ដោយ ៖ រ៉ាណេត
ភ្នំពេញ៖ យ៉ាងហោចណាស់មានក្រុមហ៊ុនឯកជនប្រមាណជាង ៥០០០ ដែលកំពុងដំណើរការប្រតិបត្តិការស្ទើរគ្រប់វិស័យ បានផ្សារភ្ជាប់ខ្លួនក្នុងនាមជាសមាជិកសភាពាណិជ្ជកម្មកម្ពុជា។
តើក្រុមហ៊ុនទាំងអស់នោះទទួលបានអត្ថប្រយោជន៍អ្វីខ្លះពីសភាពាណិជ្ជកម្មកម្ពុជា ហើយដើម្បីក្លាយជាសមាជិក តើក្រុមហ៊ុននីមួយៗត្រូវរៀបចំឯកសារ និងមានល័ក្ខខ័ណ្ឌដូចម្ដេចខ្លះ ?
អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍ប្រាប់ឱ្យដឹងកាលពីពេលកន្លងទៅនេះថា សភាពាណិជ្ជកម្មកម្ពុជា គឺជាគ្រឹះស្ថានសាធារណៈមួយដែលស្ថិតនៅក្រោមអាណាព្យាបាលរបស់ក្រសួងពាណិជ្ជកម្ម និងជាតំណាងឱ្យបណ្តាអ្នកវិនិយោគ និងក្រុមហ៊ុនវិស័យឯកជន ដែលចូលរួមជាសមាជិករបស់ខ្លួន។
លោកឧកញ៉ាបានមានប្រសាសន៍បញ្ជាក់ទៀតថា ៖ “ក្រុមហ៊ុនណាក៏ដោយ ឱ្យតែជាក្រុមហ៊ុនស្របច្បាប់សុទ្ធតែមានសិទ្ធិចូលរួមជាសមាជិករបស់សភាពាណិជ្ជកម្មកម្ពុជាបានទាំងអស់ ហើយ ក្រុមហ៊ុនដែលជាសមាជិករបស់សភាពាណិជ្ជកម្មគឺមានអត្ថប្រយោជន៍ជាច្រើន”។
អនុប្រធានសភាពាណិជ្ជកម្មកម្ពុជារូបនេះបានបញ្ជាក់ទៀតថា៖ ក្រោយពេលក្លាយជាសមាជិក ក្រុមហ៊ុនទាំងអស់នោះអាចមានឱកាសជាច្រើនក្នុងការទំនាក់ទំនងជាមួយក្រុមហ៊ុនដទៃទៀតដើម្បីផ្សារភ្ជាប់កិច្ចសហការធ្វើជាដៃគូវិនិយោគ តាមរយៈការផ្តល់ឱកាសពីសំណាក់គ្រឹះស្ថានសភាពាណិជ្ជកម្មនៅក្នុងកិច្ចជំនួបពិភាក្សាជាប្រចាំដែលត្រូវបានកំណត់។
បន្ថែមពីនេះ វាកាន់តែមានភាពងាយស្រួលក្នុងការទទួលបានព័ត៌មានស្ដីពីគម្រោងនៃការវិនិយោគរបស់ក្រុមហ៊ុនជាតិ និងអន្តរជាតិនានា”។
លោកឧកញ៉ាបានបន្តថា ៖ “ជាធម្មតា ការវិនិយោគគឺចាំបាច់ណាស់ទៅលើកិច្ចទំនាក់ទំនង។ នៅក្នុងចំណោមសមាជិកទាំងជាង៥០០០ក្រុមហ៊ុន ពួកគេអាចមានឱកាសផ្សព្វផ្សាយព័ត៌មានលម្អិតរបស់ក្រុមហ៊ុនទៅកាន់មជ្ឈដ្ឋានខាងក្រៅដើម្បីឱ្យគេបានស្គាល់ និងដឹងពីចក្ខុវិស័យ ដឹងពីប្រភេទផលិតផលរបស់ខ្លួន ជាពិសេស ពួកគេអាចទទួលបានដំណោះស្រាយពីបញ្ហាដែលកើតមាននៅលើទីផ្សាររបស់ក្រុមហ៊ុនពីសំណាក់រាជរដ្ឋាភិបាលតាមរយៈគ្រឹះស្ថានសភាពាណិជកជ្ជកម្មដែលជាអ្នកតំណាង”។
លោកឧកញ៉ាបានមានប្រសាសន៍បញ្ជាក់ទៀតថា ៖ “ចំពោះល័ក្ខខ័ណ្ឌដែលចូលរួមជាសមាជិករបស់សភាពាណិជ្ជកម្មហាក់មិនមានអ្វីដែលជាឧបសគ្គនោះទេ សំខាន់ឱ្យតែជាក្រុមហ៊ុនស្របច្បាប់ មានប័ណ្ណប៉ាតង់ដែលចេញដោយក្រសួងពាណិជ្ជកម្ម។
ក្រៅពីនេះ ក្រុមហ៊ុនក៏ត្រូវចំណាយធនធានជាថវិកាក្នុងកម្រិតមួយយ៉ាងទាប ដែលជាការចូលរួមឧបត្ថម្ភសម្រាប់គាំទ្រគ្រឹះស្ថានសភាពាណិជកម្មជាប្រចាំឆ្នាំ ដែលការចំណាយទាំងនេះក៏ត្រូវបានបែងចែកតាមប្រភេទ និងតំណែងនៃសមាជិក”។
លោកឧកញ៉ាបានបន្តទៀតថា ៖ “ក្រុមហ៊ុនទាំងអស់ដែលមានបំណងចង់ចូលរួមជាសមាជិក អាចមកទំនាក់ទំនងដោយផ្ទាល់នៅការិល័យសភាពាណិជ្ជកម្មបានគ្រប់ពេល ជាមួយនឹងការទទួលបានព័ត៌មានលម្អិតស្ដីពីល័ក្ខខ័ណ្ឌផ្សេងៗ” ៕
