ដោយ Donald Lee
ភ្នំពេញៈ រដ្ឋាភិបាលអាមេរិកបានស្នើសុំឲ្យរដ្ឋាភិបាលកម្ពុជា ជួយកំណត់ក្រុមហ៊ុនចិន ដែលព្យាយាមគេចវេះពន្ធគយពីអាមេរិក នៅតំបន់សេដ្ឋកិច្ចពិសេសខេត្តព្រះសីហនុ។
អ្នកនាំពាក្យស្ថានទូតអាមេរិក លោកស្រី Emily Zeeberg បានថ្លែងនៅក្នុងសេចក្តីថ្លែងការណ៍មួយតាមសារអេឡិចត្រូនិចកកាលពីសប្តាហ៍មុនថា យើង (សហរដ្ឋអាមេរិក) សូមអំពាវនាវដល់អាជ្ញាធររដ្ឋាភិបាលកម្ពុជា ឲ្យពិនិត្យមើលយ៉ាងយកចិត្តទុកដាក់លើបញ្ហាអភិបាលកិច្ច និងការអនុលោម ទៅតាមច្បាប់នៅតំបន់សេដ្ឋកិច្ចពិសេសខេត្តព្រះសីហនុ។
-->
លោកស្រីបានបន្ថែមថា “សហរដ្ឋអាមេរិកនឹងធ្វើការចោទប្រកាន់ ចំពោះការគេចវេសពីកាតព្វកិច្ចពន្ធ និងប្រើប្រាស់គ្រប់ឧបករណ៍ច្បាប់ដែលអាចរកបាន ដើម្បីរារាំងអ្នករំលោភលើច្បាប់គយ និងច្បាប់របស់សហរដ្ឋអាមេរិក”។
រដ្ឋាភិបាលអាមេរិកបាននិយាយថា ខ្លួនបានចងក្រងឯកសារពីរករណីចាប់តាំងពីឆ្នាំ២០១៧របស់ក្រុមហ៊ុនចិន ដោយប្រើប្រាស់តំបន់សេដ្ឋកិច្ចពិសេសខេត្តព្រះសីហនុ ជាចំណុចឆ្លងកាត់មួយ ដើម្បីផ្លាស់ប្តូរប្រភពដើមនៃការនាំចូលទៅសហរដ្ឋអាមេរិក។ វាបានកត់សម្គាល់ថា មន្រ្តីអាមេរិកបានរកឃើញក្រុមហ៊ុនចិន ដែលព្យាយាមនាំចេញសារធាតុ glycine និងបំពង់ដែក ដែលមានប្រភពដើមពីប្រទេសចិនតាមរយៈតំបន់សេដ្ឋកិច្ចនេះ។
អ្នកនាំពាក្យរូបនេះបាននិយាយថា “ក្នុងករណីទាំងពីរនេះ មន្រ្តីអាមេរិកបានធ្វើការត្រួតពិនិត្យនៅនឹងកន្លែង នៅក្នុងតំបន់សេដ្ឋកិច្ចពិសេសខេត្តព្រះសីហនុ ហើយបានកំណត់ថាបើទោះបីជាតំណាងឲ្យកម្ពុជាក៏ដោយ ក៏ទំនិញដែលត្រូវចោទសួរពីប្រភពដើមរបស់ចិននៅពេលនាំចូលទៅសហរដ្ឋអាមេរិក”។
អ្នកគ្រប់គ្រងតំបន់សេដ្ឋកិច្ចពិសេសខេត្តព្រះសីហនុ បានបដិសេធថា ក្រុមហ៊ុនចិនមិនត្រូវបានពិន័យទេ ឬត្រូវជាប់ពាក់ព័ន្ធក្នុងការធ្វើខុសណាមួយដឡើយ។
លោក Cao Jianjiang អគ្គនាយកតំបន់សេដ្ឋកិច្ចពិសេស ខេត្តព្រះសីហនុបាននិយាយថា “យើងមានការសោកស្តាយយ៉ាងខ្លាំង ចំពោះការខូចខាតដល់កេរ្តិ៍ឈ្មោះតំបន់សេដ្ឋកិច្ចពិសេសខេត្តព្រះសីហនុ ដែលបណ្តាលមកពីរបាយការណ៍មិនពិតខាងលើ”។
រដ្ឋាភិបាលកម្ពុជា ក៏បានបដិសេធការចោទប្រកាន់របស់អាមេរិកផងដែរ។
អ្នកនាំពាក្យក្រសួងពាណិជ្ជកម្មលោក សៀង ថៃបានថ្លែងថា ការចោទប្រកាន់នេះគឺជាគ្មានមូលដ្ឋាន។
សេចក្តីថ្លែងការណ៍មួយពីក្រសួងពាណិជ្ជកម្ម កាលពីសប្តាហ៍មុនបានឲ្យដឹងថា “ទាក់ទងនឹងករណីនេះ មន្រ្តីជំនាញបានធ្វើការកំណត់អត្តសញ្ញាណក្រុមហ៊ុន”។
ក្រសួងពាណិជ្ជកម្មបានបញ្ជាក់យ៉ាងច្បាស់ថា ការកត់សម្គាល់ដែលធ្វើឡើងដោយអ្នកនាំពាក្យស្ថានទូតអាមេរិកគឺគ្មានមូលដ្ឋានទេ៕
