ដោយ វុត្ថា
ភ្នំពេញៈ ក្រៅតែពីការផ្តល់ជំនួយបច្ចេកទេស និងរៀបចំផែនការមេសម្រាប់អភិវឌ្ឍន៍ដល់ប្រទេសកម្ពុជា នៅពេលនេះទីភ្នាក់កិច្ចសហប្រតិបត្តិការអន្តរជាតិជប៉ុន (JICA) បាននឹងកំពុងមានមច្ឆិតាចូលរួមវិនិយោគ និងធ្វើឱ្យប្រសើរឡើងនូវហេដ្ឋារចនាសម្ព័ន្ធកម្ពុជាបន្ថែមទៀត។
គណៈប្រតិភូប្រឹក្សាធុរកិច្ចអង្គការ JCIA ដឹកនាំដោយលោក Takeshi Saito នៅក្នុងជំនួពិភក្សាការងារជាមួយលោករដ្ឋមន្ត្រីស្ដីទី លោកតូច ចាន់កុសល កាលពីថ្ងៃទី ២ម្សិលមិញនេះបានឱ្យដឹងថា ជំនួបពិភាក្សានេះធ្វើឡើង ដើម្បីស្ដាប់ការធ្វើបទបង្ហាញរបស់តំណាងអង្គការ JCIA អំពីឧបករណ៍បច្ចេកវិទ្យាសម្រាប់ពិសោធន៍ដី មុននឹងធ្វើការសាងសង់ហេដ្ឋារចនាសម្ព័ន្ធដឹកជញ្ជូន ក៏ដូចជាស្វែងរកសក្ដានុពល និងឱកាសវិនិយោគលើវិស័យសាធារណការ និងដឹកជញ្ជូននៅកម្ពុជាផងដែរ។
លោកតូច ចាន់កុសល បានសម្ដែងការស្វាគមន៍ចំពោះគម្រោងនេះ ព្រោះថាក្រសួងសាធារណការ និងដឹកជញ្ជូនមានតួនាទីក្នុងការសាងសង់ផ្លូវ ស្ពាន កំពង់ផែ និងហេដ្ឋារចនាសម្ព័ន្ធរូបវន្តដ៏ទៃទៀតជាច្រើន។ បើមានឧបករណ៍ទំនើបសម្រាប់ពិសោធន៍ដី នោះនឹងធ្វើឱ្យគុណភាពសំណង់ទាំងនោះរឹតតែមានគុណភាពថែមទៀត។
លោករដ្ឋមន្ត្រីស្ដីទីបានសម្ដែងអំណរគុណយ៉ាងជ្រាលជ្រៅ ចំពោះគណៈប្រតិភូដែលមានបំណងមកវិនិយោគលើវិស័យសាធារណការ និងដឹកជញ្ជូននៅកម្ពុជា និងស្នើឱ្យអង្គការនាំយកឧបករណ៍បច្ចេកទេសទាំងនោះមកកម្ពុជា ដើម្បីធ្វើពិសោធន៍ ព្រមទាំងស្នើឱ្យអង្គការជួយបណ្ដុះបណ្ដាលមន្ត្រីជំនាញរបស់ក្រសួង(នៅប្រទេសជប៉ុន) ឱ្យមានសមត្ថភាពគ្រប់គ្រាន់ក្នុងការប្រើប្រាស់ឧបករណ៍ទំនើបនោះ។
អង្គការ JCIA គឺជាអង្គការមនុស្សធម៌ មានទីស្នាក់ការនៅប្រទេសជប៉ុន និងបានចុះពិធីសារកិច្ចព្រមព្រៀងជាមួយក្រសួងសង្គមកិច្ច អតីតយុទ្ធជននិងយុវនីតិសម្បទា ក្នុងភាពជាដៃគូតាំពីឆ្នាំ១៩៩៦។ អង្គការនេះកំពុងបន្តការគាំទ្រដល់មជ្ឈមណ្ឌលអភិវឌ្ឍន៍សង្គម ពោធិ៍សែនជ័យ លើកម្មវិធីបណ្ដុះបណ្ដាលវិជ្ជាជីវៈ ដូចជាកាត់ដេរសម្លៀកបំពាក់ ជួសជុលម៉ូតូ និងម៉ាស៊ីនធុនតូច ជួសជុលទូរទស្សន៍ និងបរិក្ខាអគ្គិសនី កាត់សក់ ជួសជុលទូរសព្ទ បង្រៀនកុំព្យូទ័រ ភាសាអង់គ្លេស ភាសាជប៉ុន សំណង់ និងបដិសណ្ឋារកិច្ចជាដើម៕
