ដោយ វុត្ថា
ភ្នំពេញៈ គិតត្រឹមរយៈពេល៦ឆ្នាំ គឺចាប់ពីឆ្នាំ ២០១៤-២០១៩ រដ្ឋាភិបាលនៃប្រទេសស៊ុយអែត បានផ្តល់ហិរញ្ញវប្បទានឥតសំណងប្រមាណ១២០០លានក្រោន ស្មើនឹង ១២៥លានដុល្លារសហរដ្ឋាអាមេរិកសម្រាប់ ដើម្បីចូលរួមអភិវឌ្ឍសេដ្ឋកិច្ច-សង្គមកម្ពុជា។
យោងតាមសេចក្តីប្រកាសព័ត៌មាន របស់ក្រុមប្រឹក្សាអភិវឌ្ឍន៍កម្ពុជា (CDC)ដែលចេញផ្សាយនៅថ្ងៃទី២៥ ខែមិថុនា ឆ្នាំ ២០១៩ នេះបានឱ្យដឹងថា យុទ្ធសាស្ត្រស្តីពីកិច្ចសហប្រតិបត្តិការអភិវឌ្ឍន៍អន្តរជាតិ របស់ស៊ុយអែតជាមួយកម្ពុជា សម្រាប់ឆ្នាំ ២០១៤-២០១៨ ត្រូវបានប្រកាសឱ្យអនុវត្តជាផ្លូវការកាលពីខែសីហា ឆ្នាំ២០១៤ ដោយផ្តោតលើវិស័យចំនួន ៣ រួមមាន៖ ១) វិស័យអភិបាលកិច្ច សមភាពយេនឌ័រ និងសិទ្ធិមនុស្ស ២) វិស័យអប់រំ និងការងារ និង ៣) វិស័យបរិស្ថាន និងការប្រែប្រួលអាកាសធាតុ។
-->
សេចក្តីប្រកាសព័ត៌មានដដែលបន្តថា ទន្ទឹមនឹងនេះការអនុវត្តយុត្តសាស្ត្រនេះ ត្រូវបានពន្យាពេលរហូតដល់ចុងឆ្នាំ២០១៩ ដោយភាគីស៊ុយអែត បានសម្រេចផ្តល់ហិរញ្ញប្បទានឥតសំណងសរុបប្រមាណ ១២០០លានក្រោន សមមូលនឹង១២៥លានដុល្លារអមេរិក។
លោក ឈៀង យ៉ាណារ៉ារដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការគណៈកម្មាធិការនិតិសម្បទា និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា និងលោកស្រី Maria Sargen ឯកអគ្គរាជទូតស៊ុយអែតប្រចាំនៅកម្ពុជា នៅថ្ងៃទី២៥ខែមិថុនា ឆ្នាំ ២០១៩ នេះ បានបន្តពិភាក្សាអំពីដំណើរការរៀបចំយុទ្ធសាស្ត្រថ្មីរបស់ស៊ុយអែតស្តីពី កិច្ចសហប្រតិបត្តិការអភិវឌ្ឍន៍អន្តរជាតិជាមួយកម្ពុជា សម្រាប់ឆ្នាំ២០២០-២០២៤ ក៏ដូចជាពិភាក្សា និងផ្លាស់ប្តូរយោបល់លើកិច្ចសហប្រតិបត្តិការអភិវឌ្ឍន៍កម្ពុជា-ស៊ុយអែតនាពេលអនាគត។
យុទ្ធសាស្ត្រថ្មីស្តីពី កិច្ចសហប្រតិបត្តិការអភិវឌ្ឍន៍អន្តរជាតិជាមួយកម្ពុជា ឆ្នាំ ២០២០-២០២៤ នឹងបន្តអនុវត្ត និងពង្រឹងបន្ថែមទៅលើភាពជោគជ័យ និងសមិទ្ធផលនានាដែលសម្រេចបានដោយយុទ្ធសាស្ត្រឆ្នាំ ២០១៤-២០១៩ ។ ដើម្បីមានសង្កតិភាពជាមួយនឹងផែនការ និងយុទ្ធសាស្ត្រអភិវឌ្ឍន៍ជាតិរបស់រាជរដ្ឋាភិបាល រួមមាន៖ យុទ្ធសាស្ត្រចតុកោណដំណាក់កាលទី៤ ផែនការយុទ្ធសាស្ត្រអភិវឌ្ឍន៍ជាតិឆ្នាំ ២០១៩-២០២៣ ក្របខណ្ឌគោលដៅអភិវឌ្ឍន៍ ប្រកបដោយចីរភាពកម្ពុជាឆ្នាំ២០១៦-២០៣០ និងយុទ្ធសាស្ត្រតាមវិស័យសេចក្តីព្រាងយុទ្ធសាស្ត្រនេះ នឹងត្រូវពិគ្រោះយោបល់ជាមួយក្រសួង និងស្ថាប័នរាជរដ្ឋាភិបាលកម្ពុជា និងភាគីពាក់ព័ន្ធ ដើម្បីប្រមូលធាតុចូល និងអនុសាសន៍បន្ថែម។
ជាមួយគ្នានេះយុទ្ធសាស្ត្រថ្មីនេះ នឹងចូលរួមចំណែកក្នុងការអនុវត្តយុទ្ធសាស្ត្រស្តីពីកិច្ចសហប្រតិបត្តិការអភិវឌ្ឍន៍ និងភាពជាដៃគូ ឆ្នាំ ២០១៩-២០២៣ ដែលផ្តោតសំខាន់លើការពង្រឹងភាពជាម្ចាស់របស់រាជរដ្ឋាភិបាល និងការជំរុញភាពជាដៃគូប្រកបដោយបរិយាប័ន្ន និងលទ្ធផលក្នុងកិច្ចអភិវឌ្ឍន៍នៅកម្ពុជា។
ការរៀបចំយុទ្ធសាស្ត្រសម្រាប់រយៈពេល៥ឆ្នាំ ២០២០-២០២៤ នាពេលនេះ គឺជាសក្ខីភាព នៃការប្តេជ្ញាបន្តគាំទ្ររបស់រាជរដ្ឋាភិបាលស៊ុយអែត ក្នុងដំណើរការនៃកិច្ចអភិវឌ្ឍន៍ប្រកបដោយចីរភាពរបស់រាជរដ្ឋាភិបាលកម្ពុជា ក៏ដូចជាឆ្លុះបញ្ចាំងពីកិច្ចសហប្រតិបត្តិការ និងភាពជាដៃគូដ៏ល្អប្រសើររវាងរាជរដ្ឋាភិបាលកម្ពុជា និងស៊ុយអែត៕
