ដោយ វុត្ថា
ភ្នំពេញ៖ ជាមួយនឹងសកម្មភាពកំណែទម្រង់ជាបន្តបន្ទាប់ ជាលទ្ឋផលក្រសួងពាណិជ្ជកម្មកម្ពុជាបានរកចំណូលចូលថវិកាជាតិចំនួន ៥៤លានដុល្លារអាមេរិក នៅឆ្នាំ២០១៧នេះ។
ថ្លែងក្នុងពិធីបិទសន្និបាតបូកសរុបការងារពាណិជ្ជកម្មឆ្នាំ២០១៧ និងទិសដៅការងារឆ្នាំ២០១៨ រដ្ឋមន្ត្រីក្រសួងពាណិជ្ជកម្មលោក ប៉ាន សូស័ក្តិ បានមានប្រសាសន៍ឲ្យដឹងកាលពីម្សិលម៉ិញនេះថា ក្រសួងពាណិជ្ជកម្មបានធ្វើកំណែទម្រង់លើច្រើនវិស័យ ក្នុងគោលដៅជំរុញការងារគ្រប់គ្រងរដ្ឋបាលហិរញ្ញវត្ថុសាធារណៈ និងយន្តការការងារឲ្យកាន់តែមាន ប្រសិទ្ធភាព និងស៊ីជម្រៅ ដោយបានរៀបចំម៉ាទ្រិចតាមដានសកម្មភាពការងាររបស់មន្ត្រីក្រោមឱវាទ ដើម្បីធ្វើឲ្យប្រាកដថា មន្ត្រីរាជការពិតជាបានអនុវត្តកាតព្វកិច្ច និងផែនការសកម្មភាពច្បាស់លាស់ក្នុងការបំពេញការងារប្រចាំថ្ងៃនេះ។
លោក ប៊ិន ឈិន ឧបនាយករដ្ឋមន្ត្រីប្រចាំការ និងជារដ្ឋមន្ត្រីស្តីទីទទួលបន្ទុកទីស្តីការគណៈរដ្ឋមន្ត្រីបានកោតសរសើរចំពោះសមិទ្ធផលសំខាន់ៗដែលសម្រេចបាន ដោយក្រសួងពាណិជ្ជកម្មរបស់មន្ត្រីគ្រប់លំដាប់ថ្នាក់ក្នុងឆ្នាំ២០១៧នេះ ដូចជា កម្ពុជាបានទទួលភាពអនុគ្រោះពន្ធ និងមិនជាប់កូតាពីបណ្តាប្រទេសសមាជិកអង្គការពាណិជ្ជកម្មពិភពលោកជាច្រើន ដែលធ្វើឲ្យផលិតកម្មក្នុងស្រុក និងការនាំចេញមានកំណើនគួរឲ្យកត់សម្គាល់ និងបានចរចាពង្រីកទីផ្សារសម្រាប់ទំនិញចេញក្រោមក្របខ័ណ្ឌអាស៊ាន អាស៊ានបូកជាមួយដៃគូពាណិជ្ជកម្មសំខាន់ៗ ជាពិសេសបានពង្រីកទីផ្សារនាំចេញអង្ករ ទៅកាន់សាធារណរដ្ឋប្រជាមានិតចិន សហគមន៍អឺរ៉ុប និងបង់ក្លាដេស។ល។
លោកឧបនាយករដ្ឋមន្ត្រីបានពិនិត្យឃើញថា ទោះជាយ៉ាងណាក្រសួងនៅមានចំណុចខ្វះខាតត្រូវកែលម្អ កាលានុវត្តភាព និងផែនការការងារពាណិជ្ជកម្មសំខាន់ៗមួយចំនួន ដែលត្រូវធ្វើបន្តក្នុងឆ្នាំ២០១៨ខាងមុខ ហើយដើម្បីជាធាតុចូលសម្រាប់ការងារពាណិជ្ជកម្មឆ្នាំខាងមុខ ក្រសួងគួរពិនិត្យលទ្ធភាព ធ្វើពិពិធកម្មផលិតផលនាំចេញនិងទីផ្សារថ្មីៗបន្ថែមទៀត ដើម្បីចៀសវាងគំនាប មិនសមហេតុផលពីបណ្តាប្រទេសនាំចូលមួយចំនួនមកលើកម្ពុជា ក្នុងបរិបទនយោបាយបច្ចុប្បន្ននិងអនាគតជាដើម។ល៕