ដោយ ដួង ចន្រ្ទា
ភ្នំពេញ៖ ឆ្លងឆ្នាំសាកល ដែលជាសករាជនៃឆ្នាំ២០១៨បានបញ្ចប់ ប៉ុន្តែក្នុងដំនើរកំសាន្តនិងភាពសប្បាយរីករាយនេះ ភ្ញៀវទេសចរណ៍ជាតិ អន្តរជាតិបានសំរុកទៅទស្សនាតំបន់ឆ្នេរបានកើនឡើង និងខេត្តខ្លះស្ថិតក្នុងសភាពទ្រឹង។
ប្រធានមន្ទីរទេសចរណ៍ខេត្តកំពត លោកសយ ស៊ីណុលបានថ្លែងឲ្យដឹងតាមទូរស័ព្ទកាលពីព្រឹកថ្ងៃទី១ មករា ឆ្នាំ២០១៨នេះថា ភ្ញៀវទេសចរណ៍ជាតិ អន្តរជាតិប្រមាណ៨ម៉ឺននាក់ បានទៅទស្សនានិងលេងកំសាន្តក្នុងខេត្តកំពត កើនឡើងប្រមាណ៤ភាគរយ ធៀបរយៈពេលដូចគ្នាកាលពីឆ្នាំមុន ក្នុងនោះមានភ្ញៀវទេសចរណ៍អន្តរជាតិ១៤០០នាក់។លោកបន្តថា ខេត្តកំពតទទួលបានភ្ញៀវទេសចរ ណ៍ជាតិ និងអណ្តរជាតិប្រមាណ១,៦លាននាក់ កាលពីឆ្នាំ២០១៧កន្លងមកថ្មីៗនេះ។
លោកបន្តថា “ភ្ញៀវទេសចរណ៍បានមកទស្សនាក្នុងខេត្តយ៉ាងកកកុញ និងបន្តដល់ថ្ងៃនេះ ខណៈរមណីយដ្ឋានក្នុងខេត្តបានកើនឡើងដល់១៤កន្លែង និងមានសណ្ឋាគារ ព្រមទាំងផ្ទះសំណាក់ជាច្រើនពាន់បន្ទប់”។
រីឯខេត្តព្រះសីហនុវិញ លោកតាំង សុចិត្រគ្រឹស្នាប្រធានមន្ទីរទេសចរណ៍ខេត្តបានឲ្យដឹងផងដែរថា ខេត្តព្រះសីហនុឆ្នាំនេះ ទទួលបានភ្ញៀវទេសចរណ៍ប្រហាក់ប្រហែលឆ្នាំមុនៗដែរ ប៉ុន្តែបញ្ហាប្រឈមគឺកង្វះបន្ទប់គេង ដែលភ្ញៀវមួយចំនួនបានសម្រាកនៅមាត់សមុទ្រ និងត្រលប់ទៅលំនៅដ្ឋានវិញ ទោះបីជាចំនួនបន្ទប់សណ្ឋាគារនិងផ្ទះសំណាក់បានកើនឡើងប្រមាណ១ម៉ឺនបន្ទប់ក្តី។
លោកបន្តថា “យើងរំពឹងថានៅឆ្នាំថ្មីនេះ មានសណ្ឋាគារជាច្រើនទៀតបញ្ចប់ការសាងសង់ និងដាក់ឲ្យដំណើរការ ជាការឆ្លើយតបនឹងកំណើនទេសចរណ៍ក្នុងខេត្តនេះ”។
ចំណែកទឹកដីខេត្តកោះកុងឯណោះវិញ ចំនួនភ្ញៀវទេសចរណ៍ទៅទ ស្សនាខេត្តនេះមានប្រមាណ១ម៉ឺននាក់ ជាចំនួនប្រហាក់ប្រហែលនឹងឆ្នាំមុន។នេះបើតាមលោកប៊ុន ទៀនប្រធានមន្ទីរទេសចរណ៍ខេត្តនេះ។លោកបន្តថា ខេត្តកោះកុងបច្ចុប្បន្នមានសណ្ឋាគារចំនួន៨ និងមានផ្ទះសំណាក់ជាង៦០ ដែលមានបន្ទប់សរុបជាង១៤០០បន្ទប់ សម្រាប់ទទួលភ្ញៀវទេសចរណ៍ជាតិ និងអន្តរជាតិនានា។
ខេត្តកោះកុងមានសហគមន៍ទេសចរណ៍ចំនួន៥ ដែលបាននិងកំពុងទាក់ទាញភ្ញៀវទេសចរណ៍ជាតិ អន្តរជាតិទៅទស្សនាកំសាន្ត។
ទីប្រឹក្សាសមាគមទីភ្នាក់ងារទេសចរណ៍កម្ពុជាលោកហូ វណ្ឌីបានថ្លែងថា ចំនួនភ្ញៀវទេសចរណ៍ទៅទស្សនាតាមរមណីយដ្ឋាននានា បាននិងកំពុងកើនឡើង ហើយអ្វីលោកកត់សំគាល់គឺឃើញថា ចំនួនភ្ញៀវបានចាប់ផ្តើមងាកទៅកាន់តំបន់ធម្មជាតិច្រើន ដោយពួកគេដើរកំសាន្តជាលក្ខណៈគ្រួសារ និងបោះតង់នៅតាមព្រៃនានា។
លោកបន្តថា “ទោះជាភ្ញៀវកើនឡើងក្តី ប៉ុន្តែបាតុភាពការដំឡើងថ្លៃពីសេវាកម្មទេសចរណ៍នានា មិនមានអ្វីគួរឲ្យកត់សំគាល់ទេ ដោយសារមានការយល់ដឹងនិងមានការចូលរួមពីប្រតិបត្តិករនានា”៕