ដោយ Donald Lee
ភ្នំពេញៈ ក្រុមហ៊ុនហិរញ្ញវត្ថុ និងសេវាធនាគារធំជាងគេបំផុត នៅប្រទេសកូរ៉េខាងត្បូង បានចុះហត្ថលេខាលើកិច្ចព្រមព្រៀង ក្នុងភាពជាដៃគូជាមួយធនាគារឯកទេសវីងខេមបូឌាលីមីធីតដើម្បីពង្រីកវិស័យសេវាកម្មហិរញ្ញវត្ថុនៅកម្ពុជា។
ធនាគារ Woori Bank ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Woori Financial Group បានចុះហត្ថលេខាលើអនុស្សរណៈនៃការយោគយល់ជាមួយក្រុមហ៊ុនវីងកាលពីចុងសប្ដាហ៍មុន។
យោងតាមធនាគារខាងលើនេះ ភាពជាដៃគូគឺជាផ្នែកមួយនៃកិច្ចខិតខំប្រឹងប្រែងរួមគ្នា ដើម្បីជ្រៀតចូលវត្តមានរបស់ខ្លួននៅក្នុងតំបន់អាស៊ីអាគ្នេយ៍ និងជួយបង្កើនសេវាកម្មហិរញ្ញវត្ថុនៅកម្ពុជា។
ដោយមានភាពជាដៃគូនេះ អតិថិជនធនាគារនៅកម្ពុជានឹងអាចផ្ញើប្រាក់ទៅ និងមកពីប្រទេសកូរ៉េខាងត្បូងនៅពេលក្រោយក្នុងឆ្នាំនេះ។
មន្ត្រីរបស់ក្រុមហ៊ុន Woori បានប្រាប់កាសែតកូរ៉េថាមស៍ថា “ប្រជាពលរដ្ឋកម្ពុជាជាង ៤ ម៉ឺននាក់រស់នៅទីនេះនៅក្នុងប្រទេសកូរ៉េខាងត្បូង ហើយចំនួនប្រជាពលរដ្ឋកម្ពុជាកំពុងកើនឡើងជាលំដាប់។ កិច្ចសហការយ៉ាងជិតស្និទ្ធរវាងធនាគារ Wing និងក្រុមហ៊ុន WB Finance នឹងជួយប្រជាជនកម្ពុជានៅទីនេះ ប្រើប្រាស់សេវាកម្មហិរញ្ញវត្ថុដោយគ្មានការរឹតត្បិតតាមភូមិសាស្រ្ត”។
ក្រុមហ៊ុនហិរញ្ញវត្ថុកូរ៉េខាងត្បូងជាច្រើន កំពុងបង្កើនការបង្កើតសាខានៅកម្ពុជាដែលជាផ្នែកមួយនៃយុទ្ធសាស្ត្ររួមគ្នា ដើម្បីបង្កើតទំនាក់ទំនងសេដ្ឋកិច្ចកាន់តែជិតស្និទ្ធជាមួយតំបន់អាស៊ាន។ ក្រុមហ៊ុនហិរញ្ញវត្ថុកូរ៉េខាងត្បូងចំនួន៥ បានបើកក្រុមហ៊ុនបុត្រសម្ព័ន្ធនៅកម្ពុជាកាលពីឆ្នាំមុន។ នេះបើយោងតាមរបាយការណ៍មួយ ដែលចេញផ្សាយកាលពីពេលថ្មីៗ ដោយក្រុមហ៊ុនផ្តល់សេវាត្រួតពិនិត្យហិរញ្ញវត្ថុ (FSS) និងជានិយ័តករហិរញ្ញវត្ថុរបស់រដ្ឋាភិបាលកូរ៉េខាងត្បូង។
កាលពីខែមីនាប្រធានាធិបតីកូរ៉េខាងត្បូងលោក Moon Jae-in បានដឹកនាំគណៈប្រតិភូវិនិយោគិន ក្នុងដំណើរទស្សនកិច្ចផ្លូវការរយៈពេលបីថ្ងៃមកកាន់កម្ពុជា ជាផ្នែកមួយនៃគោលនយោបាយថ្មី នៃភាគខាងត្បូងរបស់ខ្លួន ដែលជាគំនិតផ្តួចផ្តើមមួយដើម្បីពង្រឹងទំនាក់ទំនងការទូត និងសេដ្ឋកិច្ចជាមួយអាស៊ីអាគ្នេយ៍។
បណ្តាប្រទេសអាស៊ាន មានប្រជាជនសរុបជាង៦០០លាននាក់ និងផលិតផលសរុបក្នុងស្រុក (GDP) សរុបចំនួន២,៤ ពាន់ពាន់ដុល្លារ ធ្វើឲ្យក្រុមអ្នកវិភាគមួយចំនួនហៅតំបន់នេះថាជា “ប្រទេសចិនថ្មី” ។ អង្គការរូបិយវត្ថុអន្តរជាតិ (IMF) ព្យាករថា អាស៊ាននឹងមានសេដ្ឋកិច្ចធំបំផុតទីបួនលើពិភពលោកនៅឆ្នាំ២០៥០៕
