ដោយ វុត្ថា
ភ្នំពេញៈ រដ្ឋាភិបាលចិន តាមរយៈធនាគារជាតិកណ្តាលរបស់ខ្លួន (People’s Bank of China) បានប្តេជ្ញាក្នុងការគាំទ្រថវិកាលើការសាងសង់ ទីក្រុងសៀងហៃឱ្យប្រែក្លាយទៅជាមជ្ឈមណ្ឌលហិរញ្ញវត្ថុអន្តរជាតិនាពេលខាងមុខ។
លោក Yi Gang ប្រធានធនាគារប្រជានជននៃប្រទេសចិន (PBOC) បានថ្លែងនៅក្នុងវេទិកា Lujiazui ក្នុងទីក្រុងស៊ងហៃកាលពីពេលថ្មីៗនេះថា ធនាគារប្រជាជនចិន (PBOC) នឹងគាំទ្រការបង្កើតប្រព័ន្ធគណនេយ្យរួម សម្រាប់រូបិយប័ណ្ណចិន និងរូបិយប័ណ្ណបរទេសដែលជាផ្នែកថ្មីមួយ នៃតំបន់ពាណិជ្ជកម្មសេរីទីក្រុងសៀងហៃ។
-->
លោកបន្តថា PBOCក៏នឹងបន្តធ្វើឱ្យប្រសើរឡើង នូវទីផ្សាររូបិយប័ណ្ណទីផ្សារមូលបត្រ និងទីផ្សារមូលបត្របំណុលសាជីវកម្មអន្តរជាតិ ដើម្បីពង្រីកជម្រើសនៃការផ្លាស់ប្តូររូបិយប័ណ្ណបរទេស និងពង្រីកចំនួនអង្គភាពទីផ្សារ។
ធនាគារកណ្តាលក៏នឹងគាំទ្រ ដល់កិច្ចសហប្រតិបត្តិការរវាងផ្សារហ៊ុនមាសទីក្រុងសៀងហៃ និងផ្សារដោះដូរទំនិញពីទីក្រុងឈីកាហ្គោ (Chicago Mercantile Exchange) ដោយផ្អែកកម្មវិធី Shanghai Gold Benchmark Price ស្តីពីផ្សារដោះដូរទំនិញទីក្រុងឈីកាហ្គោ (CME)។
លោក Yi ក៏បានឱ្យដឹងផងដែរថា “ធនាគារកណ្តាលនឹងគាំទ្រដល់ការបង្កើតក្រុមហ៊ុនបុត្រសម្ព័ន្ធ ដោយស្ថាប័នហិរញ្ញវត្ថុបរទេសនៅសៀងហៃ និងការបង្កើតក្រុមប្រឹក្សាភិបាលនៃវិទ្យាសាស្ត្រ និងបច្ចេកវិទ្យាដែលបានចាប់ផ្តើមកាលពីថ្ងៃព្រហស្បតិ៍ នៅក្នុងទីក្រុងសៀងហៃ”។
លោកថា កិច្ចខិតខំប្រឹងប្រែងនេះ ត្រូវបានធ្វើឡើងដើម្បីកសាងទីក្រុងស៊ាងហៃឱ្យទៅជាមជ្ឈមណ្ឌលសកលសម្រាប់ការបម្រុងទុក និងការគ្រប់គ្រងហានិភ័យនៃទ្រព្យសម្បត្តិហិរញ្ញវត្ថុជាប្រាក់យ័ន ខណៈដែលអ្នកគ្រប់គ្រងទ្រព្យសកម្មសកល បានបង្កើនតួនាទីរបស់ពួកគេនៅក្នុងទ្រព្យសម្បត្តិទាំងនោះ។
ទីក្រុងសៀងហៃ ស្ថិតនៅលើឆ្នេរសមុទ្រកណ្ដាលនៃប្រទេសចិន ជាទីក្រុងធំបំផុតរបស់ប្រទេស និងជាមជ្ឈមណ្ឌលហិរញ្ញវត្ថុសកល។ ទីក្រុងនេះជាកន្លែងដើរកំសាន្តតាមមាត់សមុទ្រដ៏ល្បីល្បាញ ជាមួយនឹងការគយគន់អាគារសល់ពីសម័យអាណានិគម។ ទីក្រុងនេះមានអាកាសធាតុល្អជាងបណ្តាទីក្រុងនានា ហើយមានប្រជាពលរដ្ឋចិនរស់នៅប្រមាណ២៦,៣២ លាននាក់នៅក្នុងឆ្នាំ ២០១៩ នេះ៕
