ដោយៈ រ៉ាណេត
ភ្នំពេញៈ ធនាគារវិនិយោគហេដ្ឋារចនាសម្ព័ន្ធអាស៊ី (Asian Infrastructure Investment Bank-AIIB) ហៅកាត់ AIIB បានសម្រេចផ្តល់ជូននូវប្រាក់កម្ចីចំនួន៧៥លានដុល្លារសហរដ្ឋអាមេរិក ដល់ក្រុមហ៊ុន CFOCN ដើម្បីជួយជំរុញដល់ការរីកចំរើនវិស័យអិនធីណែតល្បឿនលឿននៅប្រទេសកម្ពុជា។
នៅក្នុងសេចក្ដីប្រកាសដដែលនេះបានបង្ហាញទៀតថា ទំហំទឹកប្រាក់កម្ចីចំនួន៧៥លានដុល្លារខាងលើនេះ ត្រូវបានផ្តល់ជូនសម្រាប់អនុវត្តគម្រោងវិនិយោគ លើបណ្តាញខ្សែអុបទិកអូសតាមក្រោមដី ដើម្បីផ្គត់ផ្គង់លើសេវាអ៊ីនធើណែត ដែលគ្រប់ដណ្តប់នៅគ្រប់រាជធានី ខេត្ត និងតំបន់ទីជនបទមួយចំនួននៅទូទាំងប្រទេសកម្ពុជា ដែលមានចម្ងាយសរុបប្រមាណ២០០០គីឡូម៉ែត្រ របស់ក្រុមហ៊ុនអភិវឌ្ឍសេវាអ៊ីនធើណែតល្បឿលឿននៅកម្ពុជា Cambodia Fiber Optic Communication Network Co., Ltd (CFOCN)។
-->
តាមរយៈការបង្កើនទុនវិនិយោគមួយនេះគេរំពឹងថា នឹងអាចជួយចូលរួមចំណែកក្នុងការអភិវឌ្ឍលើវិស័យព័ត៌មានវិទ្យា និងបច្ចេកវិទ្យាទូរគមនាគមន៍នៅកម្ពុជា (ICT) បានយ៉ាងល្អប្រសើរ ជាពិសេសនៅតាមគោលដៅសំខាន់ៗ នៅក្នុងរាជធានី ក្រុង ទីប្រជុំតាមខេត្តបាន១០០ភាគរយ ហើយនៅតាមទីជនបទ អាចបានក្នុងរង្វង់ប្រមាណ៧០ភាគ រយ។
នៅកម្ពុជាមានក្រុមហ៊ុន ដែលទទួលបានសិទ្ធិវិនិយោគលើបណ្តាញខ្សែកាប្លិ៍អុបទិក លើគោកក្នុងប្រទេស រួមមាន ទូរគមនាគមន៍កម្ពុជា, ក្រុមហ៊ុន CFOCN និង ក្រុមហ៊ុន Viettel សរុបចំនួន៤,២៦៩៣គីឡូម៉ែត្រ។
ដោយឡែក ចំពោះក្រុមហ៊ុនទទួលសិទ្ធិវិនិយោគ បណ្តាញខ្សែកាប្លិ៍អុបទិកក្រោមបាទសមុទ្រ ពីរាជរដ្ឋាភិបាល រួមមាន៖ ក្រុមហ៊ុន Telco Tech បានតភ្ជាប់បណ្តាញខ្សែកាប្លិ៍ក្រោមបាតសមុទ្រ Malaysia-Cambodia-Thailand ដាក់ឲ្យដំណើរការតាំងពីចុងឆ្នាំ២០១៧) ក្រុមហ៊ុន CFOCN ដោយបានតភ្ជាប់បណ្តាញខ្សែកាប្លិ៍ក្រោមបាតសមុទ្រ AAE-1: Asia-Africa-Europe 1 និងបានដាក់ឲ្យដំណើរការនៅចុងឆ្នាំ២០១៧)។ ក្រៅពីនេះក្រុមហ៊ុន២ទៀត គឺទូរគមនាគមន៍កម្ពុជា និងក្រុមហ៊ុន ឈួន វៃ ខេមបូឌា មិនទាន់ដំណើរការនៅឡើយទេ។
ប្រធានការិយាល័យវិនិយោគរបស់ AIIB លោក D.J. Pandianបានបញ្ជាក់ក្នុងសេចក្តីប្រកាសព័ត៌មានថា “ការអភិវឌ្ឍការភ្ជាប់ទំនាក់ទំនង គឺជាស្នូលដ៏សំខាន់របស់ AIIB ហើយដែលគម្រោងនេះនឹងចែករំលែកដល់កម្ពុជា ក្នុងការអភិវឌ្ឍដំណភ្ជាប់ឌីជីថល ព្រមទាំងវិស័យ ICT ជាមួយរំពឹងថា ផ្ដល់ចំណេញដល់អ្នកផ្គត់ផ្គង់ និងអ្នកប្រើប្រាស់”៕
