ដោយ ដួង ចន្ទ្រា
ភ្នំពេញ៖ មន្ត្រីជាន់ខ្ពស់ក្រសួងកសិកម្មបានថ្លែងថា រដ្ឋាភិបាលកំពុងទាក់ទាញ ក្រុមហ៊ុនចិនដើម្បីវិនិយោគលើវិស័យកសិកម្ម ដើម្បីកែច្នៃផលិតផលដើម្បីនាំចេញ។
រដ្ឋមន្ត្រីក្រសួងកសិកម្ម រុក្ខប្រមាញ់ និងនេសាទលោកវេង សាខុនបានថ្លែងឲ្យដឹងកាលពីថ្ងៃម្សិលម៉ិញនេះថា យោងតាមយុទ្ធសាស្ត្រគ្រប់ជ្រុងជ្រោយនៃកិច្ចសហប្រតិបត្តិការរវាងប្រទេសកម្ពុជា ចិន ប្រទេសចិនមានសក្តានុពលច្រើនមិនត្រឹមតែទាក់ទង នឹងកាវិនិយោគសាធារណៈនោះទេ ប៉ុន្តែទាក់ទងដល់ការវិនិយោគលើវិស័យឯកជន ដែលជាក្បាលម៉ាស៊ីនជំរុញកំណើនសេដ្ឋកិច្ចប្រទេសទាំងពីរ។
លោកបន្តថា ដំណើរទស្សនកិច្ចកន្លងទៅថ្មីៗនេះ មានការពិភាក្សាជាមួយក្រុមហ៊ុនធំៗ ដែលមានបំណងបោះទុនវិនិយោគ នាំចេញផ្លែស្វាយទៅកាន់ប្រទេសជប៉ុននិងចិន ហើយរដ្ឋមន្ត្រីក្រសួងពាណិជ្ជកម្មចិន ក៏ដូចបានជំរុញការវិនិយោគមកកម្ពុជា ក្នុងការបង្កើតរោងចក្រកែច្នៃកសិតផល នៅក្នុងប្រទេសកម្ពុជានិងវិនិយោគលើហេដ្ឋារចនាសម្ព័ន្ធ។
លោករដ្ឋមន្ត្រីបានបន្តថា “ក្រុមហ៊ុនចិនបានមើលឃើញឱកាសនៅកម្ពុជាច្រើនគឺ ការផ្សារភ្ជាប់ការហោះហើរត្រង់ពីជប៉ុនទៅកម្ពុជា និងពីកម្ពុជាទៅកាន់ប្រទេសចិនក្នុងការនាំចេញកសិផល បន្លែផ្លែឈើ ដើម្បីដឹកជញ្ជូនផ្ទាល់។
នាយកវិទ្យាសាស្ថានសិក្សាគោលនយោបាយលោកចាន់ សុផលបានថ្លែងថា នេះជាដំណឹងល្អផងដែរ សម្រាប់ប្រទេសកម្ពុជា នៅពេលមានការបណ្តាក់ទុន និងបង្កើតរោងចក្រកែច្នៃកសិផលផ្សេងៗ ដែលកសិករផលិតបាននាពលកន្លងមក។លោកបន្ថែមថា បច្ចុប្បន្នកសិកផលខ្មែរមានច្រើន ប៉ុន្តែមិនទាន់មានរោងចក្រកែច្នៃដូចប្រទេសជិតខាងនៅឡើយទេ ហើយការទាក់ទាញវិនិយោគរបស់ក្រសួងកសិកម្ម នឹងជំរុញការផលិតរបស់កសិករមានតម្លៃបន្ថែម៕