ដោយ វុត្ថា
ភ្នំពេញ៖ ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បានអះអាងថា រដ្ឋាភិបាលកម្ពុជាដែលខ្ចីលុយពីប្រទេសចិនយកមកអភិវឌ្ឍន៍ហេដ្ឋរនាសម្ព័ន្ធនានា រួមមានផ្លូវថ្នល់ និងស្ពាន គឺចំណេញដល់សេដ្ឋកិច្ចជាតិ។
លោកស៊ុន ចាន់ថុល បានអះអាងយ៉ាងដូច្នេះ នៅក្នុងពិធីចុះត្រួតពិនិត្យពីស្ថានភាពផ្លូវលេខ៧ ខេត្តស្ទឹងត្រែង-ក្រចេះ កាលពីថ្ងៃទី ២៣ ខែកក្កដា ម្សិលមិញនេះ ដើម្បីបកស្រាយឆ្លើយតបទៅនឹងមន្ទិលសង្ស័យពីមតិសាធារណៈមួយចំនួនលើកឡើងពីការឃើញតែរដ្ឋាភិបាលខ្ចីលុយពីប្រទេសចិនរហូត មិនដែលឃើញមានលុយខ្លួនឯងក្នុងការអភិវឌ្ឍន៍ហេដ្ឋារចនាសម្ព័ន្ធនោះទេ។
-->
លោក ស៊ុន ចាន់ថុលថា “អ្នកដែលទិតៀនរាជរដ្ឋាភិបាល ខ្ចីលុយយកមកសាងសង់ស្ពាន និងផ្លូវនេះ កុំទិតៀនអី គឺខ្ចីនេះ មិនមែនយកមកទិញខោអាវស្លៀកពាក់ ទិញឡានថ្មីជិះ ឬទិញយន្តហោះជិះទេ គឺខ្ចីនេះ ដើម្បីយកមកកសាងស្ពាន ដើម្បឱ្យពលរដ្ឋយើងធ្វើដំណើរឆ្លងកាត់នៅទូទាំងប្រទេស ដើម្បីកាត់បន្ថយការចំណាយផ្សេងៗ”។
លោករដ្ឋមន្ត្រីបន្តថា “អីចឹងប្រព័ន្ធឡូជីស្ទិករបស់យើងដែលល្អ យើងអាចទាក់ទាញអ្នកទេសចរណ៍ វិនិយោគិន និងផ្តល់ការងារដល់ពលរដ្ឋបានធ្វើថែមទៀត។
អ្នកដែលទិតៀនថា ខ្ចីគេៗ គួរតែសួរខ្លួនឯងវិញថា ហេតុដូចម្តេចគេឱ្យយើងខ្ចីលុយមកកសាងនេះ ឬ កសាងនោះ? ម្ចាស់លុយ គេមិនមែនចេះ តែឱ្យលុយខ្ចីស្រេចតែចិត្តគេនោះទេ គឺខ្ចីលុយនេះដើម្បីសាងសង់អ្វីមួយ ដើម្បីឱ្យមានការរីកចម្រើនដល់សេដ្ឋកិច្ចជាតិរបស់យើង បើខ្ចី ១០០ ចំណេញដល់ជាតិ ១០០០ ជូនជាតិ យើងមិនខ្លាចខ្ចីនោះទេ”។
លោកបន្ថែមទៀតថា “ម្យ៉ាងបើគេមិនទុកចិត្តដល់រាជដ្ឋាភិបាលកម្ពុជាដែលដឹកនាំដោយសម្តេចតេជោ នាយករដ្ឋមន្ត្រី ហ៊ុន សែន ក៏គេមិនអនុញ្ញាតឱ្យយើងខ្ចីគេដែរ។ គម្រោងមួយៗ ដែលសិក្សារួចហើយ មុនដាក់ឱ្យគេ យើងពិនិត្យមើល លើគម្រោង តើវាចំណេញដល់ជាតិកម្រិតណា បើមិនចំណេញទេ ក៏គេមិនឱ្យខ្ចីដែរ”។
លោកស៊ុន ចាន់ថុល បញ្ជាក់ទៀតថា ការខ្ចីលុយពីប្រទេសចិននេះ គឺរដ្ឋាភិបាលមានលទ្ធភាពក្នុងការសងគេវិញ និងមានការចំណេញដល់ជាតិ ហើយម្យ៉ាងក៏គេមិនបង្ខំ ឬដាក់គំនាបយើងឱ្យខ្ចីលុយគេ ឬបង្ខំយើងឱ្យចូលអន្ទាក់ក្នុងបំណុលគេផងដែរ គឺខ្ចីនេះ មានគម្រោង និងគ្រប់គ្រងថវិកាប្រាក់កម្ចីនេះ បានយ៉ាងត្រឹមត្រូវ លើប្រាក់កម្ចី ២០ភាគរយ គឺទាបបំផុតដែលយើងនៅមានលទ្ធភាពក្នុងការខ្ចីគេច្រើន។
យោងតាមរបាយការណ៍នានាដែលចុះផ្សាយដោយសារព័ត៌មានបរទេសបានឱ្យដឹងថា មកដល់ពេលនេះ រដ្ឋាភិបាលកម្ពុជាជំពាក់បំណុលចិនប្រមាណ ៣ពាន់លានដុល្លារសហរដ្ឋអមេរិក តាមរយៈគោលនយោបាយរបស់ចិន ផ្លូវ និងខ្សែ ៕
