ដោយ៖ គង់ សូរិយា
ភ្នំពេញ៖ ធនាគារ MARUHAN ដែលបានទិញមីក្រូហិរញ្ញវត្ថុស្ថាបនាកាលពីឆ្នាំមុន គ្រោងបោះទុនវិនិយោគ៦០លានដុល្លារអាមេរិក ដើម្បីសាងសង់អាគារពាណិជ្ជកម្មជប៉ុនធំជាងគេ និងខ្ពស់ជាងគេនៅកម្ពុជា។
ក្នុងជំនួបជាមួយសម្តេចតេជោ ហ៊ុន សែននាយករដ្ឋមន្ត្រីកម្ពុជានាថ្ងៃទី១៤ ធ្នូនេះ លោក Han Chang Woo ប្រធាននិងជាអគ្គនាយកប្រតិបត្តិក្រុមហ៊ុន MARUHAN បានថ្លែងថា ថ្មីៗនេះក្រុមហ៊ុន MARUHAN បានទិញយកស្ថាប័នមីក្រូហិរញ្ញវត្ថុរបស់កម្ពុជា ឈ្មោះស្ថាបនា ដែលបច្ចុប្បន្ននេះប្តូរពីមីក្រូហិរញ្ញវត្ថុ ទៅជាធនាគារស្ថាបនាវិញ ដែលមានអ្នកបច្ចេកទេស និងអ្នកទទួលខុសត្រូវ មកពីប្រទេសជប៉ុនផង និងនៅកម្ពុជាផង។
លោកបន្តថា “ក្រុមហ៊ុនមានគម្រោងសាងសង់ អគារទីស្នាក់ការកណ្តាលស្ថិតនៅ ផ្លូវនរោត្តមរាជធានីភ្នំពេញ នៅឆ្នាំ២០១៨ខាងមុខនេះ ហើយគ្រោងបញ្ចប់នៅឆ្នាំ២០២០ខាងមុខ ដោយអាគារនេះមានកម្ពស់២២ជាន់។លោកបន្តថា សព្វថ្ងៃនេះធនាគារនៅកម្ពុជា ទឹកប្រាក់ប្រមាណ១២០លានដុល្លារអាមេរិក ដែលមានសាខា១៦៨កន្លែងនៅទូទាំងប្រទេស មានបុគ្គលិក៤,៣០០នាក់ ស្មើនឹង១៥ភាគរយនៃបុគ្គលិកបម្រើការងារ នៅក្នុងវិស័យធនាគារក្នុងប្រទេសកម្ពុជា។
បច្ចុប្បន្ននេះមានក្រុមហ៊ុនជប៉ុនជាង២៥០ ដែលមានជំនឿចិត្តក្នុងការប ណ្តាក់ទុនវិនិយោគរកស៊ីនៅកម្ពុជា ។
លោក Han Chang Woo បានថ្លែងថា “១០ឆ្នាំកន្លងទៅនេះ កម្ពុជាមានការរីកចម្រើនយ៉ាងលឿននេះ គឺដោយសារភាពប៉ិនប្រសព្វ និងឈ្លាសសវៃរបស់សម្តេចតេជោ ក្នុងការដឹកនាំប្រទេស។
នាយករដ្ឋមន្ត្រីកម្ពុជាសម្តេចតេជោ ហ៊ុន សែនបានមានប្រសាសន៍ថា ការរីកចំរើនរបស់កម្ពុជា គឺដោយសារនយោបាយរបស់កម្ពុជា ពិសេសការបើកចំហរលើគ្រប់វិស័យ នៃសេដ្ឋកិច្ចជាតិរួមទាំងការអនុញ្ញាត ឲ្យវិនិយោគិនបរទេសអាចមកវិនិយោគផ្ទាល់១០០ភាគរយនៅកម្ពុជា។ សម្តេចតេជោបានជំរុញឲ្យលោក Han Chang Woo បន្តវិនិយោគនៅកម្ពុជា ហើយបន្តចូលរួមជួយក្នុងវិស័យសង្គម ជាពិសេសវិស័យកីឡា ដោយសារកម្ពុជានឹងធ្វើជាម្ចាស់ផ្ទះក្នុងរៀបចំកីឡាស៊ីហ្គេម នៅឆ្នាំ២០២៣ខាងមុខនេះ៕