ដោយ ម៉ាណេត
ភ្នំពេញៈ រដ្ឋាភិបាលមានសុទិដ្ឋនិយម នឹងអាចប្រមូលប្រាក់ចំណូលពន្ធ ៧០លានដុល្លារពីវិស័យកាស៊ីណូនៅឆ្នាំ២០១៩ ខណៈ២០១៨ កម្ពុជាប្រមូលពន្ធបានគិតជាទឹកប្រាក់ចំនួន៤៦លានដុល្លារអាមេរិក។ នេះបើយោងតាមគេហទំព័រ GGR Asia ចុះផ្សាយកាលពីម្សិលមិញនេះ។
លោក រស់ ភារុន អ្នកនាំពាក្យនៃក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា អាជ្ញាធរនៅកម្ពុជាបានផ្តល់អាជ្ញាប័ណ្ណកាស៊ីណូចំនួន១៣ ក្នុងរយៈពេល៤ខែដំបូងនៃឆ្នាំនេះ ខណៈអាជ្ញាធរបានផ្តល់អាជ្ញាប័ណ្ណកាស៊ីណូសរុបចំនួន១៦៣មកហើយរហូតមកដល់ពេលនេះ។ លោកភារុនបានឲ្យដឹងថា អាជ្ញាប័ណ្ណចំនួន៩១ ត្រូវបានបង្កើតឡើងសម្រាប់កាស៊ីណូនៅខេត្តព្រះសីហនុ ដែលជាតំបន់មួយដែលរួមបញ្ចូលទិសដៅកាស៊ីណូនៅប៉ែកខាងត្បូង ខេត្តព្រះសីហនុ។
-->
លោកមានប្រសាសន៍ថា “យើងបានផ្តល់អាជ្ញាប័ណ្ណច្រើន ប៉ុន្តែមានតែកាស៊ីណូចំនួន៥១ប៉ុណ្ណោះដែលកំពុងដំណើរការ។ ចំណែកចំនួននៅសល់កំពុងត្រូវបានសាងសង់ ខណៈដែលមួយចំនួនបានផ្អាកប្រតិបត្តិការ”។ លោកបានមានប្រសាសន៍ថា “ការកើនឡើងនៃចំនួនកាស៊ីណូ បានឆ្លុះបញ្ចាំងពីការកើនឡើងនៃភ្ញៀវទេសចរ ជាពិសេសប្រទេសចិន”។
លោករស់ ភារុនបានឲ្យដឹងថា រដ្ឋាភិបាលរំពឹងទុកថា នឹងប្រមូលចំណូលពន្ធបាន ៧០ដុល្លារពីវិស័យកាស៊ីណូនៅឆ្នាំ បើធៀបនឹងឆ្នាំមុនពន្ធពីវិស័យប្រមូលបានត្រឹមតែ៤៦ លានដុល្លារ។
លោកបានបន្ថែមថា ក្រសួងពាក់ព័ន្ធបានបញ្ចប់ការធ្វើសេចក្តីព្រាងច្បាប់ គ្រប់គ្រងវិស័យកាស៊ីណូ ហើយសេចក្តីព្រាងច្បាប់នេះនឹងត្រូវបញ្ជូនទៅទីស្ដី ការគណៈរដ្ឋមន្រ្តីក្នុងពេលឆាប់ៗខាងមុខ ដើម្បីពិនិត្យមើលការអនុម័តច្បាប់នេះ។
លោកបានមានប្រសាសន៍ថា “ជាមួយនឹងច្បាប់នេះយើងសង្ឃឹមថា នឹងទាក់ទាញវិនិយោគិនកាស៊ីណូធំៗ និងបង្កើនប្រាក់ចំណូលពីវិស័យនេះ។ ខ្ញុំគិតថាជាលទ្ធផលនៃច្បាប់នេះ ប្រាក់ចំណូលប្រមូលបានពីវិស័យនេះនឹងកើនទ្វេដង”៕
