ដោយ វុត្ថា
ភ្នំពេញៈ រដ្ឋាភិបាលតាមរយៈកិច្ចប្រជុំអន្តរក្រសួង-ស្ថាប័នពាក់ព័ន្ឋបានជំរុញឱ្យអ្នកប្រកបអាជីវកម្មកាណូតទេសចរណ៍ ចូលបង់ពន្ធនាំចូលយានយន្តរបស់ពួកគេ ឱ្យដូចទៅនឹងអ្នកប្រកបអាជីវកម្មដទៃ។
កិច្ចប្រជុំអន្តរក្រសួង-ស្ថាប័នពាក់ព័ន្ឋនានា បានធ្វើឡើនៅថ្ងៃទី១ខែកក្កដា ឆ្នាំ ២០១៩ កន្លងមកនេះ ដែលដឹកនាំដោយលោក ជា បូរ៉ា រដ្ឋលេខាធិការក្រសួងទេសចរណ៍ បានស្នើទៅរាជរដ្ឋាភិបាល ក្នុងការបង្កើតគណៈការអន្តរក្រសួងមួយឱ្យបានឆាប់នាពេលខាងមុខ ដើម្បីចុះដោះស្រាយបញ្ហាពន្ធ និងបញ្ហាប្រឈមមួយចំនួន។
-->
អង្គប្រជុំបានលើកឡើងពីបញ្ហាប្រឈមមួយចំនួន ពាក់ព័ន្ធនឹងការប្រកបអាជីវកម្មកាណូតទេសចរណ៍ ពិសេសនៅរាជធានីភ្នំពេញ និងខេត្តព្រះសីហនុ ដែលតម្រូវឱ្យអន្តរក្រសួង-ស្ថាប័នរួមគ្នាដោះស្រាយឱ្យបាន ក្នុងនោះរួមមាន ទី១ កាណូតទេសចរណ៍ដែលប្រកបអាជីវកម្មគ្មានពន្ធនាំចូល និងលិខិតស្នាមត្រឹមត្រូវ។ ទី២ កាណូតទេសចរណ៍ដែលប្រកបអាជីវកម្មគ្មានសៀវភៅត្រួតពិនិត្យបច្ចេកទេស ដែលចេញដោយក្រសួង ឬមន្ទីរសាធារណការ និងដឹកជញ្ជូន។
ទី៣ កាណូតមួយចំនួនផលិត និងដំឡើងក្នុងស្រុកគ្មានស្ដង់ដាគុណភាព។ ទី៤ កាណូតទេសចរណ៍មួយចំនួន មិនគោរពតាមច្បាប់ចរាចរណ៍ផ្លូវទឹក និងដឹកលើសកម្រិត ព្រមទាំងគ្មានអាជ្ញាបណ្ណ និងទី៥ កំពង់ផែចំណតគ្មានគ្រប់តម្រូវការ សម្រាប់កាណូតទេសចរណ៍ និងមិនគ្រប់បំពេញតាមតម្រូវការស្ដង់ដាសុវត្ថិភាព ជាហេតុធ្វើឱ្យកាណូតចតដោយគ្មានសណ្ដាប់ធ្នាប់ និងពិបាកគ្រប់គ្រង។
បច្ចុប្បន្នមានកាណូតទេសចរណ៍នៅទូទាំងប្រទេស ១២៤គ្រឿង (រាជធានីភ្នំពេញ និងខេត្តព្រះសីហនុ) ក្នុងនោះគ្មានអាជ្ញាបណ្ណប្រកបអាជីវកម្ម១៦គ្រឿង និងមានអាជ្ញាបណ្ណបណ្ដោះអាសន្នចំនួន៣៥គ្រឿង ប៉ុន្តែកាណូតទេសចរណ៍ទាំងនោះ សុទ្ធតែមិនទាន់បានបង់ពន្ធនៅឡើយទេ។ អាជ្ញាបណ្ណបណ្ដោះអាសន្ន គឺផ្ដល់ឱ្យអាជីវកម្មដែលមិនទាន់មានឯកសារស្របច្បាប់គ្រប់គ្រាន់ ដោយទុករយៈពេលតែ៩០ថ្ងៃទេ តែបើនៅតែមិនទាន់មានឯកសារគ្រប់គ្រាន់ទៀត ក្រសួងមិនបន្តសុពលភាពឱ្យទៀតឡើយ។
លោកជា បូរ៉ា បានមានប្រសាសន៍ថា យើងនឹងមានការឹតបន្ដឹងធ្វើយ៉ាងណាឱ្យអាជីវករទាំងនោះ ត្រូវតែមកបង់ពន្ធនាំចូលយានយន្តរបស់ខ្លួន ពីព្រោះកន្លងមកមានការសម្របសម្រួលទន់ភ្លន់ច្រើនលើកហើយ តែអាជីវករនៅតែមិនព្រមអនុវត្តតាមច្បាប់។
ចំពោះអាជីវកម្មកាណូតទេសចរណ៍ដែលចង់បង្កើតថ្មី ឬអាជីវករចាស់ដែលចង់ពង្រីកអាជីវកម្មរបស់ខ្លួន ត្រូវតែមានឯកសារបង់ពន្ធត្រឹមត្រូវពីស្ថាប័នគយ និងពន្ធដារ និងត្រូវមានលិខិតត្រួតពិនិត្យបច្ចេកទេសយានយន្ត ពីក្រសួងសាធារណការ ទើបក្រសួងទេសចរណ៍ផ្ដល់ជូនអាជ្ញាបណ្ណទេសចរណ៍ និងលិខិតវាយតម្លៃស្ដង់ដាសេវាកម្មទេសចរណ៍ ដែលមានន័យថាអនុញ្ញាតឱ្យអាជីវករប្រកបអាជីវកម្មរបស់ខ្លួនបាន៕
