ដោយ៖ ដូង ចន្ទ្រា
ភ្នំពេញ៖ ការធ្វើអាជីវកម្មមួយ មិនប្រាកដថាជោគជ័យនោះទេ ប្រសិនជាគ្មានយុទ្ឋសាស្ត្រច្បាស់លាស់ ប៉ុន្តែផ្ទុយទៅវិញក្រុមហ៊ុនលក់អាហាររហ័សទាន់ចិត្ត Pizza Company បានទទួលជោគជ័យយ៉ាងខ្លាំងនៅកម្ពុជា។
តើកត្តាអ្វីខ្លះដែលជំរុញឲ្យក្រុមហ៊ុនលក់អាហារបែប Fast Food នេះទទួលបានជោគជ័យ? លោក ងន សាំង អគ្គនាយកក្រុមហ៊ុន RMA Cambodia បានថ្លែងឲ្យដឹងលកាលពីម្សិលម៉ិញថា ភាពជោគជ័យនៃក្រុមហ៊ុននេះ ដោយសារកត្តាសំខាន់ៗចំនួន៣ ដូចជា ទី១ គឺនំភីហ្សាមានច្រើនរសជាតិច្រើនបែប និងមានមុខម្ហូបបន្ថែមចម្រុះ២៩មុខផ្សេងទៀត ដែលអតិថិជនអាចជ្រើសយករសជាតិ និងមុខម្ហូបដែលពួកគេពេញចិត្ដបានយ៉ាងងាយស្រួល ហើយអាហារទាំងនោះគឺតម្រូវទៅតាមស្ដង់ដា និងមានសុវតិភាពចំណីអាហារខ្ពស់។ ទី២ ការរៀបចំហាង និងបរិយាកាសនៅក្នុងហាង គឺមានភាពទាកទាញ និងផ្ដល់ភាពងាយស្រួលដល់អតិថិជនមកញុំាំអាហារជជែកគ្នា ជាលក្ខណៈមិត្ដភក្ដ័ គ្រួសារ និងការងារជាដើម។ ទី៣ គឺការផ្ដល់សេវាកម្មដ៏ល្អពីបុគ្គលិក និងភាពងាយស្រួលក្នុងការចតយានយន្ដ។
ក្រុមហ៊ុន អ៊ី អេហ្វ ជី (EFG) គឺជាបុត្រសម្ព័ន្ធរបស់ក្រុមហ៊ុន អ អិម អេ ខេបូឌា (RMA Cambodia) ដែលទទួលបានសិទិ្ធនាំចូលនូវផលិតផល និងសេវាកម្មល្បីៗលើពិភពលោកជាច្រើនរួមមាន ដឹ ភីហ្សា ខមផេនី (The Pizza Company) ខួស្តារ ខូហ្វី (Costa Coffee) ហាងការ៉េម ដេរី ឃ្វីន (Dairy Queen) ប៊ីប៊ីឃ្យូ កម្ពុជា (BBQ Cambodia) ស្វិនសិន កម្ពុជា (Swensen’s Cambodia) ហាងនំដូណាត់ គ្រីស្ពីគ្រីម ( Kripsy Kreme) និងហាង បាប៊ី ឃ្យូ ផ្លាហ្សា (Bar B Q Plaza) ៕
លោក ងន សាំងបានបន្តថា ក្រុមហ៊ុន អ៊ី អេហ្វ ជីជាក្រុមហ៊ុនផ្ដល់សេវាកម្ម ផ្នែកចំណីអាហារឈានមុខគេក្នុងប្រទេសកម្ពុជា ដែលមកដល់សព្វថ្ងៃនេះក្រុមហ៊ុន បានពង្រីកសាខាសរុបរហូតដល់៥៧ហាងគ្របដណ្ដប់នៅក្នុងក្រុងភ្នំពេញ ក្រុងព្រះសីហនុ ក្រុងតាខ្មៅ ក្រុងសៀមរាប ក្រុងបាត់ដំបង ក្រុងប៉ោយប៉ែត និងក្រុងកំពង់ចាម ហើយមានបុគ្គលិករហូតដល់ជិត២០០០នាក់ បានមកបំរើការក្នុងហាងរបស់ខ្លួន ជាពិសេសសម្រាប់ហាង ដឹ ភីហ្សា ខមផេនី មានសាខារហូតដល់២៧សាខាឯណោះ៕