ដោយ ម៉ាណេត
ភ្នំពេញៈ ធនាគារនិងគ្រឹះស្ថានមីក្រូហិរញ្ញវត្ថុចំនួន៣ បាននិងកំពុងបោះផ្សាយ និងត្រៀមបោះផ្សាយលក់មូលបត្របំណុល ជាប្រភេទសញ្ញាបណ្ណសាជីវកម្មដែលមានទំហំទឹកប្រាក់សរុបប្រមាណ៦៥លានដុល្លារអាមេរិកនៅលើផ្សារមូលបត្រកម្ពុជា។
ការបោះផ្សាយលក់មូលបត្របំណុល ជាប្រភេទសញ្ញាបណ្ណសាជីវកម្មខាងលើត្រូវបានអះអាងថា មានរយៈពេល៣ឆ្នាំ និងអត្រាការប្រាក់ពី៧ភាគរយ ទៅ៨,៥០ភាគរយក្នុងមួយឆ្នាំ។
“សញ្ញាប័ណ្ណសាជីវកម្ម ឬប័ណ្ណបំណុលដំបូងបំផុតនៅកម្ពុជាទី១” ត្រូវបានបោះផ្សាយជាសាធារណៈ ដោយគ្រឹះស្ថានមីក្រូហិរញ្ញវត្ថុហត្ថាកសិករលីមីតធីត ដែលបានទទួលលិខិតអនុញ្ញាតពី ធនាគារជាតិនៃកម្ពុជា រួចហើយសម្រាប់ការបោះផ្សាយមូលបត្របំណុល ជាប្រភេទសញ្ញាប័ណ្ណសាជីវកម្ម កាលពីថ្ងៃទី១ ខែសីហា ឆ្នាំ២០១៨។
សញ្ញាប័ណ្ណសាជីវកម្មដំបូងបំផុតនៅកម្ពុជាទី១” នឹងត្រូវបោះផ្សាយដោយគ្រឹះស្ថានមីក្រូហិរញ្ញហត្ថាកសិករ លីមីតធីត និងត្រូវធ្វើសំណើលក់ ក្នុងចំនួនប្រាក់ដើមសរុប៨០ ពាន់លានរៀល (២០លានដុល្លារ) ជាមួយនឹងលទ្ធភាពដែលអាចលក់បន្ថែមរហូតដល់ ៤០ ពាន់លានរៀល ក្នុងករណីមានតម្រូវការលើសពីវិនិយោគិនគោលដៅ ។
សញ្ញាប័ណ្ណសាជីវកម្មមានរយៈពេលបីឆ្នាំ និងអត្រាការប្រាក់ប្រចាំឆ្នាំរបស់សញ្ញាប័ណ្ណគឺពី៧,៥០ ភាគរយ ទៅ៨,៥០ ភាគរយ។
លោក ឧកញ៉ា ហួត អៀងតុង ប្រធានអគ្គនាយក នៃគ្រឹះស្ថានមីក្រូហិរញ្ញវត្ថុហត្ថាកសិករ លីមីតធីត បានថ្លែងថា “ខ្ញុំពិតជាមានមោទភាពណាស់ដែលធនាគារជាតិ នៃកម្ពុជាបានចេញលិខិតមិនជំទាស់ ចំពោះការបោះផ្សាយនូវសញ្ញាប័ណ្ណសាជីវកម្មរបស់ហត្ថាកសិករ លីមីតធីត”។លោកបន្តថា “យើងនឹងក្លាយជាក្រុមហ៊ុនទីមួយក្នុងប្រវត្តិសាស្រ្តរបស់កម្ពុជាដែលបោះផ្សាយមូលបត្របំណុល”។
ជាមួយសញ្ញាបណ្ណសាជីវកម្មទី២ គ្រឹះស្ថានមីក្រូហិរញ្ញវត្ថុអិលអូអិលស៊ី (ខេមបូឌា) ភីអិលស៊ី ( LOLC ) ដែលជាគ្រឹះស្ថានមីក្រូហិរញ្ញវត្ថុទទួលប្រាក់បញ្ញើឈានមុខគេមួយ នៅក្នុងប្រទេសកម្ពុជាបានទទួល ការអនុញ្ញាតជាផ្លូវការពីធនាគារជាតិនៃកម្ពុជា លើការបោះផ្សាយលក់មូលបត្របំណុល ឬសញ្ញាប័ណ្ណជាប្រភេទសញ្ញាបណ្ណសាជីវកម្ម នៅថ្ងៃទី២២ ខែកុម្ភៈ ឆ្នាំ២០១៩។
ទំហំនៃការបោះផ្សាយសញ្ញាបណ្ណសាជីវកម្មនេះ មានទំហំទឹកប្រាក់សរុប៨០ពាន់ លានរៀល(២០ លានដុល្លារ) ដែលនេះជាលើកទីមួយហើយដែល គ្រឹះស្ថានមីក្រូហិរញ្ញវត្ថុ អិលអូអិលស៊ី (ខេមបូឌា) ភីអិលស៊ី ធ្វើការបោះផ្សាយ នឹងចុះបញ្ជីសញ្ញាបណ្ណនេះក្នុង ក្រុមហ៊ុនផ្សារមូលបត្រកម្ពុជា។
