ដោយៈ រ៉ាណេត
ភ្នំពេញៈ មន្រ្តីជាន់ខ្ពស់សភាពាណិជ្ជកម្មកម្ពុជាបានទទូច និងស្នើដល់រាជរដ្ឋាភិបាលកម្ពុជា រៀបចំបង្កើតច្បាប់គ្រប់គ្រង់ការប្រកួតប្រជែប្រកបដោយតម្លាភាព ដើម្បីជួយសម្រួល និងលើកទឹកចិត្តដល់បណ្តាសហគ្រាសខ្នាតតូច និងមធ្យមមានលទ្ធភាពក្នុងការដណ្ដើមបានចំណែកទីផ្សារ។
អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី២៨ មិថុនានេះថា ការអនុវត្តគោលការណ៍ទីផ្សារស៊េរី បានក្លាយទៅជាឧបសគ្គ និងជារនាំងមួយសម្រាប់បណ្តាសហគ្រាសខ្នាតតូច និងមធ្យមក្នុងការប្រកួតប្រជែងគ្នានៅលើទីផ្សាររួម។
-->
លោកបន្តទៀតថា “រាជរដ្ឋាភិបាលបានដាក់ឱ្យអនុវត្តន៍ នូវគោលនយោបាយបើកចំហរជើងមេឃ ដើម្បីអាចគៀងគរនូវចំនួនអ្នកវិនិយោគអន្តរជាតិនានាមកកាន់កម្ពុជា”។ លោកឧកញ៉ាបានបន្តទៀតថា “គោលនយោបានមួយនេះមានភាពល្អប្រសើរជាខ្លាំង ដែលបានជួយចូលរួមលើកទឹកចិត្ត ដល់បណ្តាអ្នកវិនិយោគចូលមកកាន់កម្ពុជា និងពង្រីកបាននូវកំណើនសេដ្ឋកិច្ចជាតិជាប់ជាប្រចាំឆ្នាំក្នុងរង្វង់ជា៧ភាគរយ”។
ប៉ុន្តែលោកឧកញ៉ាលឹម ហេងបានថ្លែងថា នៅក្នុងបរិបថនៃការអនុវត្តគោលការណ៍ទីផ្សារស៊េរី ថ្វីត្បិតតែអាចគៀងគរនូវកំណើនអ្នកវិនិយោគបានកាន់តែច្រើន ប៉ុន្តែវាក៏ជះឥទ្ធពលអវិជ្ជមានដល់បណ្តាក្រុមហ៊ុន ឬសហគ្រាសខ្នាតតូច និងមធ្យមផងដែរ។
លោកឧកញ៉ាលឹម ហេង បានមានប្រសាសន៍បន្តទៀតថា លទ្ធផលក្រោយការប្រកួតប្រជែងគឺមានអ្នកឈ្នះ និងអ្នកចាញ់។ ក្រុមហ៊ុនធំៗដែលមានដើមទុនច្រើន អាចវាយផ្តួលដៃគួរប្រជែងប្រជែង ដែលជាក្រុមហ៊ុនតូចៗបានងាយស្រួល។
លោកបានលើកឧទាហរណ៍មកបញ្ជាក់ថា ក្រុមហ៊ុនធំដែលមានលុយច្រើន ហើយលក់ផលិតផលដូចគ្នា គេអាចលក់ក្នុងតម្លៃមួយទាបជាងទីផ្សារ រហូតធ្វើឱ្យដៃគូប្រកួតប្រជែងរបស់ខ្លួនដែលមានលុយតិច ពិបាកក្នុងការទទួលបានចំណែកទីផ្សារ ហើយអាចបិតទ្វារក្នុងរយៈពេលខ្លីដោយសារតែខ្វះលទ្ធភាពក្នុងការឈរជើង។
លោកបានបន្តទទៀតថា “នៅពេលក្រុមហ៊ុនតូចបិទទ្វារ ក្រុមហ៊ុនដែលធំអាចលក់តម្លើងថ្លៃវិញបាន។ ការប្រកួតប្រជែងក្នុងរូបភាពបែបនេះ វាជារនាំងឧបសគ្គសំខាន់របស់បណ្តាសហគ្រាសខ្នាតតូច និងមធ្យម ដែលទាមទាសុំឱ្យមានការចូលរួមពីសំណាក់រាជរដ្ឋាភិបាល”។
អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍ទៀតថា ដើម្បីបញ្ចៀសនូវបញ្ហា ក៏ដូចជាជួយលើកទឹកចិត្តដល់បណ្តាសហគ្រាសខ្នាតតូច និងមធ្យម គឺត្រូវមានការការពារពីសំណាក់រដ្ឋាភិបាលជាចាំបាច់។ លោកឧកញ៉ាបានបន្តទៀតថា កាលពីពេលកន្លងទៅ រាជរដ្ឋាភិបាលធ្លាប់បានធ្វើរួចទៅហើយ ដូចជាការកំណត់តម្លៃប្រេងឥន្ទនៈ ការកំណត់តម្លៃបណ្តាញសេវាទូរស័ព្ទជាដើម។
លោកបានបន្តថា “ការប្រកួតប្រជែងនៅលើទីផ្សារស៊េរី ក៏ត្រូវតែមានការកំណត់ដែលគ្រប់គ្រងដោយច្បាប់ ដើម្បីលើកទឹកចិត្ត និងផ្តល់លទ្ធភាពដល់ក្រុមហ៊ុនតូចៗមានឱកាសអាចចូលរួមប្រកួតប្រជែងបាន”។
ជាការចូលរួមលើកទឹកចិត្តដល់បណ្តាសហគ្រាសខ្នាតតូច និងមធ្យម កាលពីពេលកន្លងទៅនេះ តាមរយៈក្រសួងសេដ្ឋកិច្ច និងហិរញ្ញវត្ថុ បានអនុគ្រោះដល់បណ្តាសហគ្រាសនានា ដែលស្ម័គ្រចុះបញ្ជីស្របច្បាប់ ក្រសួងបានអនុញ្ញាតមិនយកពន្ធរហូតដល់៣ឆ្នាំបន្ទាប់ពីចុះបញ្ជី៕
