
រដ្ឋាភិបាលកម្ពុជា បានបង្កើតរោងចក្រថាមពលអគ្គិសនីដើរដោយធ្យូងថ្មចំនួន៣ ទីតាំងនៅខេត្តព្រះសីហនុ ដែលអាចផលិតថាមពលអគ្គិសនីចំនួន២០ភាគរយ នៃសមត្ថភាពផលិតថាមពលសរុបរបស់កម្ពុជា។
បច្ចុប្បន្ននេះ បណ្តាអ្នកវិនិយោគធំៗ មានការចាប់អារម្មណ៍យ៉ាងខ្លាំងលើខេត្តព្រះសីហនុ ជាពិសេសការវិនិយោគលើអចលនទ្រព្យ។
ម៉្យាងវិញទៀត ទីក្រុងព្រះសីហនុត្រូវបានគេរំពឹងថា នឹងក្លាយជាទីក្រុងទំនើបនាពេលអនាគត។ ការណ៍នេះបានធ្វើឱ្យការអភិវឌ្ឍន៍លំនៅដ្ឋានតម្លៃសមរម្យ ក្នុងទីក្រុងព្រះសីហនុ នៅតែមានតម្រូវការខ្ពស់។
ទោះបីជាខេត្តកោះកុង មិនសូវទទួលបានចំណាប់អារម្មណ៍ខ្ពស់ពីបណ្តាអ្នកវិនិយោគបរទេសជាទូទៅយ៉ាងណាក្តី ប៉ុន្តែបណ្តាសហគ្រិនថៃ នៅតែសម្លឹងឃើញឱកាសវិនិយោគជាច្រើន ព្រោះខេត្តកោះកុងមានព្រំប្រទល់ជាប់នឹងខេត្តត្រាតរបស់ប្រទេសថៃ។
ម៉្យាងវិញទៀត ការធ្វើដំណើរពីទីក្រុងបាងកក មកកាន់ខេត្តកោះកុង ចំណាយពេលត្រឹមតែ៦ម៉ោងប៉ុណ្ណោះ។ ជាពិសេសប្រជាជនភាគច្រើនរស់នៅខេត្តកោះកុង អាចនិយាយភាសាថៃបាន។
គម្រោងហេដ្ឋារចនាសម្ព័ន្ធសំខាន់ៗ របស់ខេត្តកោះកុង រួមមាន ការកសាងគម្រោងកំពង់ផែសមុទ្រទឹកជ្រៅ ដែលមានផ្ទៃក្រឡាជាង៣៦០គីឡូម៉ែត្រការ៉េ និងព្រលានយន្តហោះអន្តរជាតិតារាសាគរ ដែលបោះទុនវិនិយោគ ដោយក្រុមហ៊ុនUDG Group មកពីប្រទេសចិន៕ប្រភព: SCB៕
របស់ប្រទេសថៃបានអះអាងថា ការបន្តរីកចម្រើនជាលំដាប់នៃកំណើនសេដ្ឋកិច្ច បានធ្វើឱ្យប្រទេសកម្ពុជា ក្លាយជាគោលដៅមួយ ដែលបណ្តាសហគ្រិន ឬអ្នកវិនិយោគបរទេសចាប់អារម្មណ៍ ក្នុងការពង្រីកអាជីវកម្មក្នុងប្រទេសមួយនេះ។ ){kind=link}