សញ្ញាបណ្ណនេះមានឥណប្រតិទានចំនួន៣ឆ្នាំ ហើយអត្រាការប្រាក់(គូរប៉ុង) នឹងត្រូវសម្រេចមុនពេលធ្វើបរិវិសកម្ម។
ប្រធាននាយកប្រតិបត្តិរបស់គ្រឹះស្ថានមីក្រូហិរញ្ញវត្ថុ អិលអូអិលស៊ី (ខេមបូឌា) ភីអិលស៊ី លោកអ៊ិន វឿនបានលើកឡើងថា “ពួកយើងមានភាពរីករាយណាស់ ដែលបានទទួលការអនុញ្ញាតពីធនាគារជាតិនៃកម្ពុជា លើសំណើបោះផ្សាយសញ្ញាបណ្ណសាជីវកម្មលើកដំបូងរបស់ពួកយើង”។លោកបន្តថា “នេះជាឱកាសមួយដែលអនុញ្ញាតឱ្យពួកយើងផ្តល់ជូនទីផ្សារនូវផលិតផលហិរញ្ញវត្ថុថ្មីមួយគឺ សញ្ញាបណ្ណសាជីវកម្ម ដែលមានការការពារហានិភ័យអត្រាប្តូរប្រាក់”។
សញ្ញាបណ្ណសាជីវកម្មទី៣ ធនាគារABA (ធនាគារវឌ្ឍនៈអាស៊ីចំកាត់)បានប្រកាសជាធារណៈកាលពីថ្ងៃទី ៣១ ខែ ឧសភាថា ខ្លួននឹងបោះផ្សាយសញ្ញាបណ្ណសាជីវកម្ម ឬមូលបត្របំណុលដែលមានតម្លៃ២៥លានដុល្លារ ដាក់លក់នៅលើទីផ្សារមូលបត្រកម្ពុជា។
ធនាគារ វឌ្ឍនៈ អាស៊ី ចំកាត់ (ABA Bank) ដែលជាសមាជិកសម្ពន្ធធនាគារជាតិកាណាដា សូមប្រកាសនៅថ្ងៃនេះថា ធនាគារទទួលបានការអនុម័តពីធនាគារជាតិនៃកម្ពុជា ដើម្បីចាប់ផ្តើមដំណើរការរៀបចំការបោះផ្សាយ សញ្ញាបណ្ណសាជីវកម្មរបស់ខ្លួននៅលើផ្សារមូលបត្រកម្ពុជា (CSX)។
ធនាគារ ABA គ្រោងនឹងបោះផ្សាយសញ្ញាបណ្ណ សាជីវកម្មជាសាធារណៈ ក្នុងទំហំទឹកប្រាក់សរុប១០០ ពាន់លានរៀល (២៥ លានដុល្លារអាមេរិក)។
សញ្ញាបណ្ណនេះ មានរយៈពេល៣ ឆ្នាំ និងអត្រាការប្រាក់ពី៧ភាគរយ ទៅ ៧,៧៥ ភាគរយក្នុងមួយឆ្នាំ។ ធនាគារ ABA នឹងដាក់ជូនឯកសារផ្តល់ព័ត៌មាន ដើម្បីស្នើសុំការអនុម័តយល់ព្រម ក្នុងការបោះផ្សាយនេះ ពីគណៈកម្មការមូលបត្រកម្ពុជា (SECC) សម្រាប់នីតិវិធីបន្តទៀត។ យើងរំពឹងថាសញ្ញាបណ្ណនេះ នឹងត្រូវចុះបញ្ជីលក់ នៅលើផ្សារមូលបត្រកម្ពុជា (CSX)។
ទឹកប្រាក់ បានពីការបោះផ្សាយលក់សញ្ញាបណ្ណ នឹងត្រូវយកមកប្រើសម្រាប់ការចំណាយលើប្រតិបត្តិការ ក៏ដូចជា បង្កើនចំនួនប្រាក់កម្ចីសម្រាប់អាជីវកម្ម ដែលនឹងគាំទ្រដល់អាជីវកម្មខ្នាតតូចបំផុត សហគ្រាសធុនតូចនិងមធ្យម ដែលរួមមានសហគ្រិនស្ត្រីនៅកម្ពុជាផងដែរ។
ក្រុមហ៊ុន SBI Royal Securities គឺជាទីប្រឹក្សាហិរញ្ញវត្ថុ និងក្រុមហ៊ុនធានាទិញមូលបត្រតែមួយគត់ សម្រាប់ការបោះផ្សាយនេះ៕
