ដោយៈ គង់ សូរិយា
ភ្នំពេញៈ ផ្សារទំនើបខ្នាតមធ្យមមួយចំនួន បានបិទទ្វារដោយសារមួយផ្នែកជាការផ្គត់ផ្គង់លើសតម្រុវការ និងមួយផ្នែកដោយសារការឌីសាញ និងវប្បធ៌មនៃការរស់នៅរបស់ប្រជាពលរដ្ឋ។
អ្នកជំនាញបានលើកឡើងថា ខណៈការប្រកួតប្រជែងកើនឡើង បានធ្វើឲ្យទីផ្សារតូចៗ ដែលមិនមានស្តង់ដាបានបន្តបិទទ្វារ។
កំហុសនៃការសាងសង់ជាផ្នែកមួយ ដែលបញ្ហាទាំងនោះមានដូចជា កង្វះចំណតយានយន្ត កង្វះបន្ទប់ទឹកសាធារណៈ កង្វះទីសម្រាកលំហែរ អំណាចនៃការទិញធ្លាក់ចុះ និងបញ្ហាឥរិយាបទរបស់ប្រជាពលរដ្ឋ មិនសូវនិយមធ្វើដំណើរដោយថ្មើរជើង ជាហេតុធ្វើឲ្យផ្សារមិនមានចំណតយានយន្តធំទូលាយ មិនអាចទាក់ទាញបានអតិថិជន។
អគ្គនាយិកាក្រុមហ៊ុនPropnex Cambodia លោកស្រីអាន សុធីតាធ្លាប់បានលើកឡើងថា ការផ្គត់ផ្គង់លើសតម្រូវការ ទីតាំងរបស់ផ្សារជាបញ្ហាប្រឈម របស់វិស័យលក់រាយនៅកម្ពុជា ពិសេសផ្សារនិមួយៗ អ្នកអភិវឌ្ឍន៍ត្រូវការរៀបចំប្លង់ និងការឌីសាញឡើងវិញរៀងរាល់៥ឆ្នាំម្តង ដើម្បីឲ្យផ្សារមានភាពទាក់ទាញអតិថិជន។
លោកស្រីបន្តថា “ទីតាំងមួយចំនួន មិនស័ក្តិសមសម្រាប់សាងសង់ផ្សារទំនើបឡើយ ដោយសារខ្វះចំណត និងមិនមានទីលានសាធារណៈ សម្រាប់ចតយានយន្ត និងការលំហែរ”។
អ្នកជនាញអចលនទ្រព្យជើងចាស់មួយរូប បានលើកឡើងថា ស្ថានភាពបែបនេះ អ្នកអភិវឌ្ឍន៍គួរជ្រើសរើសវិធីសាស្រ្តថ្មី ធ្វើដូចនៅប្រទេសមួយចំនួន ដែលផ្សារមួយចំនួនបាន លក់ផលិតផលតែមួយមុខផ្តាច់មុខ ដូចជា សម្លៀកបំពាក់ គ្រឿងអេឡិកត្រូនិក ឬផលិតផលថែររក្សសម្រស់ជាដើម។
លោកបញ្ជាក់ថា “នៅពេលផ្សារណាមួយមានកម្រិតភាពយូនីករបស់ខ្លួន អតិថិជននឹងទៅកាន់ផ្សារនោះ ដែលពួកគេអាចស្វែងរកអ្វីដែលពួកគេចង់បាន”។ លោកបន្ថែមថា “ការមានជម្រើសផលិតផលច្រើនមុខនៅផ្សារមួយ មិនប្រាកដថាល្អគ្រប់យ៉ាងនោះទេ”៕
