ដោយ៖ ដួង ចន្ទ្រា
ភ្នំពេញ៖ ប្រមុខរាជរដ្ឋាភិបាលកម្ពុជា បានប្រកាសផ្តល់មូលនិធិ ១០០លានដុល្លារ ដើម្បីបង្កើតធនាគារសហគ្រាសធុនតូច និងមធ្យម (SME) នៅកម្ពុជាក្នុងគោលដៅដោះស្រាយមូលនិធិសម្រាប់សហគ្រាសក្នុងស្រុក ដើម្បីប្រកួតប្រជែងនាំចេញផលិតផលជាមួយប្រទេសក្នុងតំបន់។
ក្នុងឳកាសជួបសំណេះសំណាលជាមួយកម្មករ និយោជិតជាង ១៦,០០០នាក់នាព្រឹកថ្ងៃទី២០ ធ្នូនេះ សម្ដេចតេជោ ហ៊ុន សែន នាយករដ្ឋមន្ត្រីបានថ្លែងថា រាជរដ្ឋាភិបាល នឹងបង្កើតធនាគារសម្រាប់សហគ្រាសធុនតូច និងមធ្យម ដែលគ្រោងប្រើដើមទុន ១០០លានដុល្លារអាមេរិក។
សម្តេចបន្តន្តថា “មិនទាន់មានជាលាយលក្ខណ៍អក្សរទេ តែនេះសម្ដីនាយករដ្ឋមន្ត្រីនិយាយហើយត្រូវតែធ្វើ។សម្តេចតេជោបន្ថែមថា “ពេលខាងមុខយើងនឹងខិតខំបង្កើតមុខរបរនិងការងារធ្វើ ឲ្យបានកាន់តែច្រើនទៀតសម្រាប់ ពលរដ្ឋរបស់យើងបង្កើនតម្រូវការក្នុងស្រុក និងការនាំចេញរបស់យើងផងដែរ។
លោកឩកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមបានថ្លែងថា ក្នុងនាមវិស័យឯកជន លោកគាំទ្រនូវការផ្តួចផ្តើមគំនិតរបស់ប្រមុខរាជរដ្ឋាភិបាលកម្ពុជា ហើយកន្លងមកសម្ព័ន្ធសមាគមសហគ្រាសធុនតូច និងមធ្យមនៅកម្ពុជាតែងតែគិតគូររឿងនេះ ដើម្បីជួយដល់សមាជិក (SME) នៅកម្ពុជាដែលខ្វះទុនក្នុងការពង្រីកអាជីវកម្ម។លោកបន្តថា កន្លងមកសម្តេចតេជោនាយករដ្ឋមន្ត្រី ធ្លាប់បានបង្កើតយុទ្ធសាស្ត្រចតុកោណដំណាក់កាលទី៣ គឺកាត់បន្ថយផលិតផលសម្រេចចូល និងបង្កើនការផលិតក្នុងស្រុកចេញពីកសិកម្ម ជាផលិតផលអាហារដែលនេះ គោលការណ៍របស់សហគ្រាសក្នុងស្រុកចង់បានផងដែរ។
សហគ្រាសធុនតូច និងមធ្យមបានដើរតួនាទីយ៉ាងសំខាន់ ក្នុងការអភិវឌ្ឍសេដ្ឋកិច្ចជាតិនិងផ្តល់ឱកាសការងាររហូតដល់ទៅ៧៣ភាគរយនៃការងារសរុបនៅកម្ពុជា ។ ទន្ទឹមនោះសហគ្រាសទាំងនោះកំពុងតែជួបប្រទះនូវបញ្ហាជាច្រើន ក្នុងការប្រកបអាជីវកម្ម ដែលក្នុងនោះរួមមាន បញ្ហាហិរញ្ញប្បទានបច្ចេកវិទ្យាថ្មីៗ កង្វះខាតព័ត៌មាន និងការតភ្ជាប់ទំនាក់ទំនងរវាងសហគ្រាសមួយទៅសហគ្រាសមួយទៀតនៅមានកម្រិត។
យោងតាមរបាយការណ៍ជំរឿនឆ្នាំ២០១០របស់ក្រសួងផែនការ បានរកឃើញថា នៅកម្ពុជាមានសហគ្រាសតូចបំផុត សហគ្រាសធុនតូច និងមធ្យមចំនួន៦៣០,០០០សហគ្រាសនៅទូទាំងប្រទេស៕