ដោយ Donald Lee
ភ្នំពេញៈ សេដ្ឋកិច្ចសឹង្ហបូរីបានដាំក្បាលចុះជាង ៣ភាគរយ ដែលបានធ្វើឲ្យមានការភា្ញក់ផ្អើលដល់ប្រទេសជាច្រើនលើពិភពលោក ខណៈសឹង្ហបូរីអាចក្លាយទៅជាជនរងគ្រោះដំបូងនៃសង្គ្រាមពាណិជ្ជកម្មអាមេរិក និងចិន។
យោងតាមរបាយការណ៍ ដែលត្រូវបានចេញផ្សាយដោយអាជ្ញាធរសឹង្ហបូរីការធ្លាក់ចុះនេះជាសញ្ញាភ្ញាក់ផ្អើលមួយ ដោយសារត្រីមាសទី១ កំណើនផលិតផលក្នុងស្រុកកើនជិត៤ភាគរយ។ ប៉ុន្តែអត្រានេះបានធ្លាក់ចុះ ៣,៤នៅក្នុងត្រីមាសទី២ ខណៈប្រទេសនេះ ពឹងផ្អែកលើការនាំចេញ ត្រូវបានទទួលរងផលប៉ះពាល់យ៉ាងខ្លាំងដោយ សង្គ្រាមពាណិជ្ជកម្មអាមេរិក និងចិន។
-->
យោងតាមក្រសួងពាណិជ្ជកម្ម និងឧស្សាហកម្មសឹង្ហបូរី បានឲ្យដឹងថា មូលហេតុចម្បងគឺបណ្តាលមកពីការធ្លាក់ចុះ នៃការនាំចេញគ្រឿងអេឡិចត្រូនិកសំខាន់ និងគ្រឿងបរិក្ខារវិស្វកម្ម។
របាយការណ៍សេដ្ឋកិច្ចរបស់ទីភ្នាក់ងារព័ត៌មាន Bloomberg បានចេញផ្សាយកាលពីខែមុនថា ការខាតបង់ពីសង្គ្រាមពាណិជ្ជកម្មរវាងចិន និងអាមេរិក អាចមានទំហំទឹកប្រាក់ដល់១,២ពាន់ពាន់លានដុល្លារ ដែលប៉ះពាល់ផលិតផលសរុបក្នុងស្រុកនៅទូទាំងពិភពលោក។
លោក Ravi Menon នាយកធនាគារកណ្តាលសឹង្ហបូរី បាននិយាយនៅក្នុងសេចក្តីថ្លែងការណ៍មួយថា ជម្លោះពាណិជ្ជកម្មអូសបន្លាយរវាងសហរដ្ឋអាមេរិក និងចិនបានធ្វើឲ្យមានការកាត់បន្ថយការផលិត ការធ្វើពាណិជ្ជកម្ម និងការវិនិយោគទុនទូទាំងពិភពលោក។
ក្រុមអ្នកវិភាគបាននិយាយថា “ការធ្លាក់ចុះសេដ្ឋកិច្ចសឹង្ហបូរី គឺជាសញ្ញាព្រមានដល់ប្រជាជាតិដទៃទៀត ដែលផលប៉ះពាល់នៃសង្គ្រាមពាណិជ្ជកម្មអាមេរិក និងចិននឹងមានភាពធ្ងន់ធ្ងរជាងការព្យាករណ៍”។
លោក Chua Hak Bin សេដ្ឋវិទូប្រចាំក្រុមហ៊ុន Maybank Kim Eng Research Pte បានឲ្យដឹងថា សឹង្ហបូរីជាប្រទេសមួយដែលងាយរងផលប៉ះពាល់ ដោយសារសង្រ្គាមពាណិជ្ជកម្ម”។ សេដ្ឋវិទូរូបនេះបានបន្ថែមថា “ទិន្នន័យនេះបង្ហាញពីហានិភ័យនៃការធ្លាក់ចុះយ៉ាងខ្លាំងសម្រាប់តំបន់អាស៊ី”។
វិបត្តិសេដ្ឋកិច្ចដែលបានធ្លាក់ចុះពីរត្រីមាសជាប់គ្នា ធ្វើឲ្យមានការភ័យខ្លាចកាន់តែ ច្រើននៅក្នុងប្រទេសដែលពឹងផ្អែកលើពាណិជ្ជកម្ម។
លោក Chua “ខ្ញុំគិតថាតួលេខនេះនឹងមិនល្អទេ ហើយវាជារឿងអាក្រក់បំផុត”៕
