ដោយម៉ា ណេត
ភ្នំពេញៈ លោកបណ្ឌិត រតនាការ អាឌីការី (Ratnakar Adhikari) នាយកប្រតិបត្តិនៃក្របខណ្ឌពង្រឹងសមាហរណកម្មពាណិជ្ជកម្ម បានចាប់អារម្មណ៍ពីការសម្រេចបានកំនើនសេដ្ឋកិច្ចរបស់កម្ពុជា ដែលរក្សាបានកំនើនក្នុងរង្វង់៧ភាគរយ រយៈពេលជាងពីរទសវត្សរ៍កន្លងមកនេះ។
ក្នុងជំនួបពិភាក្សារវាងសម្តេចតេជោហ៊ុន សែននាយករដ្ឋមន្រ្តីកម្ពុជាកាលពីថ្ងៃទី៣ កក្កដាកន្លងមកនេះ លោក Ratnakar Adhikari បានមានប្រសាសន៍ថា លោកមានការចាប់អារម្មណ៍អំពីកំនើនសេដ្ឋកិច្ចកម្ពុជា ដែលទទួលបានក្នុងរង្វង់៧%ក្នុងរយៈពេលជាង២ទសវត្សរ៍កន្លងមកនេះ ។
-->
នាយកប្រតិបត្តិចង់ដឹងអំពីបទពិសោធន៍របស់ប្រទេសកម្ពុជាហើយលោកក៏បានគូសបញ្ជាក់ថាសេដ្ឋកិច្ច៧%កន្លងមកនេះ គឺលើសពីទិសដៅអភិវឌ្ឍន៍ប្រកបដោយចីរភាពដែលបានកំណត់កន្លងទៅនេះ។
ជាពិសេសទៀតលោកក៏បានគូសបញ្ជាក់ផងដែរថា នៅក្នុងក្របខណ្ឌដែលបានគាំទ្រប្រទេសកម្ពុជាទី១ ទៅលើយុទ្ធសាស្ត្រសមាហរណកម្មពាណិជ្ជកម្ម របស់ប្រទេសកម្ពុជា ដែលសម្ដេចតេជោបានប្រកាសនៅពេលសម្ដេចថ្លែងក្នុងសុន្ទរកថា ក្នុងកិច្ចប្រជុំត្រួតពិនិត្យឡើងវិញ ជាសកលលើជំនួយពាណិជ្ជកម្មសម្រាប់ឆ្នាំ២០១៩។
លោកបន្តទៀតថា នេះជាលើកទី៤ហើយ នៃការសិក្សាយុទ្ធសាស្ត្រ ដែលកាលពីឆ្នាំ២០០៦ ដែលយើងបានផ្ដល់នូវការឧបត្ថម្ភគាំទ្រគាំទ្ររហូតមក ហើយកន្លមកនេះកម្ពុជាបានការកសាងសមត្ថភាពផ្នែកពាណិជ្ជកម្ម ជាពិសេសលើវិស័យមួយចំនួនដូចជា វិស័យទេសចរណ៍ជាដើម ក្នុងការធ្វើយ៉ាងណាពង្រីកវិស័យទេសចរណ៍ ហើយអ្វីដែលកម្ពុជាបានអនុវត្តន៍កន្លងមកនេះ ចេញជាលទ្ធផលគួរឲ្យកោតសរសើរ ជាពិសេសក្នុងការនាំចេញអង្ករផងដែរ។
ជាការឆ្លើយតប សម្តេចតេជោហ៊ុន សែនបានអញ្ជើញលោកនាយកប្រតិបត្តិឲ្យទៅទស្សនកិច្ចនៅប្រទេសកម្ពុជានៅពេលខាងមុខ ហើយសម្តេចក៏បានអរគុណចំពោះនាយកប្រតិបត្តិ និងស្ថាប័នរបស់លោកដែលបានជួយដល់ប្រទេសកម្ពុជា ក្នុងការរៀបចំអភិវឌ្ឍនៃយុទ្ធសាស្ត្រសម្រាប់សមាហរណកម្មពាណិជ្ជកម្មនេះ ហើយសម្ដេចក៏បានគូសបញ្ជាក់ថា កន្លងមកកម្ពុជាបានទទួលការគាំទ្រប្រមាណ៥៧,៥០លាន ដើម្បីជំរុញការងាររបស់ប្រទេសកម្ពុជា ក្នុងការសម្រួលដល់ការរៀបចំយុទ្ធសាស្ត្រ សមាហរណកម្មពាណិជ្ជកម្មរបស់ប្រទេសកម្ពុជានេះ ហើយប្រទេសកម្ពុជាបានបន្តបច្ចុប្បន្នភាព ជាពិសេសលើពាណិជ្ជកម្មនេះ និងជាពិសេសក្នុងការជំរុញធ្វើយុទ្ធសាស្ត្រ សមាហរណកម្មពាណិជ្ជកម្មក្នុងប្រទេសកម្ពុជា។
សម្តេចតេជោបានបញ្ជាក់ថា កម្ពុជាបានរៀបចំយុទ្ធសាស្រ្តនៃការធ្វើពាណិជ្ជកម្មកម្ពុជានៅ២០០១កន្លងមក ពិសេសក្នុងការរៀបចំយុទ្ធសាស្ត្រចតុកោណរបស់រដ្ឋាភិបាលដែលទទួលបានជោគជ័យកន្លងមក។ សម្ដេចតេជោចង់ឃើញបន្ទាប់ទៀតគឺ ការពង្រឹងនៃសមាហរណកម្មប្រជាជន ពីព្រោះកន្លងមកប្រទេសកម្ពុជាឆ្លងកាត់ការលំបាកជាច្រើន ក៏ប៉ុន្តែប្រទេសកម្ពុជាបានតស៊ូជំនះឧបសគ្គជាបន្តបន្ទាប់ ជាពិសេសការរៀបចំដាក់ចេញនូវនយោបាយឈ្នះឈ្នះក្នុងឆ្នាំ១៩៩៨ មករហូតដល់កម្ពុជាបានចូលជាសមាជិកនៃអង្គការពាណិជ្ជកម្មពិភពលោកនៅឆ្នាំ២០០៤។
សម្តេចតេជោបានគួសបញ្ជាក់ថា យើងនៅមានសក្តានុពលជាច្រើនទៀត ក្នុងក្របខណ្ឌអាស៊ាន ជាពិសេសក្នុងការជំរុញពាណិជ្ជកម្មផ្ទៃក្នុងរបស់អាស៊ាន ដោយសារបច្ចុប្បន្នសេដ្ឋកិច្ចសេរីរវាងអាស៊ាន និងបណ្ដាប្រទេសដែលជាដៃគូសន្ទនារបស់អាស៊ាន ក៏អាចធ្វើសមាហរណកម្មផងដែរ។ ដូច្នេះត្រូវតែជំរុញពាណិជ្ជកម្ម ជាមួយបណ្ដាប្រទេសដែលជាប្រទេសដៃគូសន្ទនា ដូចជាប្រទេសចិនជាដើម និងប្រទេសដទៃទៀតក្នុងតំបន់អាស៊ាន។
សម្តេចតេជោបានបញ្ជាក់ថា អង្គការពាណិជ្ជកម្មពិភពលោក នៅតែក្លាយជាអង្គការដែលមានស្ថិរភាព ហើយអ្វីដែលសំខាន់គឺយើងនៅតែបន្តប្រើប្រាស់យន្តការ អង្គការពាណិជ្ជកម្មពិភពលោកនេះ៕
