ដោយ វុត្ថា
ភ្នំពេញ៖ សម្តេតេជោ ហ៊ុន សែន ប្រមុខរដ្ឋាភិបាលកម្ពុជាបានជំរុញឱ្យប្រទេសកម្ពុជា និងទីម័រលេសបង្កើន និងពង្រីកកិច្ចសហប្រតិបត្តិការលើវិស័យសេដ្ឋកិច្ច និងវិនិយោគរវាងប្រទេសទាំងពីរឱ្យបានច្រើនឡើងថែមទៀត។
សម្តេចតេជោ នៅក្នុងជំនួបជាមួយលោក Dionisio Babo Soares រដ្ឋមន្ត្រីការបរទេសនៃប្រទេសទីម័រលេស (Timor-Leste) នៅវិមានសន្តិភាពនៅថ្ងៃទី៣ ខែមិថុនា ឆ្នាំ ២០១៩ នេះថា ពាក់ព័ន្ធនឹងទំនាក់ទំនងទ្វេភាគីរវាងប្រទេសទាំងពីរ គប្បីប្រឹងប្រែងរួមគ្នាធ្វើយ៉ាងណាជំរុញនៅលើរាល់អ្វីដែលយើងអាចធ្វើបានដើម្បីពង្រីកកិច្ចសហប្រតិបត្តិការរួមទាំងវិស័យ សេដ្ឋកិច្ច ពាណិជ្ជកម្ម វិស័យវិនិយោគ ទេសចរណ៍ ក៏ដូចជាវិស័យវប្បធម៌ជាដើមឱ្យបានកាន់តែច្រើនថែមទៀត។
លោក Babo Soares មន្ត្រីការបរទេស នៃប្រទេសទីម័រលេស (Timor-Leste) បានឱ្យដឹងថា ដំណើរទស្សនកិច្ចរបស់សម្ដេចតេជោ ទៅកាន់ប្រទេសទីម័រលេសកាលពីឆ្នាំ ២០១៦ បានធ្វើឱ្យប្រទេសទីម័រលេសក៏ដូចជាប្រជាពលរដ្ឋមានអារម្មណ៍ហាក់បីដូចជាប្រទេសមួយមានសម្ព័ន្ធភាពជាមួយកម្ពុជា ដូចជាប្រទេសជាបងប្អូន ។
លោក Babo Soares បានមានប្រសាសន៍ថា ក្នុងដំណើរទស្សនកិច្ចរបស់រូបលោកមកព្រះរាជាណាចក្រកម្ពុជានាពេលនេះគឺដើម្បីធ្វើនេះយ៉ាងណា រឹតចំណងមិត្តភាព និងពង្រឹងទំនាក់ទំនងកិច្ចសហប្រតិបត្តិការប្រទេសទាំងពីរលើគ្រប់វិស័យឱ្យកាន់តែរីកចម្រើនខ្លាំងក្លាឡើងថែមទៀត។
សម្ដេចតេជោនាយករដ្ឋមន្ត្រីបានបានមានប្រសាសន៍ថា ក្នុងដំណើរទស្សនកិច្ចនោះកាលពីឆ្នាំ ២០១៦ កន្លងទៅ សម្ដេចតេជោបានកត់សម្គាល់ថា ប្រទេសទីម័រលេសបានត្រៀមខ្លួនបានយ៉ាងល្អសម្រាប់ការចូលខ្លួនជាសមាជិកអាស៊ានទាំងការរៀបចំឱ្យមានស្ថានទូតនៅគ្រប់ប្រទេសទាំងអស់នៅក្នុងបណ្តាលប្រទេសអាស៊ានក៏ដូចជាសមត្ថភាពរបស់មន្ត្រីរាជការ រួមទាំងផ្នែកសេដ្ឋកិច្ច និងហិរញ្ញវត្ថុរបស់ប្រទេសទីម័រលេសផងដែរ៕
