ដោយ ម៉ាណេត
ភ្នំពេញ៖ កម្ពុជាត្រូវជ្រើសរើសថ្ងៃសុក្រ ទី៥ខែឧសភា ឆ្នាំ២០២៣ រៀបចំព្រឹត្តិការណ៍ស៊ីហ្គេម ខណៈកម្ពុជាបានចាប់ផ្តើមត្រៀមរៀបចំថវិកាទុកបម្រុង សម្រាប់ការចំណាយក្នុងពេលធ្វើជាម្ចាស់ផ្ទះប្រកួតស៊ីហ្គេម។
កម្ពុជាជ្រើសរើសថ្ងៃសុក្រទី៥ ខែឧសភាឆ្នាំ២០២៣ រៀបចំព្រឹត្តិការណ៍ស៊ីហ្គេម
សម្តេចតេជោ ហ៊ុន សែន ថ្លែងក្នុងពិធីចុះពិនិត្យការដ្ឋានសាងសង់ពហុកីឡាដ្ឋានជាតិមរតកតេជោនាព្រឹកថ្ងៃទី២៩ កក្កដានេះថា មូលហេតុដែលត្រូវជ្រើសរើសថ្ងៃសុក្រ ទី០៥ ខែឧសភា ឆ្នាំ២០២៣ រៀបចំព្រឹត្តិការណ៍ស៊ីហ្គេម ដោយសារមានការងារមមាញឹកច្រើន ក្នុងការរៀបចំការបោះឆ្នោត និងខួប៦០ឆ្នាំនៃបុណ្យឯករាជ្យ។
សម្តេចតេជោបានថ្លែងថា “ខ្ញុំបានចាប់ផ្តើមត្រៀមរៀបចំថវិកា ទុកបម្រុងសម្រាប់ការចំណាយ ក្នុងពេលធ្វើជាម្ចាស់ផ្ទះប្រកួតស៊ីហ្គេមនៅឆ្នាំ២០២៣ហើយ ដោយបានចាប់ផ្តើមកាត់ប្រាក់ទុកជាបណ្តើរៗហើយ”។
សម្តេចតេជោ ហ៊ុន សែន ក៏បានណែនាំឱ្យមានការទទួលស្វាគមន៍វត្តមានកីឡាករ កីឡាការិនីបរទេស ឱ្យបានដិតដល់មិនត្រូវឱ្យគេចេញទៅវិញមានការរិះគន់ថា កម្ពុជាទទួលមិនបានដិតដល់។
ពហុកីឡដ្ឋានជាតិមរតកតេជោ ត្រូវបានសាងសង់លើផ្ទៃដី ទំហំជាង៨៥ហិកតា ក្នុងតំបន់អភិវឌ្ឍន៍របស់លោកឧកញ៉ាលី យ៉ុងផាត់។ សំណង់ពហុកីឡដ្ឋានជាតិមរតកតេជោ ត្រូវបានសាងសង់ជា៣ដំណាក់កាល ដោយមានរចនាសម្ព័ន្ធកីឡាសំខាន់ៗដូចជា មណ្ឌលកីឡាក្នុងសាលមណ្ឌលកីឡាហែលទឹក សាលហាត់កីឡាប្រយុទ្ធ អគារស្នាក់នៅ អាហារដ្ឋាន ទីលានហ្វឹកហាត់ក្រៅអគារ សាលវេជ្ជសាស្ត្រ វិទ្យាសាស្ត្រកីឡាសាលហាត់សាច់ដុំ សាលកាយសម្ព័ន្ធ សាលកីឡាបាញ់កាំភ្លើងមជ្ឈមណ្ឌលកីឡាហុកគី និងសាលកីឡាប្រពៃណីផងដែរ។
ការសម្រេចចិត្តសាងសង់ពហុកីឡដ្ឋានជាតិថ្មីនេះ ដើម្បីលើកស្ទួយវិស័យកីឡា និងមួយផ្នែកទៀត សម្រាប់កម្ពុជាឈានឆ្ពោះ ទៅធ្វើជាម្ចាស់ផ្ទះរៀបចំការប្រកួតកីឡាតំបន់អាស៊ាន ហៅថា Sea Grame នៅឆ្នាំ២០២៣៕
