ដោយ វុត្ថា
ចិន៖ ក្រុមហ៊ុនផលិតម៉ូតូអាមេរិកដ៏ធំមួយបានសហការជាមួយក្រុមហ៊ុនចិន ដោយវិនិយោគលើការផលិតម៉ូតូដែលមានតម្លៃសមរម្យសម្រាប់ដាក់លក់ក្នុងទីផ្សារប្រទេសចិន ខណៈសង្គ្រាមពាណិជ្ជកម្មនៃប្រទេសទាំងពីរនៅតែបន្ត។
ក្រុមហ៊ុនផលិតម៉ូតូអាមេរិកបោះទុនវិនិយោគនៅចិន ខណៈសង្គ្រាមពាណិជ្ជកម្មរវាងប្រទេសទាំងពីរនៅតែបន្ត
លោក Lu Kang អ្នកនាំពាក្យក្រសួងការបរទេសចិនបានឱ្យដឹងកាលពីថ្ងៃសុក្រម្សិលមិញ ប្រទេសចិនតែងតែស្វាគមន៍ដល់សហគ្រាសបរទេសក្នុងការវិនិយោគ និងចាប់ផ្តើមអាជីវកម្មដើម្បីចែករំលែកនូវឱកាសអភិវឌ្ឍន៍របស់ខ្លួននៅក្នុងប្រទេសចិន។
យោងតាមរបាយការណ៍ប្រព័ន្ធផ្សព្វផ្សាយនៅក្នុងស្រុកមួយបានឱ្យដឹងថា ក្រុមហ៊ុន Zhejiang Qianjiang Motorcycle Co. , Ltd របស់ចិន បានចុះហត្ថលេខាលើកិច្ចព្រមព្រៀងសហប្រតិបត្តិការមួយជាមួយក្រុមហ៊ុន Harley-Davidson Inc. ដែលជាក្រុមហ៊ុនផលិតម៉ូតូអាមេរិកដ៏ធំមួយ ដើម្បីសហការតម្លើងម៉ូតូតូចៗដែលមានតម្លៃសមរម្យដែលគ្រោងនឹងចាប់ផ្តើមលក់នៅទីផ្សារប្រទេសចិននៅចុងឆ្នាំ២០២០ខាងមុខ ។
លោក Lu Kang បានឆ្លើងតបទៅសំនួរអ្នកសារព័ត៌មាននៅក្នុងសន្និសីទកាសែតមួយអំពីកិច្ចព្រមព្រៀងនេះថា “នេះគឺជាកិច្ចសហប្រតិបត្តិការពាណិជ្ជកម្មធម្មតា” ។
លោកបន្តថា “ដូចដែលខ្ញុំបានលើកឡើងជាច្រើនដងហើយជំនួញជាច្រើនត្រូវបានជ្រើសរើសវិនិយោគដោយផ្អែកលើផលប្រយោជន៍ផ្ទាល់ខ្លួន និងច្បាប់ទីផ្សារ”។
លោក Lu បានបន្ថែមថា “ភស្តុតាងជាច្រើនបានបង្ហាញថា ក្រុមហ៊ុនបរទេសភាគច្រើនមានទស្សនៈវិជ្ជមានចំពោះសក្តានុពលទីផ្សារដ៏ធំរបស់ប្រទេសចិន និងការកែលម្អបរិយាកាសធុរកិច្ចឥតឈប់ឈររបស់ចិនលើបញ្ហាសក្តានុពលវិនិយោគ”។
សង្គ្រាមពាណិជ្ជកម្មរវាងចិន និងអាមេរិកនៅបន្តកើតឡើង មិនទាន់មានដំណោះស្រាយនៅឡើយ ដែលបង្កឱ្យពិភពលោកមានការព្រួយបារម្ភចំពោះការធ្លាក់ចុះសេដ្ឋកិច្ចសេដ្ឋកិច្ច។
លោក Trump កាលពីខែមុនបានបញ្ជា ឱ្យតម្លើងពន្ធនាំចូលចំនួន ២៥ភាគរយលើទំនិញរបស់ចិន ដែលមានតម្លៃ ២០០ពាន់លានដុល្លារ ហើយបានគម្រាមបង្កើនផលិតផលបន្ថែមទៀតដែលមានតម្លៃ ៣០០ពាន់លានដុល្លារ៕
