ដោយ ម៉ាណេត
ភ្នំពេញៈ មន្ត្រីជាន់ខ្ពស់ខេត្តកំពតអះអាងថា មានក្រុមហ៊ុនជាច្រើនបាន និងកំពុងចូលមកសិក្សាពីសក្តានុពល និងឱកាសវិនិយោគពីខេត្តនេះ ខណៈបច្ចុប្បន្នការវិនិយោគធំៗ មិនទាន់មានការលិចឡើងគូរឲ្យកត់សម្គាល់នៅឡើយទេ។
អភិបាលនៃគណៈអភិបាលខេត្តកំពតលោកជាវ តាយបានប្រាប់គេហទំព័រ PropertyArea.asia តាមទូរស័ព្ទនារសៀលថ្ងៃទី៨ ឧសភានេះថា បច្ចុប្បន្ននេះមានក្រុមហ៊ុនជាច្រើនមក ដែលនេះគ្រាន់តែជាការសិក្សាសិន ហើយគេសិក្សាហើយបានគេរៀបគម្រោងសកម្មភាព ប៉ុន្តែឥឡូវនេះមិនទាន់ដល់ដំណាក់កាលទីពីរទេ (ដំណាក់ការនុវត្ដន៍គម្រោង)។
-->
លោកឲ្យដឹងថា “អីចឹងបញ្ហាផ្លូវរថភ្លើង និងបញ្ហាផ្លូវល្បឿនលឿនអីហ្នឹងស្ថិតក្នុងដំណាក់ការពិចារណា មិនទាន់ជាមានលទ្ធផលអ្វីនៅឡើយទេ”។
លោកបានប្រាប់ទៀតថា “ពាក់ព័ន្ធនិងវិស័យទេសចរណ៍បច្ចុប្បន្ននេះ គឺយើងឃើញថាមានក្រុមហ៊ុនច្រើន ប៉ុន្តែមិនក្រុមហ៊ុនធំទេគឺមកពីមកក្នុងស្រុក ឫក៏អ្នកវិនិយោគទុនក្នុងស្រុក ខណៈជប៉ុន និងកូរ៉េធ្វើការវិនិយោគក្នុងរូបភាពល្មម មិនធំពេកទេដោយគេកំពុងវិនិយោគបន្ត ពិសេសអ្នកនៅក្នុងស្រុកតែម្តង”។
លោកបន្ថែថា “ចំណែកអ្នកវិនិយោគធំៗ បានតែលើកគម្រោងខ្ញុំបានជំរាបចឹង ដែលពួកគេគ្រោងវិនិយោគតំបន់ទេសចរណ៍ធំៗ ប៉ុន្តែដល់ថ្ងៃនេះការការវិនោយោគនេះមិនទាន់ចេញផ្លូវការ គាត់កំពុងតែគិត តែមិនទាន់គូស និងមិនទាន់ដាក់ចូលជាសកម្មភាព”។
មានប្រសាសន៍នៅក្នុងពិធីបើកសម្ពោធ ដាក់ឱ្យប្រើប្រាស់ជាផ្លូវការនូវប្រព័ន្ធផ្គត់ផ្គង់ទឹកស្អាតខេត្តកំពតក្រោមជំនួយរបស់រដ្ឋាភិបាលជប៉ុន កាលពីព្រឹកថ្ងៃទី២ ខែមេសានេះ សម្តេចតេជោ ហ៊ុន សែនបានលើកឡើងថាកំពត ជាខេត្តមួយដែលមានការអភិវឌ្ឍន៍ក្រោយគេ ប៉ុន្តែនឹងមានភាពរីកចម្រើនខ្លាំងនៅពេលដ៏ខ្លីខាងមុខនេះ។
សម្តេចបន្តថា “ក្រៅពីមានការអភិវឌ្ឍន៍ ទៅលើប្រព័ន្ធហេដ្ឋារចនាសម្ព័ន្ធ ដូចជាផ្លូវផ្នល់សំខាន់ៗរបស់ខេត្ត ការបង្កើនសោភ័ណភាព ជាពិសេសមានកំពង់ផែទឹកជ្រៅ ដែលកំពុងដំណើរការសាងសង់នោះ នៅមានបណ្តាក្រុមហ៊ុនជាតិ អន្តរជាតិមួយចំនួនទៀតចូលមកវិនិយោគនៅក្នុងខេត្តមួយនេះ”៕
