ដោយ ដន
ភ្នំពេញៈ ស្របពេលមានការពន្លឿនកិច្ចព្រមព្រៀងពាណិជ្ជកម្មសេរី នៃតំបន់អាស៊ាន ដែលមានចូលរួមពីបណ្តាប្រទេសអាស៊ាន និងប្រទេសអាស៊ីប៉ាស៊ីហ្វិកសំខាន់ៗ ថ្នាក់ដឹកនាំនៅក្នុងវិស័យដែកថែបឥណ្ឌា បានបង្ហាញពីការព្រួយបារម្ភអំពីការប្រកួតប្រជែងនៃឧស្សាហកម្មរបស់ខ្លួន ខណៈប្រទេសចិនជំរុញឲ្យមានការបង្កើនផលិតកម្មដែក នៅតំបន់អាស៊ីអាគ្នេយ៍។
ថ្នាក់ដឹកនាំឧស្សាហកម្មដែកថែបឥណ្ឌាបាននិយាយថា ផលិតផលពីឧស្សាហកម្មនេះ គួរតែត្រូវបានគេដកចេញពីកិច្ចព្រមព្រៀងពាណិជ្ជកម្ម ដោយសារតែសក្តានុពលរបស់ដៃគូប្រកួតប្រជែងមកពីប្រទេសចិន កូរ៉េខាងត្បូង និងជប៉ុន បានឈានឡើងទីផ្សារ និងធ្វើឲ្យឧស្សាហកម្មដែករបស់ប្រទេសនេះកាន់តែមានការប្រកួតប្រជែង។
-->
ក្រុមហ៊ុនផលិតដែកថែបធំបំផុតរបស់ចិន Baowu Steel Group Corp ត្រូវបានគេរំពឹងថា នឹងក្លាយជាក្រុមហ៊ុនផលិតដែកថែបធំជាងគេនៅលើពិភពលោក ក្នុងរយៈពេលពីរទៅបីឆ្នាំខាងមុខ បន្ទាប់ពីមានការច្របាច់បញ្ចូលគ្នាជាមួយដៃគូប្រជែងចិនខ្លួន និងការពង្រីកខ្លួនចូលក្នុងប្រទេសកម្ពុជា។
ក្រុមអ្នកវិភាគនៅក្រុមហ៊ុនS&P Global បានព្យាករណ៍ថា ការប្របាច់បញ្ចូលគ្នានេះ រួមជាមួយផែនការពង្រីកនៅកម្ពុជា អាចនឹងធ្វើឱ្យក្រុមហ៊ុនក្លាយជាអ្នកផលិតដែកថែបធំបំផុតនៅលើពិភពលោក ក្នុងរយៈពេលពីរទៅបីឆ្នាំខាងមុខ។
ឧស្សាហកម្មដែកថែបរបស់ឥណ្ឌា បានសម្តែងការព្រួយបារម្ភអំពីវត្តមានរបស់ចិននៅក្នុងការធ្វើឲ្យមានកិច្ចព្រមព្រៀងពាណិជ្ជកម្មសេរី ដែលបានចាប់ផ្តើមដោយចិនដែលហៅថា ភាពជាដៃគូសេដ្ឋកិច្ចគ្រប់ជ្រុងជ្រោយប្រចាំតំបន់ (RCEP) ដែលនឹងធ្វើឲ្យឥណ្ឌាមានឱនភាពពាណិជ្ជកម្មដ៏ច្រើន ដោយរំពឹងទុកថានឹងមានចំនួន៥៣ពាន់លានដុល្លារក្នុងឆ្នាំ ២០១៨-២០១៩។
ភាពជាដៃគូសេដ្ឋកិច្ចគ្រប់ជ្រុងជ្រោយប្រចាំតំបន់ ដែលមានការចូលរួមពី១៦ប្រទេសត្រូវបានរៀបចំ ដែលប្រទេសទាំងនោះរួមមានបណ្តាប្រទេសអាស៊ានទាំងអស់ អូស្ត្រាលី ចិន ឥណ្ឌា ជប៉ុន និងកូរ៉េខាងត្បូង។
នាយករដ្ឋមន្ត្រីអូស្ត្រាលីលោក Scott Morrisonបានសន្យាថា នឹងជំរុញឲ្យពន្លឿនកិច្ចព្រមព្រៀងពាណិជ្ជកម្ម RCEP ដែលនឹងដែលមិនរាប់បញ្ចូលអាមេរិក ខណៈកំណើនសេដ្ឋកិច្ចសកល ស្ថិតនៅក្រោមការគំរាមកំហែង ដោយសារតែផលប៉ះពាល់នៃសង្គ្រាមពាណិជ្ជកម្មអាម៉េរិក-ចិន។
ជំនួយការសមាគមដែកថែបឥណ្ឌា (ISA) លោក Arnab Hazra បាននិយាយនៅក្នុងរបាយការណ៍ ដែលបានចេញផ្សាយកាលពីចុងសប្តាហ៍ថា “ដែកថែបឥណ្ឌាមិនបានទទួលផលប្រយោជន៍ ពីកិច្ចព្រមព្រៀងពាណិជ្ជកម្មសេរីណាមួយ ដែលមានស្រាប់ ហើយ RCEP នឹងបើកផ្លូវសម្រាប់ប្រទេសចិន”។
ក្រុមហ៊ុនផលិតដែកថែបចិន Baowu កំពុងវិភាគពីផែនការផ្លាស់ប្តូរទីតាំងឡដុតថ្មីមួយ និងឧបករណ៍បម្លែងពីរ ដើម្បីបង្វែរជាតិដែកទៅជាដែកថែបទៅប្រទេសកម្ពុជា។ ការផ្លាស់ប្តូរទីតាំងនឹងក្លាយជាភស្តុភារដ៏ធំមួយ។ គ្រឿងបរិក្ខារនឹងត្រូវបានដឹកជញ្ជូនចេញពីរោងចក្របិទទ្វារមួយនៅតំបន់Aksu នៅភាគពាយព្យនៃប្រទេសចិន ដែលមានចំងាយប្រហែល២,៤៨០ ម៉ាយពីរាជធានីភ្នំពេញ។
ផែនការច្របាច់បញ្ចូលគ្នា និងពង្រីកនេះត្រូវបានគេរំពឹងថា នឹងបង្កើនការផលិតដែកថែបរបស់ក្រុមហ៊ុនBaowu ដល់៩០លានតោនពោល គឺស្ថិតនៅក្រោមក្រុមហ៊ុន ArcelorMittal ដែលផលិតបាន៩២,៥ លានតោនកាលពីឆ្នាំមុន៕
